Ўзбекистон Республикаси Мактабгача таълим вазири Агриппина Шин туманимизга ташриф буюрди
Мактабгача таълим – узлуксиз таълимнинг бошланғич қисми ҳисобланади. У боланинг соғлом ва ривожланган шахс бўлиб шаклланишини таъминлаб, ўқишга бўлган иштиёқини уйғотиб, тизимли ўқитишга тайёрлаб боради. Шу сабабли ҳам бугунги кунда юртимизда таълимнинг пойдевори ҳисобланган мактабгача таълим тизимини замон талаблари даражасида ривожлантириш, боғча ёшидаги болажонларни мактабгача таълим ташкилотларига қамраб олиш кўрсаткичини ошириш масаласига тизимли равишда эътибор берилмоқда. Хусусан, туманинг қамров даражаси паст бўлган айрим ҳудудларида мактабгача таълим ташкилотлари тармоғини кенгайтириш, давлат-хусусий шерикчилик асосида ва нодавлат оилавий мактабгача таълим ташкилотлари тармоғини кенгайтириш бўйича қатор лойиҳалар амалга оширилмоқда.
Туманимиздаги мактабгача таълим ташкилотлари фаолияти билан яқиндан танишиш ҳамда ўз таклиф ва тавсияларини бериш мақсадида 24 февраль куни Ўзбекистон Республикаси Мактабгача таълим вазири Агриппина Шин туманимизга ташриф буюрди.
Вазир Тош ёп овули “Обод қалъа” аҳоли пунктида жойлашган “Зебо” нодавлат мактабгача таълим ташкилотида бўлди. Мазкур муассаса 100 ўринга мўлжалланган бўлиб, болажонларга сифатли таълим-тарбия бериш билан бирга рус ва инглиз тилларида мулоқот қилиш кўникмалари ҳам ўргатиб келинмоқда. Вазир муассаса фаолияти ва бу ерда тарбияланувчиларга яратилган шароитлар билан яқиндан танишар экан, тарбиячилар, ошпазлар, тўграк раҳбарлари ва бошқа ходимлар фаолиятини ҳам кўздан кечирди.
Шундан сўнг вазир бошчилигида туманимиздаги бир гуруҳ соҳа масъуллари Манғит шаҳрининг Ойбек номли маҳалласи ҳудудида жойлашган 6-сонли давлат мактабгача таълим ташкилотида бўлишди. Вазир ушбу ташкилот фаолияти билан яқиндан танишди.
Туманимиздаги ушбу муассасада ҳам таълим-тарбия жараёни намунали тарзда йўлга қўйилган бўлиб, ҳар бир боланинг индивидуал имкониятларини, қобилиятларини, хоҳиш-истакларини, эҳтиёжларини ҳисобга олган ҳолда таълим ҳамда тарбия берилмоқда.
Ташриф давомида вазир томонидан мактабгача таълим ташкилотларида таълим ва тарбия жараёнларини хорижий мамлакатлар тажрибасини қўллаган ҳолда илғор педагогик технологиялар асосида ташкил қилиш бўйича тавсиялар берилди.
Маълумки, 2022 – 2026 йилларга мўлжалланган Янги Ўзбекистоннинг Тараққиёт стратегиясида мамлакатимиз бўйича мактабгача таълимдаги қамров даражасини ҳозирги 67 фоиздан камида 80 фоизга етказиш режа қилиб олинган. 2022-2023 йилларда 6 ёшли болаларни мактабгача тайёрлов тизими билан қамраб олиш даражасини 90 фоизга, 2024-2025 ўқув йили якунига қадар эса 100 фоизга етказиш, мактабгача таълим тизимига хусусий сектор маблағларини жалб қилиш орқали 7 мингдан зиёд янги нодавлат мактабгача таълим ташкилотларини ташкил этиш асосий мақсад қилиб олинган. Мактабгача таълим вазири туманимизда ҳам мактабгача таълим ташкилотлари сонини ошириш ва қамров даражасини янада кенгайтириш борасида ўз таклиф ва тавсияларини билдирди.
Туман ҳокимлигининг ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
