Дўрман овулида давра суҳбати ўтказилди

Амударё туманида фаолият юритаётган “Жайхун илҳомлари” нодавлат нотижорат ташкилоти томонидан амалга оширилаётган Олий Мажлис ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш фонди томонидан молиялаштирилган “Ёшлар – янги Ўзбекистон бунёдкорлари” лойиҳаси календарь режаси бўйича туман мактабларида, корхона, ташкилотларда, овул фуқаролар йиғинларида ёшлар тарбиясига оид турли тадбирлар, учрашувлар ўтказилмоқда.

Навбатдаги “Оилада фарзанд тарбиясининг аҳамияти, ёшларни зарарли иллатлар ва турли ахлоқсизликлардан ҳимоя қилишда ота-оналар ва маҳалланинг ўрни” мавзусидаги давра суҳбати Дўрман овул фуқаролар йиғинида бўлиб ўтди. Давра суҳбатида маҳалла фаоллари, имомлар, маънавият тарғиботчилари иштирок этдилар.

Давра суҳбатини Дўрман овул фуқаролар йиғини раиси Атамурод Юсупов кириш сўзи билан очди ва бошқариб борди.

Айтиш жоизки, ташкилотнинг грант лойиҳаси доирасида ўтказилаётган тадбирлардаги “Оилада фарзанд тарбиясининг аҳамияти, ёшларни зарарли иллатлар ва турли ахлоқсизликлардан ҳимоя қилишда ота-оналар ва маҳалланинг ўрни, “Ёшлар маънавиятини юксалтириш уларни китобхонликка жалб қилиш орқали гиёҳвандлик, ичкиликбозлик, турли ахлоқсизликлардан ҳимоя қилиш”, “Ёшлар ўртасида соғлом турмуш тарзи кўникмаларини кенг тарғиб қилиш, уларни гиёҳвандлик, ичкиликбозлик, турли ахлоқсизликлардан ҳимоя қилиш” каби мавзулардаги суҳбатлар иштирокчиларда катта қизиқиш уйғотмоқда.

Тадбирда “Жайхун илҳомлари” нодавлат нотижорат ташкилотининг раиси Ўрозали Рейимов ёшлар тарбиясига оид грант лойиҳасининг мазмун-моҳияти, аҳамияти, лойиҳа доирасида амалга ошириладиган ишлар ва улардан кутилаётган натижалар ҳақида сўз юритди. Грант лойиҳаси доирасида турли учрашувлар ўтказилаётгани, аҳоли ўртасида кенг тарзда тушунтириш ишларини олиб бориш учун ижодкор шоир ва ёзувчилар, маънавият тарғиботчилари, шифокорлар, имомлар, маҳалланинг фаол ёшлари жалб қилингани таъкидланди.

Давра суҳбатида туман маҳалла ва оилани қўллаб-қувватлаш бўлими мутахассиси Раҳмонжон Бобожонов туманимизда ёшлар тарбиясига оид олиб борилаётган ишлар, улар учун яратиб қўйилган имкониятлар, тадбиркорликни йўлга қўйиш борасидаги имтиёзларга кенг турда тўхталиб ўтди.

Дўрман овул фуқаролар йиғини раиси Атамурат Юсупов эса маҳалла ҳудудидаги муаммолар ва уларни ижобий ҳал этиш борасида ўз фикр-мулоҳазаларини билдирди.

Давра суҳбати иштирокчилари бўлган маҳалла фаоллари ва ёшлар ўзларини қизиқтираётган саволлар ва муаммоларни ўртага ташладилар.

Дўрман овулида янгидан иш бошлаган ҳоким ёрдамчиси Маҳмуд Норбоев, Дўрман овул фуқаролар йиғини ёшлар етакчиси Шерали Жумамуродов саволларга жавоб берар экан, маҳалла ёшларини кутиб турган кенг истиқболли йўллар ҳақида гап очиб, ёшлар кўнглида улкан умид учқунларини уйғотди.

Жумладан, овул фуқаролар йиғини ҳудудида ёшларни иш билан таъминлаш мақсадида 4 гектар майдонда иссиқхона қурилади. Олий ўқув юртига кириш мақсадида тайёргарлик кўриш учун туман марказига қатнаётган ёшларга энди маҳалла ҳудудида билим берилади. Бу ишларни амалда ижро этиш учун маҳалла ҳудудида алоҳида бино ажратиб берилади, махсус, малакали ўқитувчилар жалб қилинади.

Дўрман овул фуқаролар йиғинида олиб борилаётган ишлар мамлакатимизда ёшлар тарбияси бўйича амалга оширилаётган ислоҳотларнинг амалдаги ижобий кўриниши, десак асло муболаға бўлмайди.

Ўрозали РЕЙИМОВ.