“ҲАР КУНИНГ БАЙРАМ БЎЛСИН!”

Наврўз – халқимизнинг қадимий тарихи, бой маданияти ва эзгу қадриятларини ўзида яққол мужассам этган миллий байрамимиздир. Шу боисдан ҳам сана ҳар йили мамлакатимизда улкан шодиёналар билан нишонланади.

Ўзбекистон Республикаси Президентининг шу йил 17 февралда қабул қилган “2022 йилги Наврўз умумхалқ байрамига тайёргарлик кўриш ва уни ўтказиш тўғрисида”ги Қарорида ҳам жорий йилги ушбу умумхалқ байрамини “Ассалом, Наврўз – янгиланиш, меҳр-оқибат ва қадр-қиммат айёми” деган бош ғоя асосида умумхалқ сайиллари шаклида кўтаринки руҳда ва юқори савияда нишонлаш белгиланган.

Бутун мамлакатимизда бўлгани каби туманимизда ҳам инсон ва табиат ўртасидаги уйғунлик, она заминга меҳр ва эътибор яққол ифодасини топадиган, бугунгидек тинч-осойишта ва дориломон ҳаётни қадрлашга даъват этувчи  маънавий-маърифий тадбирлар аллақачон бошланиб кетди.

Амударё туманининг Чойкўл овулида ҳам “Ассалом, Наврўзи олам!” деб номланган байрам сайли бўлиб ўтди.

Тадбирга овул фаоллари, табаррук нуронийлари ва ёшлари, 42-сонли, 22-сонли ва 59-сонли  умумий таълим  мактабларининг ўқитувчилари, ўқувчилари, 16-сонли мактабгача  таълим ташкилоти ходимлари ва тарбияланувчилари иштирок этдилар.

Байрам сайлига чорловчи сурнай наволари янгради. Мусиқа, байрамона безатилган саҳнадаги кўринишлар киши кўнглича  ажиб бир хушнудлик бағишлайди.

Чойкўл овул фуқаролар йиғини мутасаддилари ва маҳалла фаоллари барчани Наврўз айёми билан қутлаб, баҳорий таомлар, турли пишириқлар қўйилган байрам дастурхонига таклиф этди. Ҳудуддаги умумий ўрта таълим мактаблари иқтидорли ўқувчиларининг қўл меҳнати билан яратилган турли либослар ўйинчоқлар намуналилари, варракларни томоша қилиб, юртимизда ўтган йилларда нишонланган Наврўз байрами, янгиланаётган Ўзбекистоннинг бугунги кунига доир суратларини томоша қилиб, бир олам таассуротлар олган катта-ю кичик  тўкин дастурхондан жой олдилар.

Тадбирда дорбоз ўйини, масхарабозлар чиқишлари, миллий халқ  ўйинлари – кураш, арқон тортиш мусобақаларини иштирокчилар мириқиб томоша қилдилар.

Шунингдек, 42-сонли, 22-сонли, 59-сонли умумий таълим мактаблари иқтидорли ўқувчилари, шунингдек, 16-сонли мактабгача таълим  ташкилотлари тарбияланувчилари ижросидаги Наврўзи оламни, она  Ватанимизни, тинчлик-осойишталикни тараннум этувчи куй-қўшиқлар, ифодали ёд айтилган шеърлар байрам сайли шукуҳини яна ҳам оширди, йиғилганларга юқори кайфият бахш этди.

Байрам дастурхонига қўйилган буғдой майсасини кўзларига суриб, сумалакдан тотиб, юртимизнинг Наврўзини олқишлаган нуронийлар “Юртим илоҳим ҳар кунинг байрам бўлсин”, дея дуо қилдилар.

Ойгул РАЖАБОВА.