Уйшин овули ҳудудида жойлашган “Полвон бобо” қабристони ободонлаштирилди

Муқаддас динимизда қабристонни зиёрат қилиш катта савоблар қаторига киритилган. Зеро, марҳумларнинг қўним топган масканларини обод қилиш ва уларнинг ҳақларига дуода бўлиш инсонийлик бурчимиздир.

Маълумки, Ўзбекистон Республикаси Вазирлар Маҳкамасининг 2018 йил 15 февралдаги “Муқаддас қадамжонлар, зиёратгоҳлар, масжидлар ва қабристонларни ободонлаштириш ишларини самарали ташкил этиш тўғрисида”ги қарори қабул қилинган эди.

Ушбу қарор ижросини таъминлаш мақсадида Республикамизнинг барча ҳудудлари сингари Амударё туманидаги қабристонлар, зиёратгоҳларда ҳам мунтазам равишда ободонлаштириш ишлари олиб борилмоқда.

Туманимизнинг Уйшин маҳалла фуқаролар йиғини ҳудудида жойлашган “Полвон бобо” қабристонида ҳам Рамазон ойи арафасида ободонлаштириш ишлари олиб борилди. Ушбу эзгу ва ҳайрли ишга маҳаллалардаги имом-хатиблар, нуронийлар ва кенг жамоатчилик вакиллари, туман Ободонлаштириш бошқармаси ишчи-хизматчилари ўз ҳиссаларини қўшишди.

Ҳашар − халқимизнинг азалий одатидир. Озодалик, поклик ва ҳамжиҳатлик халқимиз қонига сингган азалий қадрият, гўзал анъаналардан бири.

Муқаддас динимизда ҳам поклик бирламчи масала саналади. Ҳашар баҳона одамлар орасида оқибат ришталари боғланади, ён-атроф тартибга келтирилади. Қабристонлар гул-майсаларга, яшилликка бурканса, ҳар бир қабр усти тозаланиб, саришта қилинса, марҳумлар руҳи шод бўлади.

Умумий ер майдони 3 гектар бўлган “Полвон бобо” қабристонига ҳашарчилар томонидан 30 турдан ортиқ дарахт кўчатлари ҳамда гуллар экилди. Пахса деворлар оҳак билан оқланиб, дарахтларга шакл берилди. Шунингдек, қабристон ичкариси қуриб қолган шох-шаббалардан тозаланиб, қабристон йўлакчаларига тош ётқизилди. Таъмирталаб бўлиб қолган қабрлар таъмирланди. Бундан ташқари, зиёратчиларга қулайлик яратиш мақсадида таҳоратхоналар пардозланиб, ўриндиқлар ўрнатилди.

Маҳалла нуронийлари ҳашар давомида барча юртдошларимизни янада жипслашиб, қабристонларни обод қилишга, ўтганлар руҳига ҳамиша иззат-икром кўрсатишга чақирди. Шунингдек, ёшларга қабристонни зиёрат қилиш билан бирга уни ободонлаштириш савоби улуғ амаллардан эканлигини ўзининг ҳикматга тўла насиҳат ва ўгитлари билан тушинтиришди.

Қолаверса, қабристонларнинг ташқи кўринишини обод қилишга эътибор қаратиш билан бирга, қабристонларга кирганда кулишдан, баланд овозда гаплашишдан, ортиқча ҳаракатлардан тийилиб, одоб-ахлоқни сақлаган ҳолда зиёрат қилиш лозимлигини айтиб ўтишди.

Дарҳақиқат, миллий қадриятларимизни асраш, ўтган аждодларимиз хотирасини улуғлаш, уларга ҳурмат-эҳтиром кўрсатиш, муқаддас зиёратгоҳ ва қадамжоларни обод қилиш инсоний бурчимиздир.

Буни яхши англаган Уйшин маҳалласининг ёш-у қарилари ташкил этилган ҳашарда фаоллик билан қатнашиб ота-боболари қўним топган мангу масканнинг ҳамда ўз маҳалласи ҳудудининг ободлигига ҳисса қўшишди.

Туман ҳокимлигининг Ахборот хизмати