ГРАНТ ЛОЙИҲАСИ ДОИРАСИДА УЧРАШУВ ЎТКАЗИЛДИ

Мамлакатимизда халқимиз маънавиятини юксалтириш, ёш авлодни Ватанга муҳаббат, миллий ва умуминсоний қадриятлар руҳида камол топтиришга катта эътибор қаратилмоқда. Ҳаётимизда бадиий адабиётнинг ўрни, таъсири ва аҳамиятини янада ошириш, адабиёт, мусиқа, бадиий ва амалий санъат равнақига ҳисса қўшишда ҳаваскор шоирлар ва ҳаваскор ёзувчилар, ижодкорлар, санъаткорлар, бадиий ва амалий усталарини қўллаб-қувватлаш борасида кенг кўламли амалий ишлар олиб борилмоқда.

Зеро, уларнинг ижобий салоҳиятларини рўёбга чиқариш ва жамиятда ижтимоий-маънавий муҳитни янада яхшилашга ҳисса қўшиши учун барча қулай шароитлар бор.

Амударё тумани ёшларининг ижодий маҳсуллари туманда фаолият кўрсатаётган “Тараққиёт кўзгуси” ва унинг илова нашри “Менинг оилам” газеталари саҳифаларида мунтазам ёритиб борилмоқда.

Амударё телевидениеси орқали турли кўрсатувлар тайёрланиб, ёш ижодкорларнинг чиқишлари орқали улар элга танилмоқда. “Тараққиёт кўзгуси” газетаси ёнида ташкил этилган нашриётда туманимиз ижодкорларининг китоблари чоп этилмоқда.

Мамлакатимиз Президенти томонидан илгари сурилган 5 та муҳим ташаббус, ёшлар орасида китобхонлик танловлари ўтказилиб уларнинг ғолибларига автомашиналар совға қилиниши билан рағбатлантирилиши, мактаб битирувчиларининг ҳар бири камида битта миллий мусиқа асбобини чала билиши керак деган ташаббуслар ҳам айнан ёшлар кўнглида маънавиятни ривожлантиришга қаратилган.

Туманимизда фаолият олиб бораётган “Жайхун илҳомлари” нодавлат нотижорат ташкилотининг асосий мақсади ҳам ёшлар орасида маънавиятни ривожлантириш йўналишига қаратилган.

Ташкилот томонидан ҳозирги кунда “Ёшлар – янги Ўзбекистон бунёдкорлари” лойиҳасининг календарь режаси бўйича мактабларда, овул ва маҳалла фуқаролар йиғинларида, корхона-ташкилотларда адабий учрашувлар, тадбирлар ўтказилиб келинмоқда. Олиб борилаётган тарғибот ишларига ёзувчи ва шоирлар, маънавият тарғиботчилари, шифокорлар, имомлар, маҳаллаларнинг фаол ёшлари жалб қилинган.

Ташкилот томонидан ўтказилган навбатдаги “Ёшлар маънавиятини юксалтириш, уларни китобхонликка жалб қилиш орқали гиёҳвандлик, ахлоқсизлик ва бошқа таъсирлардан ҳимоя қилиш” мавзусидаги учрашув тумандаги 26-сонли мактабда ўтказилди. Учрашувда ташкилот раиси Ўрозали Рейимов грант лойиҳасининг мазмун-моҳияти ва аҳамияти, лойиҳа доирасида амалга ошириладиган ишлар ҳамда улардан кутилаётган натижалар ҳақида гапириб берди.

Мактабнинг маънавий-маърифий ишлар бўйича директор ўринбосари Ҳамида Ортиқова мактабда амалга оширилаётган маънавий-маърифий ишлар, ижодий жараёнлар билан таништирди.

Мактабнинг 8-синф ўқувчиларидан Севинч Эшмуродова, Дилора Каримбоева, 9-синф ўқувчиларидан Шаҳзода Эргашева, Венера Қосимовалар ўз ижодларидан шеърлар ўқиб бердилар.

Учрашув сўнгида мактабдаги ижодий жараённи янада жонлантиришга, адабий-бадиий тўгараклар ишини янада яхшилашга келишиб олинди.

Ўрозали Реимов, "Жайхун илҳомлари" ННТ раиси