"Жайхун илҳомлари" ННТ грант лойиҳаси доирасида давра суҳбати ўтказилди

Мамлакатимизда келажагимиз бўлган ёш авлоднинг ҳар томонлама билимли, оқил инсон бўлиб етишишлари учун барча шарт-шароитлар муҳайё. Замонавий мактабларда, энг сўнгги русумлардаги ўқув жиҳозлари билан таъминланган синфхоналарда билим олаётган юртимиз фарзандлари билим ва илмнинг энг юқори чўққиларини эгалламоқдалар.

Туманимизда фаолият юритаётган “Жайхун илҳомлари” нодавлат нотижорат ташкилотининг асосий мақсади ҳам тумандаги адабиёт, мусиқа, бадиий ва амалий санъат соҳасидаги иқтидорли ёшларни излаб топиш ва уларни элга танитиш, улар ижодининг юксалишига ҳисса қўшиш, ёшларнинг маънавиятли, ҳар томонлама баркамол инсон бўлиб етишишларига кўмаклашишдир.

Шу мақсадларда ташкилот томонидан овул ва маҳалла фуқаролар йиғинларида, корхона-ташкилотларда, мактабларда учрашувлар, тадбирлар ўтказилмоқда.

“Оилада фарзанд тарбиясининг аҳамияти, ёшларни зарарли иллатлар ва турли ахлоқсизликлардан ҳимоя қилишда ота-оналар ва маҳалланинг ўрни”, “Ёшлар маънавиятини юксалтириш, уларни китобхонликка жалб қилиш орқали гиёҳвандлик, ичкиликбозлик, турли ахлоқсизлардан ҳимоя қилиш”, “Ёшлар ўртасида соғлом турмуш тарзи кўникмаларини кенг тарғиб қилиш, уларни ичкиликбозлик, гиёҳвандлик, турли ахлоқсизликлардан ҳимоя қилиш” мавзусидаги суҳбатлар барчада катта қизиқиш уйғотмоқда. Тушунтириш ишларининг янада натижали бўлиши учун бунга маҳалла фаоллари, имомлар, шифокорлар, ижодкорлар маънавият тарғиботчилари, турли касб эгалари жалб қилинган.

Навбатдаги – “Оилада фарзанд тарбиясининг аҳамияти, ёшларни зарарли иллатлар ва турли ахлоқсизликлардан ҳимоя қилишда ота-оналар ва маҳалланинг ўрни” мавзусидаги давра суҳбати Манғит шаҳридаги Чордара маҳалла фуқаролар йиғинида бўлиб ўтди.

Давра суҳбатини Чордара маҳалла фуқаролар йиғини раиси Турсунбой Серикбоев кириш сўзи билан очди ҳамда бошқариб берди. У ўз сўзида фарзанд тарбиясида ота-оналар, маҳалла кўй, барчамиз бирдек масъулмиз, дея алоҳида таъкидлаб ўтди.

“Жайхун илҳомлари” нодавлат нотижорат ташкилотининг раиси Ўрозали Рейимов грант лойиҳанинг мазмун-моҳияти, лойиҳа доирасида амалга ошириладиган ишлар ва улардан кутилаётган натижалар ҳақида кенг тарзда тушунтириб берди. Ёшлар тарбияси, ижодкор ёшларни элга танитишда “Тараққиёт кўзгуси”, “Менинг оилам” газеталарида, amunews.uz веб-сайти ҳамда Амударё телевидениесида олиб борилаётган кўрсатувлар, туманимизда ташкил этилган нашриёт орқали чоп этилаётган янги китоблар, ташкилот қошидаги кутубхонанинг имкониятлари барчага таништириб ўтилди.

Маҳалла фуқароси Хайитгул Ражабова фарзанд тарбиясида ота-она, маҳалла фаоллари, ёш-у қари бирдек ҳаракат қилиши, фарзандларнинг билимли, одобли, меҳнатсевар инсонлар бўлиб етишишига барчани ҳисса қўшишга чақирди.

Ҳудуддаги 36-сонли умумтаълим мактаби директори ўринбосари Баҳром Хўжамуродов ўз сўзида болалар тарбиясида ота-оналар ва педагогика жамоасини узвий ҳаракатда бўлишга чақирди. Фарзанд тарбияси учун мактабда устозлар, уйда ота-оналар масъуллиги, уларни ақлий ва фойдали меҳнат билан шуғулланишга ундаш лозимлиги алоҳида уқтирилди.

Шунингдек, маҳалла аҳли айни кунларда кўча ва хонадонлар атрофини ободонлаштириш, ариқ ва майдончаларни тозалаш, кўкаламзорлаштириш ишларига алоҳида эътибор қаратиш, бу ҳам бўлса маънавиятнинг, таълим тарбиянинг бир бўлаги эканлигини таъкидлаб ўтишди.

Ў.РЕЙИМОВ.