16-СОНЛИ МАКТАБДА ФУҚАРО МУҲОФАЗАСИ КУНИГА БАҒИШЛАНГАН ТАДБИР ЎТКАЗИЛДИ

Кундалик турмушимизда инсоннинг хавфли вазиятларга тушиб қолиш эҳтимоли катта. Бу турмушдаги жароҳат, транспорт ёки саноат аварияси, ёнғин, сув тошқини, сел оқими ёки бошқа табиий ҳодисалар бўлиши мумкин. Бундай вазиятларда ҳолатни баҳолай олиш, тўғри ҳаракат қилишга тайёр туриш жабрланганлар сонининг камайишига ва моддий зарарнинг камайишига олиб келади.

Амударё туманида 1 апрель кунидан 1 май кунига қадар бўлган давр “Фавқулодда вазиятларнинг олдини олиш ва фуқаро муҳофазаси ойлиги” деб белгиланди. Туман ҳокими – Фуқаро муҳофазаси бошлиғининг шу йил 31 мартдаги тегишли буйруғи талабларига асосан ойлик доирасида ҳудудларда тадбирлар ўтказилиб, фуқароларнинг фавқулодда вазиятларга тайёргарлик ҳолатлари кўриб чиқилмоқда.

Жорий йилнинг 19 апрель куни навбатдаги тадбир 16-сонли мактабда ташкил этилди. Унда туман Фавқулодда вазиятлар бўлими масъуллари, мактаб директори Равшаной Ўрозбоева, Чақириққа қадар бошланғич тайёргарлик раҳбари Акмал Саидов ҳамда мактаб ўқувчилари иштирок этдилар.

Тадбирда таъкидланганидек, хавф туғилганда тезликда қандай вазият юз берганлигини баҳолай олиш, хавфнинг фавқулодда вазиятга айланишига йўл қўймаслик, хавфли вазиятдан чиқиб кетиш учун тўғри ҳаракат қила билиш алоҳида аҳамият касб этади. Бундай вазиятларнинг муваффақиятли тугашига одатда инсоннинг қийинчиликларни енгишга бўлган тайёргарлиги ҳисобига эришиш мумкин.

Мазкур ойликни ўтказишдан мақсад – табиий ва техноген тусдаги фавқулодда вазиятлар юзага келганда мактаб ўқувчиларининг тўғри ҳаракат қилиш кўникмаларини такомиллаштириш, фуқаро муҳофазаси бўйича тузилган гуруҳларни кечиктириб бўлмайдиган авария ва қутқарув ишларига тайёргарлигини кучайтиришдан иборат.

Шунингдек, фавқулодда вазиятлар юзага келганда фуқаро муҳофазаси гуруҳларининг ўз мажбуриятларини аниқ ва тўғри бажаришини амалиётда синаш ва ўрганиш, туман фуқаро муҳофазаси хизматларининг ҳамкорликдаги ҳаракатларини такомиллаштириш кабилар ҳам кўзда тутилган.

Тадбир масъуллар кузатувида икки босқичда олиб борилди. Биринчи босқичда “Мактабда юзага келиши мумкин бўлган фавқулодда вазиятларда фуқаро муҳофазаси гуруҳлари ва мактаб раҳбариятининг ҳаракатлари” мавзусида ўқув машқининг назарий қисми ўтказилди. Мактаб ичкарисида ўқувчиларга кутилмаганда фавқулодда ҳодисалар содир бўлиб қолганида бажариши лозим бўлган ҳаракатлар тушунтирилди ва буни амалиётда бажариш учун ўқувчилар гуруҳларга бўлиб олинди.

Иккинчи босқичда мактабда кутилмаган авария ҳодисалари содир бўлганида дастлабки ҳаракат қилиш жараёнлари бажарилди. Фавқулодда ҳолатда жабрланганларга мактаб фуқаро муҳофазаси гуруҳлари томонидан биринчи ёрдам кўрсатиш, оғир аҳволга тушганларни қутқариш каби ишлар амалда кўрсатиб берилди.

Тадбирда мактаб раҳбарлар таркиби ва фуқаро муҳофазаси тузилмасидан 44 нафар ўқувчилар, туман Фавқулодда вазиятлар бўлимидан 2 нафар ходим ва мактаб ўқитувчи ва ўқувчиларидан 65 нафари қатнашди. Тадбирга ташриф буюрган масъуллар тадбир давомида иштирокчиларнинг амалиётда йўл қўйган камчиликларини кўрсатиб беришди. Шунингдек, бундай камчиликларга йўл қўймасликлари кераклиги, фавқулодда вазиятларга доим тайёр туриш лозимлиги, акс ҳолда кутилмаган хавфли ҳодисалар оғир оқибатларни келтириб чиқариши мумкинлиги айтиб ўтилди.

Б.Тажибоев, туман Фавқулодда вазиятлар бўлими бўлинма бошлиғи, капитан.