ГРАНТ ЛОЙИҲАСИ ДОИРАСИДА СОҒЛОМ ТУРМУШ ТАРЗИ ТАРҒИБОТИГА БАҒИШЛАНГАН ДАВРА СУҲБАТИ ЎТКАЗИЛДИ
Жорий йилнинг 26 апрель санасида “Тараққиёт кўзгуси” газетаси таҳририятининг Олий Мажлис ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган “Соғлом турмуш тарзи – фаровон ҳаёт асоси” грант лойиҳаси доирасида “Ёшларда соғлом турмуш тарзи маданиятини шакллантириш” мавзусида Амударё тумани 1-сонли касб-ҳунар мактабида давра суҳбати бўлиб ўтди.
Давра суҳбатида туман Тиббиёт бирлашмаси ҳузуридаги Саломатлик маркази шифокори Тамара Саидова, “Тараққиёт кўзгуси” газетаси ходимлари, касб-ҳунар мактаби ўқитувчиларни, ишлаб чиқариш таълими усталари ва ўқувчи-ёшлар иштирок этдилар.
Давра суҳбатини касб-ҳунар мактаби директори Оллоёр Болтабоев очди ва кун тартибидаги мавзу юзасидан ўз фикрларини билдириб, “Тараққиёт кўзгуси” газетаси ижодий жамоаси томонидан халқимиз орасида соғлом турмуш тарзини қарор топтириш мақсадида амалга оширилаётган тарғибот-ташвиқот ишларига юқори баҳо берди.
Шундан сўнг, “Соғлом турмуш тарзи – фаровон ҳаёт асоси” грант лойиҳаси координатори, “Тараққиёт кўзгуси” газетаси махсус мухбири Робия Йўлдошева давра суҳбати иштирокчиларига мазкур лойиҳанинг мазмун-моҳияти, ундан кутилаётган натижалар хусусида батафсил маълумот берди.
Хусусан, у ўз сўзида соғлом турмуш тарзи кенг маъноли тушунча бўлиб, унумли меҳнат қилиш, иштиёқ билан ўқиш, фаол дам олиш, бадантарбия ва спорт билан шуғулланиш, организмни чиниқтириш, шахсий гигиена қоидаларига риоя қилиш, оқилона овқатланиш, зарарли одатлардан ўзини тийиш, ҳар йили шифокор кўригидан ўтиб туриш каби омиллардан иборат эканлигини таъкидлади.
Шундан сўнг, Амударё туман Тиббиёт бирлашмаси ҳузуридаги Саломатлик маркази шифокори Тамара Саидова кун тартибидаги асосий мавзу – “Ёшларда соғлом турмуш тарзи маданиятини шакллантириш” хусусида қизиқарли маъруза қилди. Хусусан, ёшлар кундалик ҳаётларида амал қилиши лозим бўлган асосий гигиена қоидаларидан ташқари, яхши муомала, самимий муносабат ҳам ўта муҳимлигини таъкидлаб ўтди. Инсонга яхши кайфият бахш этиш унинг руҳий саломатлиги гарови эканлиги, ҳозирги шароитда кенг жамоатчилик, айниқса, ёшлар ўртасида жисмоний фаоллик сезиларли даражада камайганлиги, шу боис, жамиятда соғлом турмуш тарзини шакллантириш, камҳаракатликка қарши оммавий курашиш, ёшларни спорт билан шуғулланишга жалб қилиш мамлакатимизда давлат сиёсатининг устувор вазифаларидан бирига айланганини қайд этди. Чунки носоғлом турмуш тарзи, жисмоний нофаоллик юрак-қон томир касалликлари, инсульт, хавфли ўсмалар, нафас олиш йўлларининг сурункали яллиғланиши, қандли диабет каби касалликларни келтириб чиқаришини ҳаётий мисоллар тариқасида тушунтириб, ёшларга тиббий маслаҳатлар берди.
Давра суҳбатида ўқувчи-ёшлардан Дилнура Йўлдошева, Насиба Худойберганова, Жаҳонгир Турсунбоевлар ҳам ўз фикр-мулоҳазалари билан иштирок этишди.
Ўқувчи-ёшлар ўзларини қизиқтирган саволларга давра суҳбати давомида батафсил жавоблар олдилар.
Рисолат ИБРАГИМОВА, amunews.uz жамоатчи мухбири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
