1-июн Халқаро болаларни ҳимоя қилиш кунига бағишлаб байрам тадбири ўтказилди
Халқаро болаларни ҳимоя қилиш куни бутун дунё болалари учун энг беғубор ва қувончли байрам ҳисобланади. Албатта, болалар бу дунё, бу ҳаёт мазмунининг ажралмас қисмидир. Болалар ўз табассумлари орқали инсонлар қалбида ҳаётга, яшашга бўлган қизиқишни уйғотадилар. Кўзларида эзгулик ва меҳр қалқиб турган болажонлар мусаффо осмонда эркин парвоз этаётган қалдирғочларга ўхшашади.
Ҳар йили бутун дунёда бўлгани каби мамлакатимизда ҳам 1 июнь – Халқаро болаларни ҳимоя қилиш куни кенг нишонланиб келинади. Ушбу байрамда келажагимиз эгалари учун турли концертлар, кўргазмалар, сайиллар, спорт мусобақалари ва турли хил тадбирлар ўтказилади. Истироҳат боғлари эса болаларнинг табассумлари билан гўёки мўъжизалар дунёсига айланади.
1 июнь куни Амударё туманининг Манғит шаҳридаги маданият ва истироҳат боғи ҳам болалар кулгуси билан янада нурафшон бўлди. Истироҳат боғида Халқаро болаларни ҳимоя қилиш кунига бағишлаб катта байрам тадбири ўтказилди.
Тадбирда туман ҳокими Султонбой Йўлдашев, секторлар раҳбарлари, ҳоким ўринбосарлари, муассаса, корхона ва ташкилотлар раҳбарлари, кенг жамоатчилик вакиллари иштирок этишди.
Дастлаб туман ҳокими Султонбой Йўлдашев тадбирга йиғилган барча болажонларни байрам шодиёнаси билан самимий қутлаб, уларнинг келгусидаги ўқиш ва ишларида улкан зафарлар тилади. Шунингдек, болаларнинг комил инсон бўлиб вояга етишлари учун мамлакатимизда яратилган барча шарт-шароитлар ҳақида тўхталиб ўтди.
Айтиш керакки, бугун юртимизда эртанги кун эгаларининг баркамол авлод бўлиб вояга етишлари учун барча имкониятлар мавжуд. Уларнинг бепул таълим олиш, тиббий хизматдан фойдаланиш ва бошқа ҳуқуқлари Қонун билан кафолатлаб қўйилган.
Тадбир давомида турли мусобақа ва беллашуварда қатнашиб, юқори натижаларга эришган болажонларнинг ютуқлари эътироф этилиб, эсдалик совғалари билан тақдирландилар. Байрам совғалари, шаънига билдирилган илиқ сўз ва тилаклар болажонларнинг дилида катта тассурот ва ёрқин из қолдирди. Болажонларга кўрсатилаётган юксак эътибор ва ғамхўрлик уларни янада янги марралар ва зафарлар сари ундади.
Тадбир туман Маданият бўлими санъаткорлари, мактаблар, мактабгача таълим муассасаларининг рақс дасталари ижросида бахтли болалик, озод ва обод Ватанимизни тараннум қилувчи куй-қўшиқлар ва рақслар билан давом этди. Ўз тенгдошлари томонидан маҳорат билан ижро этилан куй-қўшиқлар, рақслар ва саҳна кўринишларини болалар мароқ билан томоша қилишди.
Дарҳақиқат, ота-она учун дунёда болажонлар кулгуси ва шодлигидан азиз неъмат йўқ. Тиниқ нигоҳи ва бийрон тили билан оламдаги жамики ажойиботларни ўрганишга, мушоҳада қилишга уринаётган болакайнинг нурли чеҳрасига боққан ҳар қандай инсон ҳаёт ташвишларини унутади. Фарзандининг саодатли ва бахтиёр дамларини кўриб яшаш ҳар бир инсон умрининг асосий мазмунидир.
Яна бир бора юртимиздаги барча болажонларни 1 июнь – Халқаро болаларни ҳимоя қилиш куни билан самимий табриклаймиз! Сиз – Ватанимизнинг келажаги, эртанги кунимиз эгаларисиз. Шундай экан, илм-фан, касб-ҳунар сирларини пухта эгаллаб, келажак сари дадил қадам ташланг! Буюк боболаримизга муносиб издош, эл-юртимизга камарбаста авлод, ота-онангиз орзу қилган фарзанд бўлиб вояга етинг, азиз болажонлар!
Туман ҳокимлигининг ахборот хизмати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
