Гулзор маҳалласида жами 90 та хонадонли кўп қаватли уй-жойлар ўз эгаларига тантанали тарзда топширилди

Муҳтарам Президентимиз бошчилигида олиб борилаётган халқчил ва оқилона сиёсат юртимизнинг барча ҳудудлари яшовчи аҳоли ҳаётида ўзининг ижобий натижасини кўрсатмоқда. Жумладан, Амударё туманининг маркази, овул ва маҳаллаларида ҳам катта бунёдкорлик ишлари амалга оширилиб, маҳаллалар кўркам қиёфа касб этмоқда.

Туманнинг меъморий қиёфасини яхшилаш, янги-янги бинолар барпо қилиш ва ҳудудларни ободонлаштириш ишлари замирида аввало, одамлар учун муносиб турмуш шароити яратиш мақсади мужассамдир.

Ўз уй-жойига эга бўлиш ҳар бир инсоннинг ўзини бахтли ҳис қилиши, тўкин яшаши, эзгу истакларини рўёбга чиқаришида муҳим омиллардан бири бўлиб ҳисобланади. 5 июнь куни туманнинг Гулзор маҳалласи ҳудудида барпо этилган кўп қаватли арзонлаштирилган уй-жойларни ўз эгаларига топшириш маросими бўлиб ўтди.

Тадбирда туман ҳокими Султонбой Йўлдашев, секторлар раҳбарлари, ҳоким ўринбосарлари, ҳокимлик масъул ходимлари иштирок этишди. Дастлаб, туман ҳокими Султонбой Йўлдашев янги хонадон эгаларини аётларидаги унутилмас воқеа билан самимий табриклади.

Шунингдек,  кейинги йилларда қурилаётган арзонлаштирилган уй-жойларнинг асосий қисми ижтимоий ҳимояга, уй-жойга муҳтож, кўп болали оилалар фарзандлари учун ажратилаётгани мамлакатимизда юритилаётган халқчил сиёсатнинг ёрқин намунаси эканлигини таъкидлади.

Янгидан қурилган уй-жойларнинг энг муҳим афзал томони − бу биноларнинг муҳандислик-коммуникация тармоқларига уланиб, ижтимоий ва бозор инфратузилмаси объектларига яқин ҳудудда жойлашганидир. Янги массивларда қурилган ва қурилаётган автомобиль йўллари, сув, газ ва электр тармоқлари, болалар боғчалари, савдо шохобчалари, спорт майдончалари  аҳолининг қулай шарт-шароитларда яшаши учун комплекс тизимни ҳосил қилмоқда.

 Маълумот учун, Гулзор маҳалласи ҳудудида 15,6 млрд.сўм маблағ эвазига 3 та 5 қаватли, жами 90 та хонадонли уй-жойлар қурилди. Ушбу уй-жойларнинг қуриб битказилгани ва фойдаланишга топширилгани уй-жойга муҳтож юртдошларимиз учун катта совға бўлди.

Тадбирда иштирок этганлар янги хонадонларда тўйлар бўлишини, оилаларида камолга етаётган фарзандлар ота-онасига, эл-юртимизга муносиб хизмат қиладиган илм-маърифатли инсонлар бўлиб вояга етишини, хонадон соҳиб ва соҳибалари янги қўшнилар билан аҳил-иноқликда, ҳамжиҳатликда яшаб, туманимизнинг энг намунали маҳалласига айланишига тилакдош бўлдилар.

Ишонамизки, янги хонадонларга кўчиб кираётган 90 та оила давлатимиз ва жамиятимиз ҳаётида фаол иштироки билан юртимиздаги энг ибратли оилаларга айланишади.

Тадбир давомида туман ҳокими Султонбой Йўлдашев хонадонлар эгаларини табриклаб, янги уй-жойларда яратилган шароитлар билан яқиндан танишди.

Шу кундан эътиборан туманимизнинг Гулзор маҳалласида аксарият қисми ёш оилалардан иборат бўлган 90 та хонадондан иборат янги аҳоли яшаш маскани пайдо бўлди. Уларнинг юзларида шукроналик, ҳаётдан розилик, давлатимиз сиёсатидан мамнунлик туйғулари мужассам. Зеро, мамлакатимизда олиб борилаётган одилона сиёсат замирида ҳам инсон қадрини улуғлаш, одамларнинг ҳаётдан рози бўлиб, эртанги кунга ишонч билан яшашларига эришиш мақсади мужассамдир.

Туман ҳокимлигининг Ахборот хизмати