БЕРУНИЙ НОМЛИ МАҲАЛЛАДА КЎРГАЗМАЛИ СЕМИНАР ВА ДАВРА СУҲБАТИ ТАШКИЛ ЭТИЛДИ

Амударё туманининг Беруний номли маҳалла фуқаролар йиғини биносида “Энг намунали маҳалла фаоли” деб номланган кўргазмали семинар ва “Онажонлар ўгити” номли давра суҳбати бўлиб ўтди.

Тадбирларда туман ҳокими ўринбосари Гўзал Собурова ҳамда фуқаролар йиғини масъуллари, ҳудуд аҳолиси иштирок этдилар. Тадбир муносабати билан ташкил қилинган кўргазмада маҳаллада ҳунармандчилик, тикувчилик ва ёғочдан уй-рўзғор  буюмларини ясаш орқасидан  ўзини ўзи банд қилиб, оиласига даромад олиб келаётган ҳунар эгалари, аёл-қизларнинг меҳнат маҳсуллари намойиш этилди. Мазкур кўргазма хотин-қизларнинг фаоллигини ошириш, уларнинг таълим ва касбий кўникмалар олиши, бандлигини таъминлашга ҳар томонлама кўмаклашиш, тадбиркорлик ташаббусларини янада қўллаб-қувватлаш мақсадида ташкил этилди.

Меҳмонлар кўргазмага қўйилган уй-рўзғор буюмлари, бешик, беланчак ва ёзги кийим-кечаклар, юмшоқ ўйинчоқларни томоша қилганларидан сўнг, ҳунармандларнинг меҳнатларига муносиб баҳо беришди. Чиройли ва мустаҳкам, сифатли ишланган харидоргир маҳсулотларга талаб юқорилиги ташриф буюрувчилар томонидан эътироф этилди.

Тадбирда туман ҳокимининг оила, хотин-қизлар масалалари бўйича ўринбосари Гўзал Сабурова хотин-қизларнинг мамлакат ижтимоий-сиёсий ҳаётидаги ўрни ва фаоллигини ошириш, уларни ҳар томонлама қўллаб-қувватлаш, оила ва хотин-қизларнинг муаммоларини ўз вақтида аниқлаш, оғир ижтимоий аҳволга тушиб қолган оила ва хотин-қизларга ижтимоий-ҳуқуқий, психологик ёрдам кўрсатиш, қишлоқлардаги хотин-қизларни касб-ҳунарга, оилавий ва хусусий тадбиркорликка кенг жалб этиш, оилалар маънавий-ахлоқий қадриятларини мустаҳкамлаш борасида амалга оширилаётган ишлар хусусида сўзлади.

Бу каби тадбирлар банд бўлмаган аёл-қизларнинг тадбиркорликни йўлга қўйиши, касб-ҳунар ўрганишга бўлган қизиқишлари ортишида муҳим аҳамият касб этишини таъкидлаб, устоз-шогирд анъаналарини йўлга қўйиш, туманда ҳунармандлар расталарини ташкил қилиш масалаларига тўхталиб ўтди.

Шундан сўнг, “Онажонлар ўгити”  номли давра суҳбати бошланди. Ушбу тадбир ҳам туман Оила ва хотин-қизлар бўлими бошлиғи Гўзал Сабурова, шунингдек, 40-сонли мактаб директори Санобар Хўжамуродова, Беруний номли маҳаллада яшовчи нуроний онахонлар ва ёшлар, маҳалла фаоллари иштирокида ўтказилди.

Тадбир давомидаги аёлларимизнинг оиладаги, фарзанд тарбиясидаги ролини ҳамда ижтимоий ҳаётдаги фаоллигини ошириш, одобли қиз, иффатли келин, маърифатли аёл  қандай бўлиши кераклиги ҳақидаги суҳбатлар билан қизғин, муҳокамали тарзда бўлиб ўтди.

Ундан ташқари, суҳбат давомида маҳаллада яшовчи Рима момо Ражабова “Маҳалланинг энг ибратли оила бекаси” ва “Ҳунарманд аёл” сифатида, ёшларга ибрат бўла оладиган Шукуржон Хўжамуродова “Маҳалланинг фаол аёли”, Соҳибжамол Узакбаева эса ”Ҳунарманд қиз” сифатида эътироф этилди.

”Онажонлар ўгити” деб номланган давра суҳбати давомида ёши улуғ онахонларимиз томонидан ёш оилалар бекаларига ва қизларга ўзининг хаётий тажрибасидан келиб чиқиб берилган керакли маслаҳатлари, ўгитлари  тингланди.

Қизиқарли ўтган тадбирлар маҳалла аҳлида катта таассуротлар қолдирди.

О.Худойберганова.