37-СОНЛИ МТТда “ХАЙР, БОҒЧАЖОН!” НОМЛИ ТАДБИРИ ЎТКАЗИЛДИ
Инсоннинг шахс сифатида шаклланишида унинг мурғак болалик даври муҳим ўрин тутиши ҳақида олимларимиз томонидан кўплаб психологик тадқиқотлар олиб борилган ва айнан боғча ёшидаги болаларнинг эслаш қобилияти, қизиқишлар майдони ҳайрон қоларли даражада кенглигини исботловчи илмий хулосаларни беришган. Шунинг учун ҳам мамлакатимизда мактабгача таълим ёшидаги болажонларнинг қобилиятларини такомиллаштириш, уларни болаликдан ўз орзу-интилишлари, қизиқишларига мутаносиб равишда тўғри йўналтириш орқали таълим-тарбия беришга алоҳида эътибор қаратилмоқда.
Амударё туманининг Амир Темур номли овули ҳудудидаги 37-сонли мактабгача таълим ташкилотига 2019 йилдан бери Шаҳноза Алламберганова раҳбарлик қилиб келмоқда. Мазкур мактабгача таълим ташкилотида айни пайтда асосий гуруҳда 60 нафар қисқа гуруҳларда 100 нафар болажонлар тарбияланмоқда. Мактабгача таълим ташкилоти тарбиячи-ходималарининг 5 нафари олий, 4 нафари эса ўрта махсус маълумотли мутахассислардир.
Жорий йилнинг 10 июнь куни мазкур муассасада етти ёшга қадам қўяётган болажонларни мактаб таълимига кузатишга бағишланган “Хайр, боғчажон!” адабий-мусиқий тадбир бўлиб ўтди. Севимли боғча ва қадрдон тарбиячи-боғча оналари билан хайрлашув маросимида болажонларнинг ота-оналари, мактабгача таълим ташкилоти масъуллари ҳамда тарбиячи-педагоглар иштирок этишди.
Тадбирни мактабгача таълим ташкилоти мудираси Шаҳноза Аллаберганова очиб, кичкинтойларни, аввало, мактаб ёшига етганлари, мактабгача таълим сирларини пухта эгаллаб, эндиликда илмлар уммони сари илк қадам қўяётганлари билан табриклади.
Муассасада жами 28 нафар тарбиячи-педагоглар фаолият олиб боришади. Шу боис, болажонларнинг маънан ва жисмонан соғлом бўлиб вояга етишларини таъминлаш мақсадида жисмоний тарбия йўриқчиси томонидан турли қизиқарли ўйинлар, ақлни чархловчи машғулотлар тез-тез ўтказилиб турилади.
Хусусан, шахмат, шашка тўгаракларида болажонлар учун энг севимли машғулотлар мажмуаси яратилган. Улар куч синашадилар, бир-бирларини ютуқлари билан самимий ва маданиятли тарзда табриклашни ўрганадилар. Айнан ана шу шахмат ва шашка спорти тўгараги аъзолари бўлган болажонлар хотираси кучли, синчков ва қатъиятли, ўткир зеҳнли бўлиб улғайишаётганидан уларнинг ота-оналари ҳам хурсанд.
Мусиқа тўгараги эса болажонлар қалбида санъатга меҳр уйғотиш билан бирга, ўзлари ўрганаётган ашулалар орқали улар қалбида шеъриятга, адабиётга ихлос ва муҳаббат туйғуларини мустаҳкамлаши болажонларнинг хатти-ҳаракатларида ёрқин намоён бўлаётгани қувонарли. Бундан ташқари, болажонлар рус тили тўгараги машғулотларида жуда фаол.
Турли эртак қаҳрамонларининг суратлари, ўйинчоқлар, гуллар ва ранго-ранг шарлар билан безатилган мактабгача таълим ташкилоти ҳовлиси ҳамда ўйинчоқ-зали болажонларнинг қувноқ овозларига, қувончларига тўлди.
Болажонлар “боғча опа”лари билан биргаликда ўзлари ўрганган шеърлар, куй-қўшиқлари, рақслари билан даврага файз киритдилар. Рус тилида бир-бирлари билан мулоқот қилишни ўрганган болажонлар эркин фикрлаш қобилиятларини намоён этиб, ота-оналарини хурсанд қилдилар.
Айниқса, шахмат ва шашка тўгараги аъзолари бўлган болажонларнинг мантиқий фикрлаш баҳсларидаги иштироки ва ўз фикрини аниқ, лўнда ифодалаш қобилиятлари, ўткир зеҳни, ҳозиржавоблиги барчага манзур бўлди.
Бири-биридан қувноқ куй ва қўшиқлар, ақлни чархловчи ўйинлар билан файзли ўтган “Хайр боғчажон!” тадбири якунида болажонлар ўзлари учун қадрдон маскан ва севимли “боғча опа”лари билан хайрлашдилар ҳамда мактабда яхши ўқиб, илм чўққиларини забт этишга ваъда бердилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
