ТУМАНДАГИ 36-СОНЛИ ВА 56-СОНЛИ МАКТАБДА КЕНГ КЎЛАМЛИ ҚУРИЛИШ-ТАЪМИРЛАШ ИШЛАРИ ОЛИБ БОРИЛМОҚДА
Президентимизнинг шу йил январь ойида “2022-2024 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарори қабул қилинган эди. Шунга кўра мамлакатимизнинг ижтимоий ва ишлаб чиқариш инфратузилмасини изчил ривожлантириш, қишлоқ ва маҳаллаларни янада обод қилиш, жойларда қулай тадбиркорлик ва инвестиция муҳитини шакллантириш учун 2022-2024 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури ишлаб чиқилди ва жорий этилди.
Амударё туманида ҳам мазкур дастур бўйича кенг кўламли қурилиш-таъмирлаш ишлари олиб борилмоқда. Ушбу дастурга кўра Чордара маҳалласидаги 36-сонли мактаб биноси ҳам реконструкция қилиниб, 180 ўринга мўлжалланган қўшимча бино қуриш ишлари амалга оширилмоқда. Лойиҳа баҳоси 2 млрд. 292 млн. сўмдан ортиқ бўлган қурилиш ишлари “КМК-304” масъулияти чекланган жамияти томонидан бажарилмоқда. Қурилиш ишларида ташкилотнинг 8 нафар ишчиси меҳнат қилмоқда.
Ушбу мактаб 1974 йилда фойдаланишга топширилган. Ўз даврида замонавий кўринишга эга бўлган мазкур мактаб 560 ўқувчи ўрнига мўлжалланган. Айни пайтда ушбу таълим масканида 30 та синфда 800 нафар ўқувчи таълим-тарбия олмоқда. Уларга 72 нафар педагог-ўқитувчилар янги педагогик технологиялар асосида таълим беришмоқда. Педагогларнинг 3 нафари олий тоифали, 9 нафари 1-тоифали, 22 нафари 2-тоифали, 38 нафари эса мутахассис, 2 нафари рус тилидан С2 даражадаги сертификатга эга ўқитувчилардир.
Ҳозирда биноси таъмирталаб ҳолатга келиб қолган мазкур мактабда таълим-тарбия ишлари яхши йўлга қўйилган бўлиб, ўқувчиларнинг бўш вақтларини мазмунли ташкил этиш, унумли фойдаланишларини таъминлаш мақсадида 8 та фан, 4 та спорт, 2 та ижтимоий-маданий тўгараклар ташкил этилган. Шунингдек, ўқувчи-ёшлар футбол, баскетбол ва волейбол майдончалари ҳамда ёпиқ спорт залида спорт билан шуғулланишади.
Ёш авлод замонавий шароитларда таълим-тарбия олиши учун имконият яратиш мақсадида қурилаётган мактабнинг янги биносининг фундамент ишлари якунланган бўлиб, айни пайтда ишчилар биринчи қават ғиштини теришмоқда. Бино август ойининг охирларида фойдаланишга топширилиши мўлжалланган.
Дастур доирасидаги шу каби қурилиш-таъмирлаш ишлари Бойовул маҳалласидаги 56-сонли мактабда ҳам амалга оширилмоқда. Кўп йиллардан бери ёш авлодга таълим-тарбия берилиб келинаётган ушбу таълим маскани ҳам анча таъмирталаб бўлиб қолган ва ўқувчи ўрнини кенгайтиришга эҳтиёж сезилаётган эди. Қувватидан ортиқ ўқувчиси мавжуд бўлган мазкур мактабда имкон даражасида таълим-тарбия ишлари яхши йўлга қўйилган.
Туманда 2020-2021 йилги ўқув йилида умумтаълим мактабларини тамомлаган битирувчиларининг олий ўқув юртларига ўқишга кириш кўрсаткичи янада ортди. Бу борада 56-сонли мактаб энг илғор таълим масканларидан бири бўлди. Ушбу ўқув йилида мактабнинг 11-синфини тамомлаган 77 нафар битирувчидан 55 нафари, яъни 71,2 фоизи ОТМга қабул қилинди. Мактабнинг технология фани йўналишидаги 11-“Б” вариатив синфининг 25 нафар битирувчиларидан барчаси, яъни 100 фоизи ОТМ талабалари бўлишган эди. Мазкур ўқув йилидаги битирувчилардан ҳам устозларнинг умиди катта.
Олий таълимга қамраб олиш кўрсаткичи бўйича энг илғор бўлган 56-сонли мактабда ҳам замонавий шароитлар яратиш мақсадида амалга оширилаётган қурилиш ишлари тумандаги “Темир бетон” масъулияти чекланган жамияти томонидан бажарилмоқда. Лойиҳа баҳоси 2 млрд. 326 млн.дан ортиқ бўлган қурилиш ишлари давомида мактаб учун 180 ўринга мўлжалланган қўшимча бино ва реконструкция ишларини амалга ошириш режалаштирилган. Айни пайтда қўшимча бинонинг фундамент ишлари якунланиб, бирнчи қаватда ғишт териш ишлари олиб борилмоқда.
Ҳар иккала мактаб ўқитувчи ва ўқувчилари янги ўқув йилини таъмирланган ва янги қурилган бинода қарши олишади. Ушбу таълим масканлари жамият ривожи, тараққиётига ҳисса қўша оладиган, юрт келажагига муносиб бўлган ёшларни тарбиялашга узоқ йиллар хизмат қилади.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
