МАҲАЛЛА ЁШЛАРИНИНГ МАСЛАҲАТГЎЙИГА АЙЛАНГАН ЕТАКЧИ

Ўзбекистон – ёшлар мамлакати. Шу боис, юртимизда ёш авлод таълим-тарбияси ва камолотига алоҳида эътибор қаратилмоқда. Ёшларнинг талаб ва эҳтиёжларини ўрганиш, уларга янгидан-янги имтиёз ва имкониятлар яратишга аҳамият берилмоқда.
Фозилбек Қурбонбоев Тўлқин овули ёшлар етакчиси сифатида бугунги кунда ўз фаолиятини олиб бормоқда. Ёшлар тўғрисидаги зарур маълумотларни “Ёшлар дафтари” ва “Ёшлар портали” электрон платформаларига киритиб, ўқувчи-ёшларнинг бўш вақтини мазмунли ташкил этиш, уларнинг ижтимоий фаоллигини ошириш, иқтидори ва истеъдодини рағбатлантириш ва шу каби бошқа мақсадларда кўпгина ишларни амалга оширмоқда. Шу билан бирга, аҳоли, айниқса, ёшлар орасида тадбиркорликни тарғиб этиб, кредит ва ёрдам чораларини жалб қилишда амалий ёрдам бериб келмоқда.
Овулда жами аҳоли сони 8170 нафардан иборат бўлса, шундан 3182 нафари ёшлар ҳисобланади. “Ёшлар дафтари” платформасига 2022 йил январь ойидан бошлаб, шу кунгача 143 нафар ёшлар етакчи тавсияси билан киритилди. Шундан, 135 нафар ёшга платформа орқали деҳқон хўжалиги юритиш учун ер участкаси берилди ва уларнинг бандлиги таъминланди. Бундан ташқари, 7 нафар ёшга имтиёзли кредит асосида деҳқончиликда қўлланиладиган мотокультиваторлар олиб берилди. 1 нафар ёшга кредит асосида тикув машинаси олиб берилиб, ҳозирги кунда аҳолига хизмат кўрсатиш орқали даромад манбаига эга бўлди. Унинг ташаббуси билан “Тўлқин чеварлари” ўқув-маркази ташкил этилиб, ҳозирда у ерда овулдаги хотин-қизлар тикувчиликнинг сир-асрорларини ўрганишмоқда.
“Беш ташаббус олимпиадаси” доирасидаги “Қувноқлар ва зукколар” кўрик-танловида маҳалла ёшларидан иборат “Ёшлик” жамоаси маҳалла, сектор ва туман босқичларида мутлақ 1-ўринни эгаллаб, ҳудудий босқич йўлланмасини қўлга киритди.
Маҳалла ҳудудида 3 та мактаб, 2 та сунъий қопламали спорт майдончаси мавжуд бўлиб, ундан овул ёшлари фойдаланмоқда.  
Ахборот технологияларидан самарали фойдаланиш мақсадида овулда “Компьютер саводхонлиги”, “Ёш дастурчи” тўгараги ташкил этилиб, мунтазам дарс машғулотлари йўлга қўйилган. Маҳалла фуқаролар йиғини биноси ёнида ёшларни китобхонликка тарғиб қилиш мақсадида кутубхона барпо этилиб, китоблар жамланмаси билан тўлдирилди. Маънавият ва китобхонликни ёшлар онгига сингдириш борасида амалга оширилган ишлар натижасини ёшларнинг турли танловларда фахрли ўринларни эгаллаганидан ҳам билсак бўлади. “Беш ташаббус олимпиадаси” доирасидаги “Ёш китобхон оила”, “Мушоира”, “Зукко китобхон” танловларининг маҳалла босқичлари ўтказилди. “Ёш китобхон оила” танловида Султоновлар оиласи сектор босқичида 2-ўринни қўлга киритди. “Мушоира” танловида Ойжамол Ибрагимова туман босқичида 2-ўрин, “Зукко китобхон” танловида маҳалла ёшларидан иборат “Билимдон” жамоаси фахрли 2-ўринни қўлга киритди. “Заковат” интеллектуал ўйинининг сектор босқичида 2-ўрин, туман босқичида фахрли 3-ўринни эгаллашди.
Маҳаллада ёшлар етакчиси сифатида меҳнат фаолиятини олиб бораётган Фозилбек изланувчан ва ташаббускор етакчи сифатида бошқаларга ўрнак бўлиб келмоқда. Маҳалла етакчиси юрт равнақи, порлоқ келажак қуриш йўлида муносиб ҳисса қўшиш учун ўзининг бор куч-ғайрат ва салоҳиятини сафарбар қилмоқда.

Севара ИСМОИЛОВА,
ҚДУ талабаси.