“БИЗ БИЛИМДОН БОЛАЛАРМИЗ!” ШИОРИ ОСТИДА БОШЛАНҒИЧ ТАЪЛИМ ФАН ОЙЛИГИ ЎТКАЗИЛДИ

Юртимиздаги барча умумтаълим мактабларида сентябрь ойини бошланғич таълим фан ойлиги сифатида нишонлаш анъанага айланиб бормоқда. Алифбони ўрганишга киришган болалар, ўқиш-ёзишни пухта ўрганиб, 2-синфга қадам қўйган, шунингдек, илм-фан асосларини пухта эгаллаш сари интилаётган, ҳатто бу борада ўз иқтидорларини намоён этаётган бошланғич синфлар ўқувчилари учун бошланғия таълим фан ойлиги доирасидаги тадбирлар қизиқарли таассуротлар билан ўтмоқда.

Амударё туман ХТБга қарашли 36-сонли умумтаълим мактабида ҳам сентябрь ойи давомида фан ойлиги доирасида бири-биридан қизиқарли тадбирлар, очиқ дарслар ташкил қилиниб, иншолар ҳамда диктантлар танловлари ўтказилди. 24 сентябрь куни эса бошланғич синф ўқитувчилари Насиба Бобожонова, Сарагул Юсупова, Алишер Йўлдошев, Гулноза Матризаева, Малоҳат Раҳимова, Барно Матсапоева, Барчиной Хўжамуродова, Барно Ибодуллаева, Иқболой Аллаберганова, Зулхумор Жамоловалар томонидан тайёрланган фан ойлиги якунига бағишланган адабий-бадиий тадбир бўлиб ўтди.

“Биз билимдон ёшлармиз!” шиори остида ўтказилиши режалаштирилган бошланғич таълим фан ойлигининг якуний босқичига бағишланган тадбирнинг маънавий-маърифий жиҳатдан таъсирчанлигини ошириш мақсадида мактаб саҳнаси бошланғич синфлар ўқувчилари томонидан чиройли безатилди. Унда ўқувчиларнинг беш муҳим ташаббус доирасида амалга оширган ишлари, хусусан, рассомлик, чеварлик, китобхонлик, компьютер саводхонликларини акс эттирувчи кўргазмали воситалари акс эттирилди.

Тадбирни маънавий-маърифий ишлар бўйича директор ўринбосари Ваҳобжон Давлетов очди  ва тадбир иштирокчиларига, бошланғич синфлар ўқувчилари ҳамда ўқитувчиларига бир ой давом этган бошланғич синфлар фан ойлигини муваффақиятли тарзда ўтказганликлари учун миннатдорчилик билдирди. Шу билан бирга яқинлашиб келаётган 1 октябрь – Ўқитувчи ва мураббийлар куни – умумхалқ байрами билан барчани муборакбод этди. Ваҳобжон Давлетов бошланғич синфда берилган мукаммал таълим ва тарбиянинг аҳамияти ҳақида тўхталиб, инсоннинг шахс сифатида шаклланишида бошланғич таълим муҳим ўрни эгаллаши, инсоннинг айнан ана шу таълим-тарбия жараёнида олган билими ўз келажаги учун қўйиладиган мустаҳкам пойдевор бўлишини таъкидлади.

Тадбирда бошланғич синф ўқувчиларининг барчаси фаол иштирок этиб, ўзлари тайёрлаган Ватанни, тинчликни тараннум этувчи куй-қўшиқлари ҳамда шеърлари билан барчани хушнуд қилди.

Улар ўз ижролари орқали мактаб ўқувчиларининг чуқур билим олиш билан бирга мусиқа, рақс санъатини ҳам пухта эгаллаётганлигини амалда намоён этдилар.

Фан ойлиги доирасида “Ҳаваскор рассомлар” танлови ҳам ўтказилиб, ғолиб ўқувчилар рағбатлантирилди. Тадбирда фаол иштирок этган ўқувчилар билан бир қаторда иншолар ҳамда диктантлар танлови ғолиблари ҳам мактаб маъмурияти томонидан фахрий ёрлиқлар билан тақдирланди.

Бошланғич синфлар фан ойлигини ўтказишдан мақсад мактабдаги иқтидорли, ўқувчиларни рағбатлантириш, улардаги ижодий қобилиятни ўстириш, бу борадаги таълим-тарбия услубларини такомиллаштириш ҳамда самарадорлигини ошириш орқали ўқувчи-ёшларни келажакда ўзлари танлаган йўналишлар бўйича касб-кор эгаллашлари учун мустаҳкам замин яратишдир.

Муҳайё Каримова, 36-сонли мактабнинг ижодий-маданий масалалар бўйича тарғиботчиси.