Спортнинг анъанавий каратэ-до тури бўйича очиқ чемпионат бўлиб ўтди

Мамлакатимизда амалга оширилаётган ислоҳотлар, жумладан, жисмоний тарбия ва спорт соҳасига қаратилаётган эътибор Янги Ўзбекистон келажагини юксалтириш, миллат генафондини янада соғломлаштиришга қаратилгани билан аҳамиятлидир.

Қолаверса, ҳукуматимиз томонидан соҳани ривожлантириш орқали Ўзбекистон спортини дунё миқёсида намоён этишга алоҳида эътибор қаратилмоқда.

Дарҳақиқат, спорт олимпиадаларида спортчиларимиз эришган муваффақиятлари юртимиз байроғини кўкларга кўтариши билан бирга ёш авлоднинг жисмонан соғлом бўлиб вояга етишида муҳим восита бўлиб хизмат қилади. Шу мақсадда Республикамизнинг барча ҳудудларида бўлгани сингари Амударё туманида ҳам спорт соҳасига алоҳида эътибор қаратилиб келинмоқда.

27 сентябрь куни Манғит шаҳри Олмазор маҳалласи ҳудудидаги Болалар ва ўсмирлар спорт мактабида Қорақалпоғистон Республикаси анъанавий каратэ-до федерацияси томонидан Ўзбекистон Республикаси Мустақиллигининг 31 йиллиги муносабати билан “Янги Ўзбекистонда эл азиз, инсон азиз!” шиори остида спортнинг анъанавий каратэ-до тури бўйича туман очиқ чемпионати бўлиб ўтди.

Чемпионат 5-17 ёш оралиғидаги ўсмирлар ва қизлар ўртасида, шунингдек 18 ёшдан катталар ўртасида ўтказилди.

Чемпионатнинг очилиш маросимида туман ҳокими Султонбой Йўлдашев, Қорақалпоғистон Республикаси анъанавий каратэ-до федерацияси Президенти Ўктам Абдураимов, 3-сектор раҳбари, туман Ички ишлар бўлими бошлиғи Жамаладдин Юсупов, 4-сектор раҳбари, туман Давлат Солиқ инспекцияси бошлиғи Айдос Сейитов, Амударё тумани спортни ривожлантириш бўлими бошлиғи Ғулом Қурбанбаев ҳамда Шимоли-ғарбий ҳарбий округ оркестр жамаоси иштирок этишди.

Қорақалпоғистон Республикаси анъанавий каратэ-до федерацияси Президенти Ўктам Абдураимов мамлакатимизда жисмоний тарбия ва спортни оммалаштириш ижтимоий сиёсатнинг муҳим йўналишларидан бири этиб белгилангани, спорт аҳоли саломатлигини мустаҳкамлаш, ёш авлодни соғлом ва баркамол этиб тарбиялаш орқали жамиятда соғлом турмуш тарзини қарор топтиришга хизмат қилишини айтиб ўтди.

Шунингдек, спорт турли касалликлар, ёшлар ўртасида зарарли одатларнинг олдини олишга хизмат қилишини, қолаверса спорт юксак маданият, ватанпарварлик туйғуларини шакллантиришда ҳам муҳим ўрин тутишини таъкидлади.

Шундан сўнг, туман ҳокими Султонбой Йўлдашев тумандаги ёшларнинг спорт соҳасида эришаётган муваффақиятлирини, қўлга киритаётган ғалабаларини эътироф этди. Шунингдек, мустақиллик йилларида спортни ривожлантириш соҳасида кенг кўламли ишлар амалга оширилганини, аҳолининг, айниқса, ёш авлоднинг жисмоний тарбия ва оммавий спорт билан мунтазам шуғулланишлари учун барча зарур шароитлар яратиб берилганини, ҳудудларимизда кўпгина спорт иншоотлари ва мажмуалари, ўйингоҳлар бунёд этилганини таъкидлаб, чемпионат қатнашчиларининг барчасига омад тилади ва чемпионатни очиқ деб эълон қилди.

Шундан сўнг, Ўзбекистон ва Қорақалпоғистон Республикаларининг давлат мадҳиялари янграб, Шимоли-ғарбий ҳарбий округ оркестр жамаосининг чиқишлари намойиш этилди.

Мусобақада 50 дан ортиқ туманимиз спортчилари ҳамда Қўнғирот туманидан ташриф буюрган ўсмирлар ва қиз болалар иштирок этишди. Мусобақа ҳар бир ёш тоифаси бўйича олимпия тизими асосида ўтказилди.

Чемпионат якунида ғолиб бўлган спортчилар эсдалик совғалари ва диплом билан тақдирланди. Шунингдек, туманда спортни ривожлантиришга, айниқса, каратэ-до турининг ривожланишига муносиб ҳисса қўшган сектор раҳбарларига Қорақалпоғистон Республикаси анъанавий каратэ-до федерациясининг ташаккурномаси тантанали тарзда топширилди.

Туман ҳокимлигининг Ахборот хизмати.