ИНШОЛАР ТАНЛОВИ ҒОЛИБЛАРИ ТАҚДИРЛАНДИ

Ўқувчи-ёшларни миллий ва умуминсоний қадриятларга содиқлик руҳида тарбиялаш, уларнинг маънавий, эстетик, ахлоқий дунёқарашини кенгайтириш, тафаккурини турли хил ёт ғоялар таъсиридан ҳимоя қилиш ҳамда юртимизнинг чинакам фидойилари этиб тарбиялаш бугунги куннинг энг долзарб вазифасидир. Чунки ёшлар эртаги кунимизнинг эгаларидир. Шу боисдан уларнинг интиллекуал ва ижодий салоҳиятини юксалтириш мамлакатимизда амалга оширилаётган ислоҳотларга дахлдорлик туйғуларини тарбиялаш жуда муҳим.

Яқинда туманимиз мактабларининг 9-11 синфлари ўқувчилари ўртасида Республика Маънавият ва маърифат маркази Амударё туман бўлинмаси, туман Халқ таълими бўлими ва “Жайхун илҳомлари” нодавлат нотижорат ташкилоти ҳамкорлигида 15 октябрь – Халқаро қишлоқ аёллари куни муносабати билан “Менинг қишлоғим”, “Менинг онам – қишлоғим файзи” мавзуларида ўтказилган иншолар танлови ҳам шу мақсадга хизмат қилади.

Иншолар танловида туманимиздаги 85 та мактабларнинг 9-11-синфларида таълим олаётган иқтидорли ўғил-қизлар иштирок этдилар.

Шуни алоҳида эътироф этиш, жоизки, бугунги кун ёшларининг дунёқараши кенг. Таълим муассасаларида уларнинг замонавий ахборот-коммуникацион технологияларидан фойдаланишлари, билимларини оширишлари учун барча шароитлар яратилган. Интернет кутубхоналар, мактабдаги кутубхоналардаги мавжуд нодир адабиётларни мутолаа қилиш ўқувчиларнинг ижодий қобилиятини юксалтиришга хизмат қилаётир. Буни туманимизда бадиий ижод билан шуғулланаётган ўқувчилар сони ортиб, бир қанча ўқувчиларнинг китоблари нашрдан чиқаётганида ҳам яққол кўриш мумкин. Туманимизда ташкил этилган нашриёт ёшларнинг ижод маҳсулини чоп этишга тайёрлашга улкан ҳисса қўшаётир. Шунингдек, “Жайхун илҳомлари” нодавлат нотижорат ташкилоти ижодкор ёшларни қўллаб-қувватлаб, уларнинг ўзлигини намоён этишларига шароит яратмоқда.

“Халқаро қишлоқ аёллари куни” муносабати билан ҳамкор ташкилотларнинг биргаликда ўтказган танлови ҳам ижодкор ўқувчиларнинг иқтидорларини синовдан ўтказишга бир минбар бўлди, дейиш мумкин.

Танловга тақдим этилган иншоларнинг таҳлили уларнинг мавзу юзасидан мустақил ва эркин фикрлари борлигини кўрсатди.

Ҳакамлар ҳайъати қарорига кўра танловда учинчи ўринни 39-сонли мактабнинг 9-синф ўқувчиси Севинч Бозорбоева, иккинчи ўринни 84-сонли мактабнинг 11-синф ўқувчиси Мардона Раҳимбоева, биринчи ўринни эса 73-сонли мактабнинг 11-синф ўқувчиси Комила Гулимматовалар эгалладилар. Шунингдек, 27-, 18-, 5-, 2-, 69- ва 85-сонли мактаблар ўқувчилари турли номинациялар бўйича рағбатлантирилди.

Танлов ғолиблари Республика Маънавият ва маърифат маркази туман бўлинмаси томонидан рағбатлантирилди.

Иншолар танлови туманимиз мактабларида таълим олаётган ўқувчи-ёшларнинг ижодий қобилиятини юксалтиришга хизмат қилади.

Ойгул РАЖАБОВА.