ТУМАН МАДАНИЯТ БЎЛИМИ ТОМОНИДАН “ТИЛ – МИЛЛАТ КЎЗГУСИ” МАВЗУСИДА БАДИИЙ-МУСИҚИЙ ТАДБИР ЎТКАЗИЛДИ

Барча халқ ва миллатларнинг асосий мулоқот воситаси бу уларнинг миллий тили ҳисобланади. Ҳар бир миллат тили элининг урф-одат, анъана ва маданиятларини сақлайди, шуларнинг ва халқ ўтмиши, тарихининг авлоддан авлодга ўтишини таъминлайди. Шу боис барча элатларнинг миллий тили ўз давлатида жуда қадрланади.

Жорий йил мамлакатимизда ҳам ўзбек тилига давлат тили мақоми берилганига 33 йил тўлади. Маълумки, 1989 йил 21 октябрда ўзбек тилига Давлат тили мақоми берилди. Бу ҳақда Конституциямизда ҳам “Ўзбекистон Республикасининг давлат тили ўзбек тилидир” деб ёзиб қўйилган. Бу кун юртимизда чексиз қувонч ва ифтихор билан байрам қилинади, сана муносабати билан барча ҳудудларда ҳар хил тадбирлар ўтказилиб, кенг нишонланади.

20 октябрь куни Амударё туманидаги Президент таълим муассасалари агентлиги тизимидаги ихтисослаштирилган мактабда ҳам “Тил – миллат кўзгуси” мавзусида бадиий-мусиқий тадбир бўлиб ўтди. Туман Маданият бўлими томонидан ташкил этилган ушбу тадбирда мактабнинг ўқув ишлари бўйича директор ўринбосари Равшан Холмуродов, она тили ва адабиёт фани ўқитувчилари Моҳира Собирова, Чаросхон Норимбетова, Дилноза Жумабоева, Юлдуз Турсунбоева ҳамда мактабнинг бошқа ўқитувчилари, ўқувчилар иштирок этишди.

Тадбирда дастлаб сўзга чиққанлар барчани тил байрами билан қутлаб, ўзбек тилининг нечоғлик бой тил эканлигини эътироф этиб, миллий тилимизда ижод қилган улуғ бобокалон алломаларимиз, уларнинг дунёга машҳур бўлган ижод намуналари ҳақида фахр билан сўзлаб ўтдилар.

Мактабнинг она тили ва адабиёт фани ўқитувчилари она тили — миллат ғурури, унинг энг улуғ қадрияти, миллийлигимиз, буюк тарихимиз, юксак маънавиятимизнинг асоси эканлигини, узоқ йиллик тарихга эга ўзбек тилининг ривожи улуғ бобокалонимиз Алишер Навоий даврида яна бир поғонага кўтарилгани, буюк шоир ва мутафаккир бўлган бу зот туркий тилни луғат бойлиги ва нафислиги жиҳатидан бошқа тиллардан ҳеч ҳам кам эмаслигини ўзининг кўплаб асарлари орқали исботлаганини таъкидлаб ўтдилар.

Шунингдек, бошқада буюк ижодкорларнинг ўзбек тилининг сермаъно эканлигини кўрсатиб берувчи шеърларидан намуналар айтиб бердилар. Мактабнинг 5-, 7-, 8-синф ўқувчилари ҳам тил, миллат, Ватанимизни мадҳ этгувчи шеърлар айтиб, фахру-ифтихорини намоён этдилар.

Шундан сўнг, байрамга бағишлаб тайёрланган мусиқий дастур намойиш этилди. Дастур давомида Драма тўгарак раҳбари Мирсаид Қодиров режиссёрлигида саҳналаштирилган, мактабнинг 6-синф ўқувчилари иштирокидаги адиб Ғафур Ғуломнинг “Шум бола” асаридан парча саҳна кўринишида ҳавола қилинди. Саҳнага шум бола образида чиққан Жавлонбек Олимов, Бой образидаги Акобир Абдусаматов ижроси томошабинларга жуда манзур бўлди.

Тадбирга туман Маданият бўлими эстрада хонандалари,”Учқун” ансамбли бадиий раҳбари Анвар Худойбергановлар ижросидаги қўшиқ ва тароналар, 38-сонли мактабнинг рақс жамоаси ижросидаги жозибали ва дилрабо рақслар янада файз киритди ва барчага хушнудлик бахш этди.

О.Худойберганова.