БУГУНГИ ЎЗБЕК АЁЛИ ҲАР ЖИҲАТДАН ФАОЛ

Ўзбекистонда хотин-қизларга бўлган муносабат, уларнинг ҳуқуқлари ва эркинликларини ҳимоя қилиш давлат сиёсати даражасига кўтарилган. Президентимиз И.Каримов ўзининг турли чиқишларида бу масалага доимий равишда эътибор қаратиб келмоқда.

1998 йил 5 декабрда Конституция қабул қилинганлигининг олти йиллиги муносабати билан ўтказилган тантанали мажлисда сўзлаган нутқида 1999 йилни "Аёллар йили” деб эълон қилар экан, Юртбошимиз шундай деган эдилар:

-"Инсоният тарихи гувоҳлик берадики, минг йиллар жараёнида ҳар жамиятнинг маданий ва маънавий ҳаёти уларнинг аёлларга бўлган муносабати билан белгиланган. Бизга бу қадрият янада қимматлидир, чунки биз аёлларга шарқона ҳурмат билан муносабатда бўламиз”.

Мамлакатимизда аёллар ҳуқуқларини ҳимоя қилишга қаратилган қонунчилик тизими шаклланган.

Конституциямизнинг 18-моддасига кўра, "Ўзбекистон Республикасида барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқеидан қатъий назар, қонун олдида тенгдирлар. Имтиёзлар фақат қонун билан белгилаб қўйилади ҳамда ижтимоий адолат тамойилларига мос бўлиши шарт”. 46-моддада эса янада аниқ ва равшан қилиб: "Хотин-қизлар ва эркаклар тенг ҳуқуқлидир”,-деб гендер тенглиги тамойили мустаҳкамлаб қўйилган.

Жамиятда аёлларнинг ижтимоий фаоллигини ошириш мақсадида турли хил ижтимоий-ҳуқуқий ва жамоат тузилмалари ташкил этилган. Хусусан, "Ҳуқуқий таълим марказлари”, "Аёллар марказлари”, "Саломатлик марказлари” каби ижтимоий тузилмалар аёлларнинг жамиятда ўз ўрнини топишларида муҳим аҳамият касб этмоқда.

Мен ҳар тонг фарзандларимни ўқишга, умр йўлдошимни юмушга кузатиб, улар қатори шодон кайфиятда ўзим меҳнат қиладиган 55-сонли мактаб томон йўл оламан. Кун бўйи севимли касбимда фаолият юритиб, ишдан сўнг оилам бағрига хуш кайфиятда қайтаман. Қандай яхши замонлар-а, дейман қувониб. Умр йўлдошим билан баб-баравар ҳуқуқ ва имкониятларим бор. Ишлаш, жамоатга фаол аралашиш – аёл кишига қанчалик ҳузур бағишлашини билсангиз эди!

Ахир дунёнинг турли бурчакларида менга ўхшаган аёлларнинг кўпчилиги тўрт девор ичида, ҳаёт гўзалликларидан мосуво, ҳижобга бурканиб яшашяпти-ку! Биз ўзбек аёллари эса оила ташвишларига ўралиб қолаётганимиз йўқ. Ўз фикримизни эмин-эркин ифода этиб, бўш вақтимизни оиламиз бағрида кўнгилли ўтказамиз. Саломатлигимизни мустаҳкамлаш учун сиҳатгоҳларда дам олиб, яна меҳнат бағрига қайтамиз, ўзимиз қизиққан тадбиркорлик турлари билан шуғулланамиз. Бундай шарт-шароит ва имкониятларнинг барчаси Бош Қомусимиз орқали кафолатланган.

Хулоса қилиб айтганда, мамлакат ишлаб чиқаришининг барча соҳаларида, ҳатто мамлакатни бошқарув органларида, иқтисод ва сиёсатда, илм-фанда аёлларнинг тутган ўрни беқиёс каттадир. Бугунги ўзбек аёли ҳар жиҳатдан етук шаклланган фаол шахсга айланган.

Зуҳра Аҳмедова,

55-сонли мактабнинг кутубхона мудираси.