ДЎРМАН ОВУЛИДА “ЯШИЛ МАКОН” УМУММИЛЛИЙ ЛОЙИҲАСИ ДОИРАСИДА АМАЛИЙ СЕМИНАР ЎТКАЗИЛДИ

Шу кунларда мамлакатимиз бўйлаб Президентимиз ташаббусига ташкил этилган “Яшил макон” умуммиллий лойиҳаси доирасида ҳудудларни кўкаламзорлаштириш ишлари давом этмоқда. Ушбу ҳаракат доирасида Амударё туманида ҳам ҳудуд иқлим шароитига мос бўлган кўчатлар экиш ишлари қизғин ташкил этилиб, боғ-роғлар яратилмоқда.

Жорий йил 4 ноябрь куни Амударё туманидаги Дўрман овулидаги 84-сонли мактаб биносида Ўзбекстон Республикаси Президентининг 2022 йил 25 октябрдаги “Жамоатчилик фикри асосида шакллантириладиган лойиҳаларни молиялаштириш кўламини кенгайтириш чора-тадбирлари тўғрисида”ги Қарорининг мазмун-моҳиятини тушунтириш ҳамда “Яшил макон” умуммиллий лойиҳаси доирасида кўчат экиш ишларини ташкил этиш бўйича амалий семинар ўтказилди.

Семинарда туман Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоев, Оила ва хотин-қизларни қўллаб-қувватлаш бўлими бошлиғи Гўзал Сабурова, Ободонлаштириш бошқармаси бошлиғи Жасур Норимов, Ёшлар ишлари агентлиги туман бўлими бошлиғи Сардор Исмаилов ҳамда бошқа масъуллар, фуқаролар йиғини ходимлари, овул фаоллари иштирок этишди.

Семинарда сўзга чиққан туман Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоев маҳалла раисларига лойиҳа ва унинг афзалликлари тўғрисида фуқароларга батафсил тушунчалар беришда ҳоким ёрдамчилари, ёшлар етакчилари ва хотин-қизлар билан ҳамкорликдаги ишларни янада жадаллаштириш лозимлигини таъкидлади. Туман Молия бўлими масъули ҳам маҳалла раисларининг лойиҳаларни дастурга жойлаш, овоз бериш жараёнларида эътибор қаратиши лозим бўлган жиҳатлар тўғрисидаги кўплаб саволларига аниқ ва атрофлича жавоб берди.

Шунингдек, семинарда “Яшил макон” умуммиллий лойиҳасини татбиқ этиш мақсадида туманда самарали ишлар олиб борилаётгани, жорий йилнинг баҳор мавсумидан кўкаламзорлаштириш, мевали дарахт ва бута кўчатларини экиш ишларини тизимли, уюшқоқлик билан ташкил қилингани, куз мавсумида ҳам ушбу эзгу ишларни давом эттириш бўйича режа-тадбирлар белгилаб олингани, ҳозирда ҳам режага кўра қатор амалий ишлар олиб борилаётганлиги алоҳида таъкидлаб ўтилди.

Шундан сўнг, аҳоли хонадонларига ва овул ҳудудига иқлимга мос дарахтлар кўчатларини экиш, уларни парваришлаш бўйича тавсиялар берилди. Табиат мусаффолигини таъминлаш, экологик мувозанатни барқарорлаштиришда кўкаламзорлаштиришнинг, дарахтларни кўпайтиришнинг аҳамияти тушунтирилди.

Семинарда таъкидланганидек, экология ва атроф-муҳитни муҳофаза қилиш, айниқса, дарахт экишга қаратилган умуммиллий лойиҳани амалга ошириш масаласи давлат сиёсати даражасига кўтарилгани бежиз эмас. Айтиш жоизки, мамлакатимиз ва бутун дунёдаги вазият ҳам экологик муаммоларга мана шундай тизимли ва самарали ёндашувни тақозо этмоқда.

Сўзга чиққан масъуллар экологик масалаларга бу қадар катта аҳамият қаратилиб, мана шундай умуммиллий лойиҳа ўтказилиши Ўзбекистон тажрибасида шу пайтга қадар кузатилмаганлигини, «Яшил макон» умуммиллий лойиҳаси Ўзбекистон шароитида шу пайтгача экология соҳасида амалга оширилган ишлардан ўринли хулоса чиқарган ҳолда, масаланинг барча тарафларини атрофлича инобатга олиб, келажакни кўзлаб ишлаб чиқилган ноёб тажриба сифатида ўз натижасини, самарасини беришини алоҳида таъкидлашди.

Семинардан сўнг, овулда янгидан ташкил этилган боғ ҳудудига мевали ва манзарали дарахт кўчатлари ўтқазилди.

Шунингдек, 1 ноябрдан 30 ноябргача “Кексалар учун туризм ойлиги” деб эълон қилингани муносабати билан Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоев, Оила ва хотин-қизларни қўллаб-қувватлаш бўлими бошлиғи Гўзал Сабурова, туман Ободонлаштириш бошқармаси бошлиғи Жасур Норимов ва яна бир гуруҳ мутасаддилар Дўрман овулидаги фронт ортида меҳнат фахрийлари 93 ёшли Йўлдош бобо Матмуродов, 87 ёшга кирган Ойимжон момо Раҳимова ҳамда 80 ёшли Аминбой ота Жуматовларнинг ҳолидан хабар олишди ва совға-саломлар топширишди.

Кексалар ўзларига кўрсатилган бу эътибор ва ғамхўрликдан ниҳоятда мамнун бўлдилар.

Озода Худойберганова.