ТИЗИМДАГИ ЯНГИЛИКЛАР АҲОЛИ ФАРОВОНЛИГИНИ ОШИРИШГА ХИЗМАТ ҚИЛАДИ

Ўзбекистон Республикасида ташкил этилган “Маҳалланинг фаол модели” барча қардош ва чет эл давлатларининг диққат марказида бўлаяпти. Чунки жамиятнинг кичик бир бўлаги бўлган маҳалла барча ривожланиш соҳаларининг энг асосий бўғини бўлиб қолмоқда.

Эндиликда маҳалладан туриб барча давлат органларига мурожаат қилиш ва уларнинг раҳбарлари билан мулоқот қилиш тизими яратилди. Давлат ва ижтимоий хизматларни бевосита маҳаллада кўрсатиш, шу жумладан, Ўзбекистон Республикаси Президентининг Халқ қабулхоналари билан самарали алоқаларни йўлга қўйиш орқали маҳаллаларнинг халқ олдидаги нуфузини ошириш, молиявий имкониятларини кенгайтириш, аҳолини давлат томонидан қўллаб-қувватлаш тизими самарадорлигини ошириш, маҳалла ҳудудида давлат-хусусий шериклик асосида спорт ва маданий иншоотлар, ижодий клублар, бандликка кўмаклашиш ва ўқитиш марказлари, тадбиркорлик объектлари каби инфратузилмани яратиш бўйича чора-тадбирларни амалга ошириш кўзда тутилган.

Маҳалла ва оилани қўллаб-қувватлаш вазирлиги ҳамда Иқтисодий тараққиёт ва камбағалликни қисқартириш вазирлиги билан биргаликда маҳалла фаолиятини такомиллаштиришга қаратилган чора-тадбирлар дастури ва янгиланган “Фуқароларнинг ўзини ўзи бошқариш органлари тўғрисида”ги Қонун лойиҳасини ишлаб чиқди. Давлат бошқаруви органларининг “Давлат – инсон учун” тамойили асосида ҳудудий масалаларни ҳал қилишдаги масъулияти ва жавобгарлигини кучайтириш  ҳамда уларнинг стратегик йўналишларни режалаштиришга қаратилган янги тизим яратиш мақсадида ҳоким ёрдамчилари ҳамда ёшлар етакчилари томонидан доимий равишда маҳаллани ўрганиш ва таҳлил қилиш натижасига кўра уларни ривожлантириш бўйича “йўл хариталари”ни ишлаб чиқиш амалиёти йўлга қўйилди.

Фуқаролик жамиятининг ноёб ва бетакрор миллий институти бўлмиш фуқароларнинг ўзини ўзи бошқариш органлари -  маҳаллалар фақат бизнинг халқимиз турмуш тарзига, жамиятимиз ҳаётига хос миллий демократия мактабидир.

Зуҳра Нурузова, Тошкент тиббиёт академияси профессори.