40-СОНЛИ МАКТАБ АТРОФИНИНГ ЯШИЛ ҲУДУДИ ЯНАДА КЕНГАЙДИ

Давлатимиз раҳбари “Яшил макон” умуммиллий лойиҳаси доирасида республика бўйича 2022 йил якунигача 75 миллион дона мевали ва манзарали дарахтлар, кўп йиллик гул кўчатларини экиш вазифасини қўйган эди. Бунда ҳар бир ҳудуднинг иқлим шароитига мос, тупроқ таркиби, суғориш шароити ҳолатидан келиб чиқиб кўчатлар экишни ташкил этиш топширилган эди.

Республикамизда бу борада 2021 йилги тажрибалардан келиб чиқиб, 20 октябрдан 1 декабргача кўчат экиш бўйича “долзарб 40 кунлик” эълон қилинди ва аҳоли хонадонлари атрофлари, маҳалла, мактаблар, идора, ташкилотлар атрофларига кўчат экиш ишлари уюшқоқлик билан олиб борилмоқда. Натижада туманимизда ҳам яшил ҳудудлар кенгайиб, чор-атрофда турли кўп йиллик гуллар, дарахтлар кўпаймоқда.

19 ноябрь куни лойиҳа доирасида туманимиздаги 40-сонли мактабда “Мактабимиз атрофини яшил масканга айлантирамиз” шиори остида кўчат экиш тадбирлари бўлиб ўтди.

Тадбирда туман прокуратураси, Халқ таълими бўлими, Экология бўлими ходимлари, мактаб маъмурияти, ўқитувчилар иштирок этди. Мактаб ҳудудидаги қаровсиз ерлар туман Ободонлаштириш бошқармаси кўмаги билан тозаланиб, боғ ҳудудига қўшилди шу куни боғ ҳудудига 200 тупдан ортиқ мевали ва манзарали дарахт кўчатлари экилди.

Шуни эътироф этиш керакки, мазкур мактабга ҳудудидаги манзарали, мевали дарахтлар, йўлаклар атрофларига экилган анвойи гуллар ўзгача файз бағишлаб туради. Иқлим шароитимизга мос экилиб, агротехник талаблар асосида парвариш қилинаётган ушбу дарахтлар, гуллар дуркун ўсиб, ривожланмоқда.

Эндиликда мактаб боғига туташган қаровсиз ерлар ҳам ўзлаштирилиб, 200 тупдан зиёд дарахт кўчатлари ўтқазилгани келгусида чор-атроф кўркига кўрк қўшади.

Халқимизнинг қадимий анъаналари ва урф-одатларига кўра, кўчат экиш, атрофимиздаги олам мусаффолигига ҳисса қўшиш – ҳар бир инсоннинг бурчи. Қадрият даражасига кўтарилган бу одат мазкур тадбирда ҳам яққол намоён бўлди. Кўчат экиш ишларида туман прокурори, 2-сектор раҳбари Азиз Рўзметов, прокуратура ходимлари, экология бўлими ходимлари иштирок этишди.

Бутун мамлакатимиз бўйлаб ҳамжиҳатликда “Яшил макон” умуммиллий лойиҳаси доирасида ўтказилаётган дарахт экиш бўйича “долзарб 40 кунлик”да туманимиз ҳудудларига экилаётган мевали, манзарали дарахтлар, гуллар кўчатлари вақт ўтиб, чор-атрофга кўрк бағишлаш бирга, бизни ўраб турган атмосфера ҳавосини ҳам тозалайди. Улар карбонат ангидридни биз нафас оладиган кислородга айлантиради, ҳаво мўътадиллигини таъминлайди, жазирама иссиқдан ҳимоялайди ва ширин-ширин мевалар ҳадя этади.

Шу маънода олиб қарайдиган бўлсак, 40-сонли мактаб атрофининг яшил макон ҳудуди кенгайтирилгани, 200 тупдан ортиқ дарахтлар кўчатлари ўтқазилгани жуда аҳамиятли бўлди.

Севара Исмоилова.