“БИЗ ЗЎРАВОНЛИККА ҚАРШИМИЗ!” ШИОРИ ОСТИДА АКЦИЯ ЎТКАЗИЛДИ

Бирлашган Миллатлар ташкилоти Бош Ассамблеясининг 1999 йил 17 декабрдаги резолюциясига кўра, 25 ноябрь – Халқаро аёлларга нисбатан зўравонликка барҳам бериш куни сифатида белгиланган.

Шу муносабат билан бутун дунёда, шу жумладан мамлакатимизда ҳам нафақат белгиланган сана, балки йил давомида “Биз зўравонликка қаршимиз!” шиори остида турли хил тадбирлар, давра суҳбатлари, акциялар ўтказилади.

Қолаверса, сўнгги йилларда мамлакатимизда хотин-қизларнинг ижтимоий-сиёсий фаоллигини янада ошириш, ҳуқуқ ва қонуний манфаатларига сўзсиз риоя қилинишини таъминлаш, оналик ва болаликни ҳар томонлама қўллаб-қувватлаш, оила институтини мустаҳкамлаш борасида кенг кўламли ишларни амалга оширишга қаратилган меъёрий ҳужжатлар қабул қилинган.

Ўзбекистон Республикаси Конституциясининг 46-моддасида “Хотин-қизлар ва эркаклар тенг ҳуқуқлидирлар”, дея эътироф этилишининг ўзи мамлакатимизда ҳар бир аёл-қиз жамиятнинг барча соҳаларида фаол иштирок этиши учун ҳуқуқий кафолат ҳисобланади. Бундан ташқари, хотин-қизларни қўллаб-қувватлашга қаратилган Президент Фармонлари, айниқса, Ўзбекистон Республикасининг 2019 йил 2 сентябрдаги “Хотин-қизларни тазйиқ ва зўравонликдан ҳимоя қилиш тўғрисида”ги Қонуни мамлакатимизда гендер тенгликни таъминлашнинг яққол ифодасидир.

Жорий йилнинг 21 ноябрь куни Президент таълим муассасалари агентлиги тизимидаги Амударё туман ихтисослаштирилган мактабининг фаоллар залида 25 ноябрь – Халқаро аёлларга нисбатан зўравонликка барҳам бериш куни муносабати билан “Биз зўравонликка қаршимиз!” шиори остида акция ташкил этилди. Унда мактаб педагогика жамоаси, мактаб ўқувчилари, Амударё туман Ички ишлар бўлими ходимлари, Ички ишлар бўлимининг хотин-қизлар масалалари бўйича катта инспектори Инобат Ўразматова, тергов бўлими терговчиси Дилафруз Шарипова, иснпектор-психолог Кумушой Бекманова, Оила ва хотин-қизлар давлат қўмитаси ҳузуридаги аёлларни реабилитация қилиш ва мослаштириш Республика марказининг Қорақалпоғистон Республикаси бўйича намунали туманлараро маркази директори Гавҳар Чимбойчиевалар иштирок этишди.

Тадбирни Президент таълим агентлиги тизимидаги Амударё туман ихтисослаштирилган мактабининг маънавий-маърифий масалалар бўйича директор ўринбосари, Халқ депутатлари Амударё туман Кенгаши депутати Муяссар Раҳматуллаева очди ва ўтказилаётган акциянинг мазмун-моҳияти, зўравонликка қарши мамлакатимизда амалга оширилаётган кенг кўламли ишлар хусусида батафсил тўхталди.

Шундан сўнг, Амударё туман Ички ишлар бўлими хотин-қизлар масаласи бўйича катта инспектор. лейтенат Инобат Ўразматова, тергов бўлими терговчиси Дилафрўз Шарифовалар бугунги кунда хотин-қизларни зўравонликдан ҳимоя қилиш борасида кенг кўламли ишлар амалга оширилаётгани, ушбу йўналишда бир қатор халқаро ҳужжатлар ратификация қилингани, мустақил Ўзбекистонимизда қандай вазиятда бўлмасин, у жамоат жойида, хилватда ёки оиладами, аёлни, болалар ва кексаларни, ҳар бир инсонни содир этиладиган жиноий зўравонликлардан ҳимоя қилиш механизми мустаҳкамлаб қўйилгани ҳақида батафсил сўз юритишиб, ҳаётий мисоллар орқали зўравонликка барҳам беришнинг халқаро миқёсда тан олинган ҳуқуқий асослари хусусида маълумотлар бердилар.

Тадбир давомида ўқувчи-ёшлар ушбу йўналишда ўзларини қизиқтирган саволлар билан мурожаат қилдилар. Барча саволларга масъул мутахассислар батафсил жавоблар беришди.

Бўлиб ўтган “Биз зўравонликка қаршимиз!” акцияси жамиятда ҳуқуқий онг ва ҳуқуқий маданиятни юксалтириш, тазйиқ ва зўравонликка доир муросасизлик муҳитини яратиш бўйича ўқувчи-ёшларнинг ҳуқуқий билимларини ошириш, ушбу йўналишдаги саъй-ҳаракатларни доимий равишда изчил амалга оширишга интилиш ва қизиқишлари, бурч ва мажбуриятларини тўлақонли тушунган ҳолда ҳаракат қилишларида муҳим аҳамиятга эга бўлди.

Робия ЙЎЛДОШЕВА.