“Гендер зўравонликка қарши 16 кунлик фаол ҳаракатлар” тадбирлари ўтказилмоқда

Маълумки, мамлакатимизда жорий йилнинг 25 ноябрь куни старт берилган “Зўравонликка қарши биргаликда курашамиз” шиори остидаги “Гендер зўравонликка қарши 16 кунлик фаол ҳаракатлар” тадбирлари Республикамизнинг барча ҳудудларида ўтказилмоқда. 7 декабрь куни шундай тадбирлардан бири Амударё туманидаги 82-сонли умумтаълим мактаби биносида бўлиб ўтди.

Тадбирда туман ҳокими ўринбосари, Оила ва хотин-қизлар бўлими бошлиғи Гўзал Сабурова, Ўзбекистон Республикаси Вазирлар Маҳкамаси Дин ишлари бўйича қўмитаси Қорақалпоғистон Республикаси ҳудудий бошқармаси хотин-қизлар масалалари бўйича мутахассислари Байрамгул Айимбетова, Худайберган Низаматов, Аёлларни реабилитация қилиш ва мослаштириш Қорақалпоғистон Республикаси Амударё туманлараро маркази директори Гавхар Чимбайчиева, хотин-қизлар масалалари бўйича инспектор, подполковник Инобат Ўразматова, Фуқаролик ташаббусларини қўллаб-қувватлаш маркази директори Гулсара Жоллибекова, туман ҳокимлигининг дин ишлари бўйича мутахассиси Музаффар Шеримбетов ҳамда депутатлар, давлат ва нодавлат ташкилотлар вакиллари, ҳуқуқшунослар, ўқитувчилар, оммавий ахборот воситалари ходимлари иштирок этишди.

Йиғилишни туман ҳокимининг ўринбосари Гўзал Сабурова очиб берди ҳамда гендер зўравонлик географик, ижтимоий ёки иқтисодий чегараларни билмайдиган глобал муаммо экуанлигини, Бирлашган Миллатлар Ташкилотининг маълумотларига кўра, 15 ёшдан ошган ҳар учинчи аёл ҳаёти давомида камида бир марта бўлса ҳам жисмоний ёки жинсий зўравонликка учрашини айтиб ўтди.

Шундан сўнг, Гулсара Жоллибекова Ўзбекистонда кейинги йилларда гендер зўравонлигининг олдини олиш ва унга қарши курашнинг ташкилий-ҳуқуқий асослари янада мустаҳкамланиб, айниқса, хотин-қизларга нисбатан зўравонликнинг олдини олиш, бу ҳодиса жабрдийдаларини реабилитация қилиш бўйича аниқ чора-тадбирларга асосланган қатор саъй-ҳаракатлар амалга ошириб келинаётганлигини таъкидлади. Бу жараёнларда нодавлат нотижорат ташкилотлари алоҳида ташаббускорлик ва фаоллик билан иштирок этишаётгани қувонарли ҳол эканлигини айтиб ўтди.

Дарҳақиқат, “Гендер зўравонликка қарши 16 кунлик фаол ҳаракатлар” кампанияси доирасида нодавлат жамоат ташкилотлари томонидан кўплаб самарали тадбирлар амалга оширилмоқда. Жумладан, туманимизда ҳам “Зўравонликни ва камситилишини олдини олишга ҳар биримиз масъулмиз” мавзуида учрашувлар, “Хотин-қизларни  тазйиқ ва зўравонликдан ҳимоя қилиш  туғрисида”, “Хотин-қизлар ва эркаклар  учун тенг  ҳуқуқ ҳамда имкониятлар  кафолатлари  туғрисида”ги қонунларни биласизми?” мавзуларида давра суҳбатлари ўтказилмоқда.

Йиғилишда Байрамгул Айимбетова бундай тадбирларни ўтказишдан мақсад, юртимизда турли шакллардаги зўравонликларнинг олдини олиш ва зўравонликдан ҳимоя қилиш тўғрисидаги қонун ҳужжатлари ижросини таъминлаш ва соҳага оид қонунчиликни такомиллаштириш юзасидан давлат ташкилотлари ва фуқаролик жамияти институтларининг ҳамкорлигини кучайтириш бўйича ўзаро тажриба алмашишдан иборат эканини таъкидлади.

Шунингдек, давра суҳбатида сўз олган Инобат Ўразматова ва бошқалар кейинги вақтларда мамлакатимизда гендер тенглигини таъминлаш борасида амалга оширилаётган ислоҳотларнинг самаралари ҳақида алоҳида тўхталди.

Давра суҳбатида, ўз ташкилотлари фаолияти мисолида хотин-қизларнинг ҳуқуқ ва манфаатларини ҳимоя қилиш ва таъминлаш, гендер зўравонликнинг турли шаклларига қарши курашиш, оғир ижтимоий аҳволга тушиб қолган аёлларга ижтимоий-ҳуқуқий, психологик ёрдам кўрсатиш, уларни манзилли қўллаб-қувватлаш бўйича амалга оширилаётган ишлар, бу борада эришилаётган ютуқлар ва мавжуд муаммолар ҳақида атрофлича фикр юритилди. Шунингдек, зўравонлик жабрланувчиларини ҳимоя қилишга қаратилган қонун ҳужжатларининг ижроси, жамиятда гендер зўравонликка барҳам беришга тўсқинлик қилаётган асосий муаммолар, хотин-қизларнинг ҳуқуқий ҳимояси бўйича қонунчиликдаги бўшлиқлар ва уларни бартараф этиш каби қатор мавзулар ҳам кенг муҳокама қилинди ва қатор таклиф ҳамда тавсиялар билдирилди.

Туман ҳокимлигининг Ахборот хизмати