“КАМОЛОТ” УЙЛАРИ”– ЁШ ОИЛАЛАРНИ ҚЎЛЛАБ-ҚУВВАТЛАШГА ХИЗМАТ ҚИЛАДИ
Мамлакатимизда ёш оилаларни қўллаб-қувватлашга, уларнинг фаровон яшашларига кўмаклашишга алоҳида эътибор қаратилмоқда. Уларни соғлом турмуш тарзи ҳукмрон бўлган аҳил ва мустаҳкам оилалар сафига қўшилишига кенг йўл очилмоқда. Ёш оилаларнинг уй-жой қуриши учун ер участкалари ажратилиб, имтиёзли кредитлар берилаяпти.
Жорий йилда мамлакатимиз бўйлаб қурилиши бошланган "Камолот” уйлари” ҳам ёш оилаларга кўрсатилаётган ғамхўрликларнинг узвий давомидир.
Мамлакатимиз Президентининг 2014 йил 6 февралдаги "Ўзбекистон Республикасида ёшларга оид Давлат сиёсатини амалга оширишга қаратилган қўшимча чора-тадбирлар тўғрисида”ги 2124-сонли қарори ижросини таъминлаш мақсадида туманда "Ер ажратиш, эгалик қилиш, фойдаланишга ва ижарага бериш масалаларини кўриб чиқувчи доимий комиссиянинг 2014 йил 25 мартдаги 177-сонли қарорига мувофиқ ёш оилаларни қўллаб-қувватлаш мақсадида "Камолот” уйлари” барпо этиш учун Манғит шаҳрининг "Гулзор” маҳалласи ҳудудидан 3 гектар ер майдони ажратилган ва 4 қаватли, 48 хонадонга мўлжалланган уй-жой қурилиши бошлаб юборилган эди.
Мазкур уй-жой 2015 йилнинг март ойида битказилиши режалаштирилган бўлиб, уларни ёш оилаларга бериш тартиби Ўзбекистон Республикаси Вазирлар Маҳкамасининг 2014 йил 8 сентябрдаги "Мамлакатнинг ижтимоий ҳаётида фаол қатнашаётган ёш оилаларни уй-жой билан таъминлашни янада қўллаб-қувватлаш чора-тадбирлари тўғрисида”ги Вазирлар Маҳкамасининг 250-сонли қарорига мувофиқ "Камолот” уйлари”дан квартиралар ажратилиш тартибига мувофиқ амалга оширилади.
Белгиланган тартибга кўра уй-жойларга:
– биринчи марта расмий никоҳдан ўтган;
– ариза берилган пайтда эр-хотиннинг ҳар бирининг ёши 30 дан ошмаган;
– фан, санъат, адабиёт, спорт ва бошқа соҳаларда юксак натижаларга эришган ёш оилалар эга бўлиши мумкин.
Ушбу талаблардан келиб чиқиб, "Камолот” ЁИҲ туман Кенгаши раиси номига ариза берилади. Берилган ариза 2 иш куни муддатида Қорақалпоғистон Республикаси ҳудудий комиссиясига етказилади.
Ҳудудий комиссия ҳужжатлари қабул қилинган аризачининг яшаш шароитларини, кредитни қайтаришга лаёқатлилигини (ариза берувчининг оила аъзоларининг даромадини) ўрганади. Ўрганиш натижалари бўйича текшириш далолатномаси тузади. Текшириш далолатномаси илова қилинган ҳужжатлар уч кун муддатда "Камолот” ЁИҲ Марказий Кенгашига юборилади. Марказий Кенгаш ҳудудий комиссиялар томонидан тақдим этилган хулоса ва ҳужжатларини кўриб чиқиб, ёш оиланинг уй-жой шароитларини яхшилашга муҳтож сифатида тавсиянома беради.
Тавсиянома эса тижорат банклари томонидан имтиёзли ипотека кредитини олишга шартнома тузиш учун асос ҳисобланади. Тавсиянома олган ёш оилалар тижорат банклари томонидан 5 йиллик имтиёзли давр билан, дастлабки бадалсиз, Ўзбекистон Республикаси Марказий банкининг қайта молиялаштириш ставкасига тенг фоизли ставка билан 20 йил муддатга бериладиган имтиёзли ипотека кредитларини олиш имкониятига эга бўлади.
Хулоса қилиб айтганда, қурилаётган, қурилиши режалаштирилаётган "Камолот” уйлари” ёш оилаларни қўллаб-қувватлашга, уй-жой билан таъминланишини яхшилашга хизмат қилади.
М.ЎРОЗБОЕВ,
"Камолот” ЁИҲ туман Кенгаши раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
