“УЧ АВЛОД УЧРАШУВИ” ТАДБИРИ ЎТКАЗИЛДИ

Юртимизда тинчликни, осойишталикни мустаҳкамлаш, аҳоли фаровонлигини, турмуши сифатини ошириш, уларнинг ўз ҳаётларидан рози бўлиб яшашларига эришиш борасида тизимли ишлар олиб борилмоқда. Айниқса кексаларни эъзозлаш, уларнинг юртимиз тараққиётига қўшган ҳиссаларини муносиб эътироф этиш, меҳнат фаолияти давомида тўплаган бой тажрибасидан ёш авлод тарбиясида унумли фойдаланиш борасида ибратли ишлар қилинаётир. Нуронийлар, меҳнатда бошқаларга ибрат бўлаётганлар ва ёш авлод вакилларини жамлайдиган “Уч авлод учрашуви” тадбирлари ҳам шу мақсадга хизмат қилади.

Анъанага айланиб бораётган бунингдек тадбирларда юртимизда инсон омилига юксак эътибор берилаётгани, жамиятимизнинг ҳар бир аъзосига ғамхўрлик, меҳр-оқибат кўрсатилаётгани, уларнинг орзу-ниятлари рўёбга чиқишига имконият яратилаётгани таъкидланмоқда, бугунгидек осуда, фаровон ҳаётнинг қадрига етиш лозимлиги тарғиб этилмоқда.

Шу йилнинг 16 январида Манғит шаҳрининг Беруний номли маҳалласида ҳам “Янги Ўзбекистонда эл азиз, инсон азиз” шиори остида “Уч авлод учрашуви” тадбири ўтказилди.

Тадбирга маҳалла ҳудудида истиқомат қилувчи меҳнат фахрийлари, турли соҳаларда меҳнат қилаётган фуқаролар ва фаол ёшлар иштирок этдилар.

Тадбирга ташриф буюрганлар маҳалла фуқаролар йиғини маъмурий биносига кириш қисмида маҳалла ҳунарманд ёшларининг меҳнати маҳсули намуналарининг кўргазмаси билан танишдилар. Шунингдек, маҳалла фуқаролар йиғини фаолияти, маҳалла ҳаётига доир фотосуратлар ҳам барчанинг диққатини ўзига жалб этди.

Айтиш жоизки, кейинги вақтларда ушбу маҳалла ҳудудида ҳам кўпгина ижобий ўзгаришлар бўлди. Жумладан 4 та кўчаларга асфальт ётқизилиб, йўлакчалар қурилди. Тунги ёритгичлар қўйилиб, одамларнинг тунги вақтларда ҳам бемалол ҳаракатланишларига шароит яратилди. Ҳудуддаги 31-сонли мактабга ўқувчиларнинг хавфсиз бориб-келишларини таъминлаш мақсадида мактаб олдидан ўтган улкан йўлга белгилар қўйилди. Савдо, маиший хизмат кўрсатиш шоҳобчалари сони ортди.

Тадбирда маҳалла фуқаролар йиғини раиси Муротбой Ҳайбуллаев бу ҳақда батафсил гапирди.

Уч авлод учрашувида маҳаллада истиқомат қилувчи меҳнат фахрийлари Озод Тажимуродов, Мавлонберган Тожибоев, Шукуржон Хўжамуродова, Малика Давлатбоева, Райма Ражабова, Зулхумор Файзуллаева, Дилором Ёқубовалар ёшларга ўзларининг ҳаёти ва меҳнат фаолияти ҳақида гапириб бердилар. Ёшларнинг камол топиши учун юртимизда яратилаётган имкониятларни қадрлаш, улардан унумли фойдаланиш лозимлигини таъкидладилар.

Шундан сўнг юрт тинчлиги, тараққиёти, ёш авлод таълим-тарбияси йўлида фидойи меҳнат қилган ва бугунги кунда ҳам маҳалладаги маданий-маърифий тадбирларда фаол қатнашиб келаётган фахрийларга ташаккурномалар тақдим этилди.

Нуронийлар ўзларига кўрсатилган эътибор учун миннатдорчилик билдирдилар. Тадбирда ёшлар кекса авлод вакилларининг ёшлик даврида кўрган қийинчиликлари, заҳматли меҳнат жараёни ва нуронийлик даврида ҳукуматимиз ва юртдошларимиз кўрсатаётган ҳурмат-эҳтиромидан хурсанд эканликларидан улкан ибрат олганликларини таъкидлашди.

Уч авлод вакилларини бирлаштирган тадбир барчада улкан таассуротлар қолдирди.

Ойгул РАЖАБОВА.