БЎЗ ЁП ОВУЛИДА “ОБОД МАҲАЛЛАМ” НОМЛИ ГРАНТ ЛОЙИҲАСИГА КЎРА ЎҚУВ-СЕМИНАР ЎТКАЗИЛДИ

Фуқаролар йиғинлари ҳузуридаги экология ва атроф-муҳитни муҳофаза қилиш, ободонлаштириш ва кўкаламзорлаштириш бўйича комиссиялар фаолияти самарадорлигини янада яхшилаш мақсадида соҳа мутахассислари иштирокида Бўз ёп овулида ўқув-семинар ўтказилди.

31 январь куни 10-сонли умумтаълим мактаби биносида бўлиб ўтган мазкур ўқув-семинарда “Маҳалла” хайрия жамоат фонди туман бўлинмаси раиси Баҳодир Болтабоев, туман Маҳалла ва нуронийларни қўллаб-қувватлаш бўлими етакчи мутахассиси Баҳриддин Тўрабоев, Экология ва атроф-муҳитни муҳофаза қилиш қўмитаси туман бўлими ходимлари ва Санитария-эпидемилогик осойишталик ва жамоат саломатлиги бўлими шифокорлари қатнашишди.

Шунингдек, йиғилишда Бўз ёп ва Хитой овуллари, ҳудуддаги бошқа фуқаролар йиғинлари раислари, ҳоким ёрдамчилари, экология ва атроф-муҳитни муҳофаза қилиш, ободонлаштириш ва кўкаламзорлаштириш бўйича комиссиялари раислари, фаоллари ҳам иштирок этишди.

Таъкидлаш жоизки, “Маҳалла” хайрия жамоат фонди туман бўлинмасининг “Обод маҳаллам” номли грант лойиҳаси иш режасига мувофиқ фуқаролар йиғинлари ҳузуридаги экология ва атроф-муҳитни муҳофаза қилиш, ободонлаштириш ва кўкаламзорлаштириш бўйича комиссиялар фаолияти самарадорлигини янада яхшилаш мақсадида турли тадбирлар ўтказилиб келинмоқда.

Ушбу лойиҳани амалга ошириш орқали атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари талаблари бузилишининг олдини олиш, уни аниқлаш ва чек қўйишга, табиатни муҳофаза қилиш фаолияти самарадорлигини оширишга ҳисса қўшиш каби мақсадлар кўзланган.

Лойиҳага кўра ҳудудларда шу мақсаддаги учрашувлар, давра суҳбатлари, танловлар ташкил қилинмоқда. Фуқароларнинг ўзини ўзи бошқариш органлари, тегишли ташкилотлар билан ҳамкорликда жамоатчилик экологик назорати амалга оширилмоқда, аҳолининг экологияга оид билимлари кенгайтирилмоқда. Шунингдек, ҳудудларни ободонлаштириш ва кўкаламзорлаштириш, атроф-муҳит муҳофазасига ҳисса қўшиш кабилар борасида таклиф ва тавсиялар берилиб борилмоқда.

Ўқув-семинар давомида грант лойиҳаси доирасида амалга оширилаётган шу каби ишлар тўғрисида батафсил маълумотлар бериб ўтилди. Шунингдек, атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари талаблари кенг тушунтирилди ҳамда масалага оид буклетлар тарқатилди.

Семинарда иштирок этган овул ва маҳаллалар фуқаролар йиғини масъуллари, фаоллари ёшларни табиатга эҳтиёткорона муносабатда бўлиш, табиий ресурсларни тежашга даъват қилиш, уларнинг экологияга оид билимларини оширишга доир тадбирларни мунтазам равишда ўтказиб бориш зарурлигини, бу муҳим аҳамият касб этишини айтиб ўтдилар. Шунингдек, бу борада ўзларини қизиқтирган саволлар юзасидан тегишли жавоблар ҳам олдилар.

Баҳор фасли яқинлашаётгани боис семинарда “Яшил макон” умумиллий дастури доирасида ҳудудда “Маҳалла боғи”ни яратиш, ушбу боғда иқлимга мос бўлган дарахтлар кўчатларини парваришлаш бўйича ҳам маслаҳат ва тавсиялар берилди.

Озода Худойберганова.