КИЙИМ – ИНСОН ЗИЙНАТИ

Кийим – инсон зийнати. У киши маънавияти, маданияти, диди ва дунёқарашининг ёрқин кўзгусидир. У инсонни иссиқ-совуқдан сақлайди ва кишига зийнат бўлиб хизмат қилади.

Ўзбек халқи ўзининг асрлар оша қадрланиб келаётган миллий либослари билан ҳам бутун дунёга довруқ таратган. Турли рангларда товланиб, кўзни қамаштирувчи атлас-у адраслар нозик хилқат вакилларининг кўркига кўрк қўшишда катта аҳамият касб этса, беқасам тўн, миллий дўппи ва белбоғ алп ўғлонларни мард, жасур ва довюрак, салобатли қилиб кўрсатади. Бугунги даврдаги глобаллашув либосларга ҳам маълум бир маънода ўз таъсирини ўтказгани ачинарлидир. Ғарбдан кириб келаётган ажнабий суратлар ва турли ёзувлар акс этган кийимларни кўриб, ёқа ушлайсан киши. Айниқса, айрим ўсмир йигитлар устидаги либослар ҳар қандай инсонни таажжубга солиши шубҳасиз.

Тафаккури тўғри шаклланмаган ёшлар орасида турли хил чет мамлакатларга тақлид қилишнинг авж олгани, оқибатда ўз миллийлигимизга путур етаётгани ачинарли ҳол, албатта. Айрим ёшларнинг кийиб юрган кийимлари ҳатто ҳеч қандай маданиятга тўғри келмайди.

Кийиниш маданияти борасида буюк мутафаккирлар ва алломалар ҳам ўз асарларида фикр-мулоҳазаларни баён этишган. Сўз мулкининг султони Алишер Навоий “Маҳбуб ул-қулуб” асарида: “Эркакларнинг ўзини кўз-кўз қилиш учун ясаниши хотинларнинг оройиш учун безаниши кабидир. Аммо бу каби безанмоқ ҳар иккаласи учун ҳам номуносиб, хусусан, эркаклар учун кўпроқ шармандаликдир”, дея таъкидлаб ўтган. Шунинг учун фарзанд тарбиялаб, вояга етказаётган оилаларнинг ўғил-қизлари тарбияси ва кийинишига бўлган эътибори муҳим аҳамиятга эга.

Р.ҲАБИБУЛЛАЕВ, "Ҳожи эшон бобо" жомеъ

масжиди имом-хатиби.