ҚИЛИЧБОЙ ОВУЛИДА СУМАЛАК САЙЛИ ЎТКАЗИЛДИ

Ўлкамизга фасллар келинчаги бўлган баҳор ташриф буюриши билан ёши улуғ онахонлар, кайвони аёллар сумалак сайлларини бошлаб юборишади. Сумалак сайли – Наврўз байрамининг узвий бир қисми, миллий ва умуминсоний қадриятларга эш бўлган тадбирдир. Сумалак Наврўзнинг шоҳ таоми ҳисобланиб, хушхўр ва тансиқ таом ҳисобланади.

Амударё туманидаги овул ва маҳаллаларда ҳам қадимдан бирдамлик, аҳиллик ҳиссини тарбиялаб келган сумалак сайллари бошлаб юборилди. Худди шундай тадбир Қиличбой овулида ҳам бўлиб ўтди.

Овулдаги 83-сонли мактабда бўлиб ўтган ушбу сумалак сайлида мактаб жамоаси билан бирга овул аёл-қизлари ҳам фаол иштирок этдилар. Эрта тонгдан мактаб ҳовлисига катта дошқозонлар келтирилди. Ўтинлар ғамланиб, сувлар келтирилди, қизлар ва келинчаклар текис униб чиққан буғдой майсаларини кели-келисопларда туйиб, онахонларга етказиб бериб туришди.

Уларга буғдойни маромига етказиб ундирган мактабдаги ёши катта аёллардан бири бўлган Сайёра опа Йўлдошева бошчилик қилди. Қозон қайнагунича Қиличбой овул фуқаролар йиғини хотин-қизлар фаоли Соҳиба Собирова ҳамда мактаб директори Дилафрўз Исмоиловадан бошлаб, маънавият ва маърифат масалалари бўйича директор ўринбосари Аноргул Холимбетова, ўқув ишлари бўйича директор ўринбосари Муҳайё Ўрозметова, ўқитувчилар Муқаддас Оллаберганова, Гуландом Шомуродова ҳамда мактабнинг бошқа ўқитувчилари, ўқувчилар барча-барчаси фаол қатнашишди. Қозонга буғдой шираси қуйилиб, бир маромда қайнай бошлагач, баҳорий кайфият бошланган сумалак сайли ўйин-кулгуларга уланиб кетди.

Биз биламизки, асрлар оша яшаб келаётган сумалак сайли каби миллий қадрият ва анъаналаримиз халқимизнинг қадим тарихи ва руҳияти билан чамбарчас боғлиқ. Ушбу гўзал удумларда табиатдаги ўзгаришлар, фасллар алмашинуви, эътиқодий қарашлар ва аждодларимиз кўнглидан кечувчи ҳис-туйғулар ўзининг ифодасини топган. Ҳозиргидек қадимда ҳам сумалакни асосан аёллар тайёрлашган. Сумалак тайёрлашни ўзига хос маросим қилиб ўтказишган. Қозон атрофида суҳбатлар қурилиб, ҳикоялар, эртаклар, ривоятлар ва латифалар айтилган.

Шу куни қиличбойликлар ҳам таом тайёр бўлгунча қўшиқлар куйлаб, рақсларга тушишди, лапарлар айтиб хурсандчилик қилишди. Ёши улуғлардан турли ривоятлар тинглаб, эрталабгача бўлган вақтларини мазмунли ўтказишди. Қўни-қўшнилар билан биргаликда таом пишириб, бир қозонда тайёрланган овқатни ҳаммалари баҳам кўришди.

Сайилга келганлар учун мактабда бетакрор истеъдод соҳибаси, жўшқин ва сермазмун ижоткор, ҳамиша порлоқ юлдуз Зулфия Исроилова таваллудининг 108 йиллигига бағишланган тадбир ҳам ташкил этилди. Атоқли шоира таваллудига бағишланган "Ҳамиша порлоқ юлдуз" номли ушбу давра суҳбати ва адабий-бадиий кеча давомида мактабнинг ўқитувчи ва ўқувчилари шоира ҳаёти ва ижоди ҳақида сўзлаб бердилар. Ўқувчилар шоиранинг шеърларидан намуналарни чиройли, ифодали айтиб, барчага янада кўтаринки кайфият бахш этишди. Мазмунли ўтган тадбир ҳаммага жуда манзур бўлди.

Мактаб ҳовлисида ташкил этилган сумалак сайли эсда қоларли, таассуротларга бой тарзда ўтди. Сумалак кўпчиликнинг меҳнати билан маромига етиб, жуда ширин бўлиб пишди.

Озода Худойберганова.