САЙЁР СУДДА ПРОБАЦИЯ ҲИСОБИДАГИ 7 НАФАР ШАХС МУДДАТИДАН ИЛГАРИ ЖАЗОДАН ОЗОД ЭТИЛДИ

Дурунки маҳалла фуқаролар йиғини маъмурий биносида Жиноят ишлари бўйича туман суди томонидан сайёр суд ўтказилди.

Сайёр судда Жиноят ишлари бўйича туман Амударё туман суди, Прокуратура, Ички ишлар органлари Пробация гуруҳи масъуллари қатнашишди. Ушбу сайёр суд мажлисида муайян ҳуқуқдан маҳрум қилиш, ахлоқ тузатиш ишлари, озодликни чеклаш жазоларига суд томонидан ҳукм қилинган маҳкумларни Ўзбекистон Республикаси Жиноят Кодекси талаблари асосида жазони ўташдан муддатидан илгари озод қилиш тўғрисидаги 7 та тақдимномалар кўриб чиқилди. Натижада, ҳақиқатда меҳнатга ҳалол муносабатда бўлган ва жазо ўташнинг тартиб қоидаларига риоя қилиб, тузалиш йўлига ўтган 7 нафар маҳкум Жиноят Кодексининг инсонпарварлик ва одиллик тамойилларига асосан жазони ўташдан муддатидан илгари шартли равишда озод қилинди.

Судда иши кўрилаётган маҳкумларнинг барчаси туман фуқароси эканлиги, улар Ўзбекистон Республикаси Жиноят Кодексининг тегишли моддаларига кўра жазога тортилгани, ҳозирги кунда белгиланган жазонинг маълум қисмини ўтагани тўғрисида маълумот берилди. Маълум бўлишича, ушбу маҳкумларнинг 1 нафари Ўзбекистон Республикаси Жиноят Кодексининг 25-, 169-моддаларига кўра жазога тортилган. У савдо фаолияти билан шуғулланувчи масъулияти чекланган жамиятларидан бирига ишчи сифатида қабул қилинган ва ҳозирги кунга қадар ишлаб келмоқда. Маҳкум жазони ўташ тартиб ва қоидаларига тўлиқ амал қилмоқда. Шу сабабли унинг ахлоқ тузатиш ишлари жазосининг ўталмаган муддатидан илгари шартли равишда озод қилиш масаласини кўриб чиқишлик учун судга тақдимнома киритилган.

Ундан ташқари, Жиноят Кодексининг 122-моддаси 1-қисми билан 1 йил муддатга аҳлоқ тузатиш ишлари жазосига судланган яна бир шахс ҳам оилавий корхонага ишчи бўлиб қабул қилингани, ҳозирги кунга қадар ишлаб келаётгани, жазони ўташ даврида ўзининг жиноий қилмишларини тўлиқ англаб етиб, тузалиш йўлига қатьий ўтгани, белгиланган тартибларига амал қилаётгани сабабли муддатидан илгари шартли равишда озод қилиш масаласини кўриб чиқиш учун судга тақдимнома юборилган. Шунингдек, Кодекснинг 105-моддаси билан 3 йилдан зиёд муддатга, 128-моддаси билан 1 йил муддатга, 266-моддаси билан 3 йил муддатга, 211-моддаси билан 2 йил муддатга, 118-моддаси билан 7 йил муддатга озодликдан маҳрум қилинган бошқа маҳкумларни ҳам Пробация назорати давомида муносиб хулқ-атворда бўлганлиги сабабли муддатидан илгари шартли равишда озод қилиш масаласини кўриб чиқишлик учун судга тақдимнома киритилган.

Суд иши давомида маҳкумларга тегишли ҳужжатлар бирма-бир ўрганилди, томонларнинг кўрсатмалари тингланиб, бир хулосага келинди. Жазо ўташ тартиб-қоидаларига амал қилиб, суд томонидан зиммасига юклатилган мажбуриятларни бажарган ва меҳнатга ҳалол муносабатда бўлганлиги учун 7 нафар маҳкум ўталмаган жазо муддатидан Ўзбекистон Республикаси Жиноят Кодексининг 73-моддасига асосан муддатидан илгари шартли равишда озод қилинди.

Ўзларига тегишли хулосалар чиқариб олган ушбу шахсларга зиммаларидаги мажбуриятлар яна бир бор тушунтирилди. Жазодан озод қилинганлар жиноятининг оқибатларини тўла англаб етганлигини, тузалиш йўлига ўтганлигини, эндиликда ўзларига берилган бу имкониятдан оқилона фойдаланишини айтиб, давлатимизга ва масъулларга миннатдорчилик билдиришди.

Бу каби тадбирлар пофилактик ишлар самарадорлигини ошириб, жиноят ва ҳуқуқбузарликларнинг барвақт олди олинишини таъминлайди.

А.Сафаров, Жиноят ишлари бўйича Амударё туман суди раиси.

Р. Искандаров, туман ИИБ Пробация гуруҳи катта инспектори.