11-СОНЛИ МАКТАБ ЖАМОАСИ ҲУДУД АҲОЛИСИ БИЛАН БИРГАЛИКДА НАВРЎЗ БАЙРАМИНИ НИШОНЛАДИ
Юртимизга файзу-тароват бахш этиб, Наврўзи олам ташриф буюрмоқда. Бу қутлуғ ва қадим байрамни бутун элимиз катта хурсандчилик билан қарши олмоқда. Ушбу байрам муносабати билан ҳудудларда, корхона-ташкилотлар ва таълим муассасаларида ҳам байрам тадбирлари бошлаб юборилди.
15 март куни Қипчоқ шаҳарчасидаги 11-сонли умумтаълим мактабида ҳам “Хуш келдинг, ўлкамга Наврўз” деб номланган катта тадбир ўтказилди. Мактаб директорининг маънавий-маърифий ишлар бўйича ўринбосари Қундузой Холмуродова бошчилигида ташкиллаштирилган ушбу байрам тадбири муносабати билан мактаб ҳовлиси ва фойеси байрамона безатилди. Ўқувчилар ўзлари ясаган, баҳор белгиси бўлган ранг-баранг гуллар ва шарлар ҳовлига янада файз бахш этди.
Шу куни эрта тонгдан мактаб ҳовлисига катта дошқозон ўрнатилиб, миллий таомларимиздан бири бўлган гўжа пиширишга ҳаракат бошланди. Мактаб психологи Дилноза Шомуродова ҳамда она тили ва адабиёт фани ўқитувчиси Эркиной Якубова бош-қош бўлган бу таом меҳмонлар келгунича тайёр бўлди.
Байрамга ўқитувчи ва ўқувчилар, уларнинг ота-оналари, фахрий устозлар, шаҳарча аҳолиси ташриф буюрди. Тадбир меҳмонларини ҳудуддаги 21-сонли Болалар мусиқа ва санъат мактабининг оркестр жамоаси баҳорий куйлар билан қарши олишди. Меҳмонлар баҳорий ва миллий таомлар билан безатилган дастурхонга таклиф этилди.
Байрам тадбирини мактабнинг ижодий-маданий масалалар бўйича тарғиботчиси Мунира Камолова олиб борди. Сўзга чиққанлар барчани Наврўз айёми билан муборакбод этишди. Шунингдек, халқимиз орасида асрлар давомида катта шоду-хуррамлик билан нишонланиб келаётган айёмнинг шукуҳи ўзгача эканлигини таъкидлашди. Мактабда амалга оширилаётган эзгу ишлар, эришилаётган ютуқларни ҳам тилга олиб ўтишди.
Тадбирда мактабнинг бошланғич ва юқори синф ўқувчилари, ҳудуддаги 2-сонли мактабгача таълим ташкилоти тарбияланувчилари, 21-сонли Болалар санъат ва мусиқа мактаби ҳаваскор-ёшлари томонидан катта мусиқий дастур намойиш этилди. Байрам иштирокчилари ўзларининг баҳор ва Наврўз ҳақидаги шеърлари, дилтортар куй-наволари ҳамда самимий табриклари билан меҳмонларни хушнуд этдилар. Куй-қўшиқлар рақсларга уланиб кетди. Мактабнинг ўқувчи-қизлари ўзлари кийиб келган миллий атлас ва адрас либосларида, йигитлар эса ўзларига ярашган дўппилар, оқ яктагу-қийиқчалар, беқасам чопонларда рақслар ижро этиб, байрамга алоҳида шукуҳ, кўтаринки кайфият бағишлашди. Дастурдан ўрин олган ўқувчилар иштирокидаги лапарлар, миллий ўйинлар ҳамда умрбоқий урф-одатларимиз акс этган саҳна кўринишлари барчага манзур бўлди.
Тадбир давомида мактабнинг ўқувчи ва ўқитувчилари томонидан безатилган байрамона дастурхондаги миллий таомлар татиб кўрилди. Меҳмонларга шу ернинг ўзида ҳамжиҳатликда тайёрланган миллий таом гўжа ҳам тортилди. Ёшу-қари хурсандчиликда, тинчлик-омонликда қарши олинаётган ушбу кунларга шукроналар айтиб, элу-юртга осойишталик, қут-барака тилашди. Наврўзнинг инсонларни ҳамжиҳатлик, бирдамликка чорловчи эзгу сифатлари ҳақида сўз юритишди.
Наврўз ана шундай улуғвор ва кўтаринки руҳда ўтадиган севимли байрам. Унинг ташрифи каттаю кичикка бирдек хурсандчилик улашади. Байрамга ташриф буюрган меҳмонлар, ўқитувчилар ва ўқувчилар юз-кўзида баҳорий кайфият уфуриб, кўнгиллар билан бирга чеҳралар ҳам ёшаргандек бўлди.
Озода Худойберганова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
