ЙЎЛЛАРДА ҚОИДАБУЗАРЛИКЛАРГА ҚАРШИ КУРАШНИНГ ЯНГИ ТИЗИМИ ЖОРИЙ ЭТИЛДИ

Мамлакатимизда автотранспорт воситаларини бошқараётган ҳайдовчиларнинг йўл ҳаракати қоидаларига амал қилмай, тезликни меъёрдан ошириши ёки йўл белгиларига бўйсунмаслиги оқибатида йўл-транспорт ҳодисалари тобора кўпаймоқда. Бунинг оқибатида беайб инсонларнинг жабр кўраётгани эса жуда ачинарли.

Юртимиз ҳудудларида 2022 йилда 2356 нафар фуқаролар йўл-транспорт ҳодисалари оқибатида вафот этган. Уларнинг орасида болалар, ҳатто гўдаклар ҳам бор. Бунингдек ҳолатларнинг камайишига эришиш мақсадида Ўзбекистон Республикаси Ички ишлар вазири ўринбосарининг фармойишига кўра йўл-транспорт ҳодисаларининг олдини олишга синов тариқасида янги тизим – “Маҳаллабай” тизими жорий этилмоқда. Ҳудудларда йўл-транспорт ҳодисаларининг барвақт олдини олиш, йўл ҳаракати хавфсизлигини таъминлаш ва қоидабузарликларга қарши кураш самарадорлигини ошириш мақсадида жорий этилаётган ушбу янги тизимда йўл патруль хизмати ходимлари ҳудуддаги криминоген вазият, транспорт воситалари сони, аҳоли сони, автомобиль йўлларининг узунлиги, транспорт воситаларининг оқими, ижтимоий объектлар сонига қараб бириктирилади ва фаолияти доимий назорат қилиб борилади.

Амударё тумани ҳокимлиги мажлислар залида ҳудудларда йўл-транспорт ҳодисаларининг барвақт олдини олиш, йўл ҳаракати хавфсизлигини таъминлаш ва қоидабузарликларга қарши курашиш бўйича “Маҳаллабай” ишлаш тизими жорий этилаётганлиги муносабати билан йиғилиш ўтказилди.

Йиғилишда туман ҳокими Султонбой Йўлдошев, Қорақалпоғистон Ички ишлар вазирлиги йўл ҳаракати хавфсизлиги бошқармаси бошлиғи подполковник Салауат Казбеков, туман Ички ишлар бўлими бошлиғи Жамоладдин Юсупов, бўлим йўл-патрул хизмати ходимлари, профилактика инспекторлари, маҳалла фуқаролар йиғинлари раислари, ҳуқуқни муҳофаза қилиш идоралари вакиллари қатнашдилар.

Йиғилишни туман ҳокими Султонбой Йўлдошев очди ва кун тартибида кўрилаётган масанинг муҳим аҳамиятга эгалигини таъкидлади.

Шундан сўнг Қорақалпоғистон Республикаси Ички ишлар вазирлиги йўл ҳаракати хавфсизлиги бошқармаси бошлиғи, подполковник Салауат Казбеков сўзга чиқиб, йўл-транспорт ҳодисаларининг барвақт олдини олиш, йўл ҳаракати хавфсизлигини таъминлаш ва қоидабузарликларга қарши курашиш бўйича жорий этилаётган янги тизим бўйича кенг тушунтириш берди.

Йиғилишда ҳудудларга биркитилган 10 нафар йўл-патрул хизмати ходимларга юкланадиган вазифалар хусусида тўлиқ маълумотлар берилди. Маҳаллалардаги криминоген вазиятни барқарорлаштириш, йўл инфратузилмаси аҳволини ўрганиш ва назорат қилиш, ижтимоий объектлардаги ҳаракат хавфсизлигини таъминлаш, ҳудудлар бўйича ўз вақтида профилактик тадбирларни ташкиллаштириш, ҳайдовчиларни тайёрлашни назорат қилишнинг синов тариқасида жорий этилаётганлиги – йўл-транспорт ҳодисалари ва улар оқибатида инсонларнинг жабрланишининг олдини олишга қаратилганлиги баён этилди.

Йиғилишда кўрилган масалалар юзасидан тегишли қарорлар қабул қилинди.

О.РАЖАБОВА.