Ижтимоий ҳимояга муҳтож фуқароларнинг уйлари таъмирлаб, яшашга яроқсиз ҳолга келиб қолганлари қайтадан қуриб берилмоқда

Ўзбекистон Республикаси Вазирлар Маҳкамасининг 2023 йил 2 февраль кунги “Қорақалпоғистон Республикасида аҳоли учун муносиб турмуш шароитларини яратиш ва маҳаллалар инфратузилмасини янада яхшилаш чора-тадбирлари тўғрисида” ги қарорига асосан, оғир турмуш шароитидаги оилаларга тегишли уйларни таъмирлаш, том қисмини ёпиш, ҳамда яшаш учун яроқсиз ва авария ҳолатидаги уйларни янгидан қуриш ишлари амалга оширилиши белгиланган.

Қарорга мувофиқ Амударё туманидаги жами 49 та овул ва маҳаллаларда жойлашган жами 1868 та хонадондан 1856 та уйнинг том қисми ёпиб берилади. Шунингдек, яшаш учун ва таъмирлаш учун яроқсиз бўлган 12 та уй қайтадан қурилади. Қолган 190 та уй эса тўлиқ таъмирлаб берилади.

 Ундан ташқари қарорга мувофиқ, Қорақалпоғистон Республикасининг жанубий туманлари ҳисобланган Амударё, Беруний, Элликқалъа ва Тўрткўл туманларидаги 2 минг километр тупроқ йўлларга қум-шағал ётқизиш ишлари олиб борилади.

Мазкур қарор ижросини таъминлаш мақсадида Амударё туманидаги барча хонадонлар тўлиқ хатловдан ўтказилиб, оилаларнинг ижтимоий-иқтисодий шароитлари ўрганилди. Ўрганишлар натижасида ушбу оилалар ҳақиқатдан ҳам ёрдамга муҳтож эканлиги аниқланди. Бугунги кунда туманда ушбу уйларни таъмирлаш ва қайта қуриш ишлари бошлаб юборилган.

Амударё туманининг Бўз ёп овул фуқаролар йиғинида истиқомат қилувчи Амат Базарбаев якка-ю, ёлғиз яшайди. Фуқаронинг уйига ташриф буюрганимизда шу нарсанинг гувоҳи бўлдикки, унинг уйи ҳақиқатдан ҳам яшашга яроқсиз аҳволга келиб қолган. Фуқаронинг уйи бугунги кунда “Гўна қалъа Манғит” масъулияти чекланган жамияти қурувчилари томонидан қайта қурилмоқда. 2 хонали замонавий услубда қуриб берилаётган уйининг қурилиш ишлари бошлаб юборилганидан у жуда ҳам мамнун бўлиб қурувчиларга ўзи ҳам ёрдам бермоқда.

Яна шундай ижтимоий ҳимояга муҳтож фуқаролардан бири Қизилчоли маҳалласида истиқомат қилувчи Насиба Сийтмамутова. У икки нафар фарзанди билан ёлғиз яшайди. Турмуш ўртоғининг вафотидан кейин ёлғиз она рўзғор юкини кўтаришга анча қийналиб қолган эди. Бунинг устига яшаш учун яроқсиз аҳволга келиб қолган эски уйнинг томидан чакка ўтиши, балоғат ёшига етиб қолган фарзандларининг моддий зарурати ёлғиз онани кеча-ю кундуз дала ишларидан бўшамай ёлланма ишчи бўлиб меҳнат қилишга мажбур қиларди. Биз ташриф буюрган пайтимизда уй эгаси мавсумий ишчи бўлиб ишлаётганлиги сабаб ўзи етиб келолмади. Президентимизнинг алоҳида ғамхўрлиги ва эътибори сабаб унинг уйи ҳам янгидан қуриб берилмоқда.

Қурилиш ишлари “Жумуртов тех таъмир сервис” масъулияти чекланган жамияти томонидан олиб борилмоқда. Қурувчиларнинг таъкидлашича, қурилиш ишлари июнь ойида ниҳоясига етказилиб, уй эгасига тантанали тарзда топширилади.

Албатта, бундай хайрли ишлар мазкур хонадон соҳибаси дилида эзгулик чироғини янада равшан этиб, унинг ёғдуси яна бир қатор хайрли юмушларга туртки беради. Зеро, эзгуликнинг жавоби ҳам эзгуликдир.

Туман ҳокимлигининг Ахборот хизмати.