ХАЛҚАРО БОЛАЛАРНИ ҲИМОЯ ҚИЛИШ КУНИ МУНОСАБАТИ БИЛАН “БОЛАЛАРГА БЕРИНГ ДУНЁНИ!” ДЕБ НОМЛАНГАН БАЙРАМ ТАДБИРИ ЎТКАЗИЛДИ
Инсоният давомчилари, келажак эгалари бўлган болажонлар ҳар бир оиланинг қувончи. Уларнинг самимий табассумидан олам ёшаради. Болажонлар орзиқиб кутадиган 1 июнь – Халқаро болаларни ҳимоя қилиш кунида бутун дунё болалар шодлиги, беғубор кулгулари билан тўлиб, янада яшнаб кетади. Болажон халқимиз шу кунги байрамни кўнгилочар масканлар, истироҳат боғларида ўз фарзандлари билан нишонлашади ва уларга байрамона кайфият, кўтаринки руҳ улашишади.
Амударё туманидаги Маданият ва истироҳат боғида ҳам ушбу байрам муносабати билан “Болаларга беринг дунёни!” деб номланган катта тадбир ўтказилди.
1 июнь куни турфа гуллар, бахтли болаликни тараннум этувчи шиорлар ва бошқа байрамона безаклар билан безатилиб, янада файзга тўлган Истироҳат боғига туманимизнинг барча ҳудудларидан болажонлар ота-оналари билан бирга ташриф буюришди. Турли эртак ва мультфильм қаҳрамонларидан гуллар, ранг-баранг шарлар, ота-оналаридан турли ўйинчоқлар ва китоблар кўринишидаги совғаларни олган болажонлар хурсандчилиги янада чексиз бўлди. Айниқса, боғдаги турли кўргазмалар ташкил қилинган ҳудудлар катта ва кичик ёшдаги болалар билан тўлди. Ушбу кўргазмаларни кичкинтойлар катта қизиқиш билан томоша қилишди.
Боғнинг энг сўлим ерида жойлашган махсус томошагоҳда эса туман Маданият ва туризм бўлими томонидан тайёрланган байрам дастури намойиш этилди. Тадбирда туман ҳокими Султонбой Йўлдашев, ҳокми ўринбосарлари, секторлар раҳбарлари, Мактабгача ва мактаб таълими бўлими, “Баркамол авлод” болалар мактаби масъуллари, мактабгача таълим ташкилотлари раҳбарлари, тарбиячи ва тарбияланувчилар қатнашишди.
Тадбирни туман ҳокими Султанбой Йўлдашев очиб берди ва юрт келажаги бўлган болажонларни байрам билан табриклади. Шунингдек, тумандаги 207 минг 483 нафар аҳолидан 76 минг нафарини вояга етмаганлар ташкил қилишини, шундан 3-7 ёшдаги болалар сони 16 минг 841 нафарлиги, улардан 12237 нафари, яъни 72,7 фоизи ҳудуддаги 132 та давлат, давлат-хусусий шерикликдаги ва оилавий мактабгача таълим ташкилотларига қамраб олинганини, ушбу ташкилотларда кичкинтойлар учун яратилган шарт-шароитлар ҳақида сўзлади. Ёш авлодни асраб-авайлаш, ҳар томонлама баркамол қилиб вояга етказиш ҳар бир давлат, ҳар бир оила, ҳар бир ота-онанинг муқаддас бурчи эканлигини таъкидлаб ўтди.
Шундан сўнг, “Ёш томошабинлар театри” ҳаваскорлик тўгараги аъзолари мультфильм қаҳрамонлари кийимида саҳнага чиқиб, туман Маданият ва туризм бўлими ҳамда мактабгача таълим ташкилотлари билан ҳамкорликда тайёрланган концерт дастурини бошлашди. Саҳналаштирилган театр томошалари, болалар фольклор жамоасининг миллийликни тараннум этувчи куй-қўшиқлари ижро этилиб, болажонларга олам-олам қувонч бағишлади.
Тадбир давомида турли мусобақа ва беллашувларда қатнашиб, юқори натижаларга эришган болажонларнинг, мактабгача таълим ташкилотлари тарбиячиларининг ютуқлари эътироф этилди ҳамда уларга фахрий ёрлиқлар, совғалар топширилди. Кўрсатилган юксак эътибор, байрам совғалари, самимий тилаклар болажонларга янада кўпроқ қувонч бахш этди ва янги марралар, зафарлар сари руҳлантирди.
Байрам куни истироҳат боғида кичкинтойларга музқаймоқлар улашилди, ўрнатилган турли хилдаги аттракционлар ҳам беминнат хизмат қилди. Жаннатмакон, озод ва обод юртда туғилиб, эътибор ва меҳр оғушида улғаяётган жажжи болажонлар байрамда мириқиб ҳордиқ чиқаришди.
Ушбу байрамда болажонлар катталар ҳамроҳлигида Хотира майдонидаги туман ўлкашунослик ва тарих музейида Халқаро болаларни ҳимоя қилиш куни муносабати билан ташкил этилган “Ватан манзаралари” деб номланган расмлар кўргазмасига ҳам ташриф буюришди.
Кўргазмада тумандаги истеъдодли рассом Манғитбек Ерниёзов 10 тадан зиёд ҳамда 9-сонли ва 21-сонли болалар мусиқа ва санъат мактабининг “Ёш рассомлар” тўгараги аъзолари 30 тага яқин энг сара расмлари билан иштирок этишди. Истеъдодли рассом Манғитбек Ерниёзов кўргазмага тақдим этган асарларида юртимиздаги тарихий масканлар, сўлим табиатли гўшалари, қишлоқ хўжалиги ҳаётини акс эттирган. Шунингдек, элимиздаги санъат дарғалари, қишлоқ хўжалиги соҳаси фидойилари, қаҳрамонлари, нуроний кексалар портретларини характерли тарзда яратган.
Мусиқа ва санъат мактабларининг “Ёш рассомлар” тўгараги аъзолари эса атроф-муҳитни асраш, она табиатга бўлган муҳаббатини, ҳис-туйғуларини турфа рангларда жилолантиришга, кўрсатиб беришга ҳаракат қилган. Шунингдек, жажжи рассомлар ўзларининг ижод намуналарида юртдаги тинчлик, тараққиёт ва халқ фаровонлиги, буюк келажак ҳақидаги тушунчалари ва тасаввурларини ифодалашган.
Байрам муносабати билан ёш истеъдодларнинг ижодини ривожлантириш, уларнинг қобилиятларини юзага чиқариш, қўллаб-қувватлаш мақсадида ташкил этилган мазкур кўргазма нафақат кичкинтойларга, балки уларга ҳамроҳлик қилган ота-оналар, тарбиячи опаларга ҳам жуда манзур бўлди ва катта таассуротлар қолдирди.
Озода Худойберганова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
