ЎРТАҚАЛЪА ОВУЛИДА ЯНГИ ОИЛАВИЙ НОДАВЛАТ МТТ ФОЙДАЛАНИШГА ТОПШИРИЛДИ

Ўртақалъа овулида “Достонбек” номли янги оилавий нодавлат мактабгача таълим ташкилоти фойдаланишга топширилди.

1 июнь куни ушбу муассасанинг очилиш маросимига бағишланган тадбир бўлиб ўтди. Тадбирда туман ҳокими ўринбосарлари Гўзал Собурова, Маҳмуд Шерметовлар, Мактаб ва мактабгача таълим бўлими, фуқаролар йиғини масъуллари, овул фаоллари иштирок этишди. Тадбирда сўзга чиққан туман ҳокими ўринбосари Гўзал Собурова ва бошқалар овул аҳолисини, кичкинтойларни Халқаро болаларни ҳимоя қилиш куни ва янги муассаса ишга туширилгани билан табриклашди. Шунингдек, мамлакатимизда ва туманимизда мактабгача таълим ташкилотларининг фаолиятини такомиллаштириш, болаларни қамраб олиш борасида амалга оширилаётган кенг кўламли ишларга тўхталиб ўтишди.

Таъкидлаш лозимки, юртимизда барча соҳаларда бўлгани каби мактабгача таълим тизимига ҳам алоҳида эътибор қаратилмоқда. Мактабгача таълим муассасаларининг сони ва сифатининг йилдан-йилга ошиб бораётгани бунинг ёрқин мисолидир. Туманимизда ҳам 3-7 ёшдаги болалар сони 17 минг нафарга яқин. Ҳозирги кунда туманда 130 тадан зиёд давлат, давлат хусусий шерикликдаги ва оилавий нодавлат мактабгача таълим ташкилотлари фаолият юритмоқда. Ушбу мактабгача таълим ташкилотларига қамраб олинган болалар сони  эса 12 237  нафарни, яъни 72,7 фоизни ташкил қилади.

Маросимда туман ҳокимлиги, Мактабгача ва мактаб таълими бўлими, фуқаролар йиғини масъуллари, овул нуронийлари иштирокида махсус ленталар қирқилди. Шундан сўнг, тадбир иштирокчилари янгидан ишга туширилган икки қаватли мактабгача таълим ташкилоти биносида болажонлар учун яратилган шарт-шароитлар билан танишдилар.

Ташаббускор шу овулдаги якка тадбиркор Мавлуда Мадраҳимованинг ўз маблағи ва тижорат банкидан олинган кредит ҳисобидан бунёд этилган 50 ўринга мўлжалланган замонавий типдаги “Достонбек” оилавий нодавлат мактабгача таълим ташкилотининг фойдаланишга топширилиши овул кичкинтойлари учун ҳақиқий байрам туҳфаси бўлди. Ташкилот иш бошлаши натижасида ҳудуддаги 50 нафар болаларни мактабгача таълимга жалб қилиш ва 6 нафар ишсиз хотин-қизларни иш билан таъминлаш имконияти яратилди.

Шу куни муассасага 25 нафар кичкинтой қабул қилинди. Янги иш ўринлари ташкил қилиниб, 1 нафар олий маълумотли тарбиячи, 1 нафар ёрдамчи тарбиячи, ошпаз, ҳамширалар кичкинтойлар таълим-тарбиясига масъул қилиб қўйилди. Ташкилот раҳбари тарбияланувчилар сони 50 нафарга етказилганидан сўнг, муассасада яна янги иш ўринлари яратилишини, ишчилар олинишини маълум қилди. Тадбир иштирокчиларини келгусидаги режалари билан ҳам таништириб, ушбу масканда болажонлар учун рус, инглиз тиллари, мусиқа, рақс, санъат, моҳир қўллар ва бир қатор спорт тўгараклари машғулотлари мунтазам йўлга қўйилишини ҳам айтиб ўтди.

Ташкилотда тарбияланувчиларнинг таълим-тарбия олишлари учун барча шарт-шароитлар яратилган. Машғулотлар хоналари, дам олиш ва овқатланиш хоналари, ошхона, ҳамшира хонаси зарур жиҳозлар билан жиҳозланган. Бу ердаги болаларга мос тарзда безатилган кенг, ёруғ хоналар, ўйин майдончалари, ёзги айвончалар тадбир иштирокчиларига ва овул аҳолисига жуда манзур бўлди.

Байрам куни замонавий кўринишдаги ушбу маскан ишга туширилганидан, фарзандларининг барча шарт-шароитларга эга бўлган масканда таълим-тарбия олишига имконият яратилганидан овул аҳолиси ниҳоятда хурсанд бўлди.

О.Худойберганова