“Беш ташаббус олимпиадаси”нинг туман босқичи ғолиблари тақдирланди

Мамлакатимизда алоҳида иқтидорга эга қобилиятли ёшларни қўллаб-қувватлаш, уларнинг қизиқиш ва интилишларини  рағбатлантириш мақсадида Президентимиз ташаббуси билан амалга оширилаётган “Беш ташаббус олимпиадаси” доирасида маданият, санъат, спорт, китобхонлик, ахборот технологиялари йўналишлари бўйича турли хил танлов ва мусобақалар ташкил этилиб, мазкур тадбирларда миллионлаб ёшлар қамраб олинмоқда. 

Хусусан, ушбу танловда Амударё туманининг турли овул ва маҳаллаларида истиқомат қилувчи фаол ва қобилиятли ёшлар ҳам фаол  иштирок этишмоқда. Танловларда энг иқтидорлилар сараланиб, кейинги босқичларга йўлланмани қўлга киритишмоқда.
 21 июль куни “Беш ташаббус олимпиадаси”нинг туман босқичи ғолибларини тантанали тақдирлаш маросими бўлиб ўтди.

Унда туман ҳокими Султонбой Йўлдашев, секторлар раҳбарлари, ҳоким ўринбосари Маҳмуд Шерметов ҳамда “Беш ташаббус олимпиадаси”нинг 234 нафар туман босқичи ғолиблари, фаол ёшлар иштирок этдилар. Тақдирлаш маросимида туман ҳокими Султонбой Йўлдашев “Беш ташаббус олимпиадаси” доирасида ўтказилаётган танловлар ва спорт мусобақаларининг аҳамияти, ёшлар тарбиясида тутган ўрни ҳақида тўхталиб, олимпиаданинг туманда кўтанринки руҳда ўтказилганини, унда энг иқтидорли ёшлар иштирок этишганини, ёшларнинг ижтимоий фаоллиги тобора ошиб бораётганини қайд этиб ўтди. 

Тақдирлаш маросимида сўзга чиққанлар мамлакатимизда ёшлар учун яратилаётган кенг имкониятлар, уларнинг ўқиб билим олиши, касб-ҳунар эгаллаши учун яратилган шарт-шароитлар хусусида айтиб ўтишди.

Тақдирлаш маросимида спортнинг стол теннис, шашка, Workout, stritbol, енгил атлетика, кибер спорт, гимнастрада спорт турлари ва ёшлар рақс фестивали танлови ғолибларидан ташқари,  пара стол тенниси, пара шахмат, пара енгил атлетика, пара кибер спорт ғолиблари ҳам тақдирланди. 

Айтиш керакки, бўлиб ўтган танловларнинг туман босқичи ғолиблари Бахрам Байжанов, Раъно Болтабоева, Тамара Юсупова, Фарида Матризаева, Ўрингул Худайбергенова, Насиба Ешчанова Дилфуза Бабажанова каби ҳакамлар томонидан адолатли тарзда аниқланди.

 
Танловларнинг туман босқичида ғолибликни қўлга киритган ёшлар айни кунларда ҳудудий ва республика босқичларда ҳам фаол иштирок этишмоқда. 

Тақдирлаш маросимида ғолиб ва совриндор ёшлар туман ҳокими Султонбой Йўлдашев ва секторлар раҳбарлари томонидан 1-,2-,3-даражали дипломлар, эсдалик совғалари билан тақдирланишди. 

Мазкур мусобақалар ёшлар маънавиятини юксалтириш, ижтимоий фаоллигини ошириш, уларни илм-фан, спорт, санъат, маданият, китобхонлик, ахборот технологиялари соҳасига ошно қилиш каби мақсадларда ўтказилмоқда. 
Келажагимиз эгаларининг билим ва салоҳиятини ривожлантириш, дунёқарашларини кенгайтиришга қаратилган “Беш ташаббус олимпиадаси” доирасидаги танловлар ва спорт мусобақалари, маънавий-маърифий тадбирлар миллионлаб ёшларни бир эзгу мақсад – Янги Ўзбекистонда янгича фикрлаш, истиқлолни янада мустаҳкамлаш йўлида бирлаштиргани билан муҳим аҳамият касб этмоқда.

Туман ҳокимлигининг Ахборот хизмати