9 НАФАР МАҲКУМ МУДДАТИДАН ИЛГАРИ ЖАЗОДАН ОЗОД ЭТИЛДИ

Тақдир йўллари доимо равон бўлавермайди. Тирикликнинг ғанимат онларини яхшилик, эзгулик йўлида сарфлаганлар, ҳаётда ўзининг тўғри йўлини танлаганлар ва эзгу мақсади йўлида меҳнат қилганлар доимо эларо юзи ёруғ, эътибори юксак бўлади.

Афсуски, орамизда билиб-билмай жиноят қўчасига кириб қолаётганлар, эътиборсизлиги, ўз-ўзига масъулиятсизлиги туфайли бировнинг жиноятига шерик бўлиб қолаётганлар, жиноят содир этилаётганини била туриб ҳам бепарволик қиладиганлар, олдини олишга ё бу ҳақда тегишли идораларга хабар беришга интилмайдиганлар ҳам учраб туради.

Яқинда жиноят ишлари бўйича Амударё туман судининг Беруний маҳалла фуқаролар йиғини биносида бўлиб ўтган очиқ суд мажлисида билиб-билмай жиноят кўчасига кириб қолган, суд қарорига кўра, озодликдан маҳрум қилиш билан боғлиқ бўлмаган жазо тайинланган бироқ айбини тан олиб, тузалиш йўлига ўтган 9 нафар маҳкумларга туман Ички ишлар органлари Пробация гуруҳи томонидан киритилган тақдимномалар кўриб чиқилди.

Уларнинг бири нуфузли давлат идорасига қатор йиллар раҳбарлик қилган Рауф Сиддиқов (исм, фамилия ўзгартирилди) эди. Мазкур шахс Ўзбекистон Республикаси жиноят Кодексининг 205-яъни “Ҳокимият ёки мансаб ваколатини суиистеъмол қилиш” моддаси билан айбланган.

Албатта, улкан давлат идорасига раҳбарлик қилиш – масъулиятли иш. Бироқ бу масъулиятни ҳис қилмасдан, ўз истагича ишлаш Рауфга панд берди. Ахир шаҳар бедарвоза эмас. Буни яъни – лавозим мансаб эмас, масъулият эканлигини кеч тушунди, у йўл қўйган жинояти учун судланиб, 1 йил муддатга давлат органлари, корхона, муассаса, ташкилотларида моддий ва мансабдорлик вазифалари юклатилган лавозимларда ишлаш ҳуқуқидан маҳрум қилиниб, 2 йил муддатга озодликни чеклаш жазосига ҳукм қилинган эди.

Туман Ички ишлар органлари Пробация гуруҳида у жазо муддатининг 8 ой 10 кунини ўташ даврида жазони ўташ тартиб-қоидаларига амал қилиб, суд томонидан зиммасига юклатилган мажбуриятларни бажаргани ва меҳнатга ҳалол муносабатда бўлгани учун Ўзбекистон Республикаси Жиноят Кодексининг тегишли моддасига асосан суд қарорига мувофиқ муддатидан илгари шартли равишда озод қилинди.

Жиноят ишлари бўйича туман судининг Беруний маҳалла фуқаролар йиғини биносида бўлиб ўтган мазкур сайёр суд мажлисида Рауф Сиддиқовдан ташқари яна содир этган жинояти учун озодликдан маҳрум қилиш билан боғлиқ бўлмаган жазо тайинланган, туман Ички ишлар органлари Пробация гуруҳи ҳисобида турувчи 8 нафар маҳкумга Пробация гуруҳи томонидан киритилган тақдимномалар муҳокама этилди ва улар тайинланган озодликдан маҳрум қилиш билан боғлиқ бўлмаган жазодан муддатидан илгари озод этилди. Бунга уларнинг айбига иқрорлиги, содир этган қилмишидан пушаймон бўлиб, тузалиш йўлига ўтганлиги, жазо ўташ тартиб-қоидаларига амал қилиб, меҳнатга ҳалол муносабатда бўлганлиги асос бўлди, албатта.

Адашганнинг айби йўқ, қайтиб йўлини топса, дейди халқимиз. Аждодларимиздан мерос бўлиб келаётган бағрикенглик, кечиримлилик, инсон шаънини қадрлаш каби қадриятларимизнинг давлатимиз қонунларида ҳам акс этаётгани – шу куни туманимизнинг 9 нафар фуқароси ҳаётида янги саҳифа очди, 9 та оилага улкан шодлик олиб кирди.

Ойгул РАЖАБОВА.