Амударё телеканали таҳририяти ходимлари Ички ишлар бўлими билан ҳамкорликда назорат тадбирлари ўтказди

Ҳар бир ота-она фарзандларининг келажакда етук инсон бўлиб етишишини, оиласи, маҳалласи, Ватанига хизмат қилиб, эл дуосини олиб юришини, уларнинг камолидан фахрланиб яшашни истайди.

Ўсмир ёшларнинг келажаги учун яратилаётган шароитлар, қилинаётган ғамхўрликлар кун сайин кучаймоқда. Уларнинг улғайиб, улкан ютуқларни қўлга киритиб, мамлакат ижтимоий-сиёсий, маънавий-маърифий, спорт ва ҳарбий ватанпарварлик соҳаларида фаол меҳнат қилиб, ўз иқтидори, салоҳиятини намоён этишлари учун барча имкониятлар муҳайё.

Шу билан бир қаторда бизнинг юртимиздаги обод, фаровон, осойишта ҳаётни кўра олмайдиган, ҳали оқ-қорани ажратишга тайёр бўлмаган, ҳаётий тажрибага эга бўлмаган ўсмирларни ўзларининг ғаразли мақсадлари йўлида ҳамкорликка жалб этишга уринадиган ғайр мақсадли кучлар хавфи ҳам мавжудлиги афсуски, бор гап.

Ахборот коммуникацион технологияларнинг тез суръатлардаги тараққиёти натижасида ёшларга ғоявий таъсир ўтказиш имкониятлари кенгайишига олиб келаётгани айниқса хатарлидир. Ёт кучлар дин омилидан фойдаланиб, ўсмир-ёшларнинг онгини заҳарлашга уринмоқдалар. Ачинарлиси, бунингдек ҳаракатлар натижасида тўғри йўлдан тойиб кетаётганлар ҳам йўқ эмас.

Ўсмир-ёшлар маънавиятини юксалтириш, улар онгида Ватанга муҳаббат, миллий ва умуминсоний қадриятларга садоқат руҳини шакллантириш, уларнинг юксак маънавиятли бўлиб улғайишларига ҳисса қўшиш мақсадида Амударё телеканали “Юксак маънавиятли ва ахлоқли ёшлар юрт келажаги” номли грант лойиҳасини амалга оширмоқда.

Лойиҳа доирасида яқинда ёшларнинг турли диний-экстремистик, террорчилик оқимлар таъсирига тушиб қолишининг олдини олиш, уларни огоҳликка даъват қилиш мақсадида туман Ички ишлар бўлими вояга етмаганлар ва ёшлар масалалари бўйича фаолият юритаётган гуруҳ ходимлари билан Амударё телеканали ходимлари назорат тадбирини ўтказдилар.

Тадбирда туман Ички ишлар бўлими вояга етмаганлар ва ёшлар билан ишлаш гуруҳи катта инспектори, лейтенант Сирож Уснатдинов, катта инспектор, подполковник Улуғбек Қўчқоров, вояга етмаганлар масаласи бўйича инспектор, психолог, лейтенант Гумусай Бекманова, психолог, катта сержант Нодира Эрдошевалар иштирок этдилар.

Ҳамкор гуруҳ Манғит шаҳри Янгиобод кўчасидаги кўп қаватли уй ёнида фаолият юритаётган компьютер ўйинлари хонасида бўлишди. Бу ерда ўсмир-ёшларнинг қандай ўйинлар ўйнашаётганини кўришди. Уларга бўш вақтларини беҳуда ўтказмаслик, кўпроқ китоб ўқиш, таътил кунларида спорт билан шуғулланиб, жисмоний чиниқиш лозимлигини тушунтирдилар, огоҳликка чақирдилар.

Шунингдек Навоий номли маҳаллада жойлашган кафеда бўлишиб, ўсмир-ёшларга тунги вақтларда ота-оналари ёки уларнинг ўрнини босувчи шахслар иштирокисиз юрмаслик, кўчаларда номақбул ҳаракатлар қилмаслик лозимлиги тушунтирилди.

Ўрта қалъа овулининг Вахум аҳоли пунктида катта йўл бўйида фаолият юритаётган бильярдхона ҳам кўздан кечирилди. Бу ерга йиғилган ўсмир-ёшларга ҳам ёзги таътилни мазмунли ва мақсадли ўтказиш юзасидан тушунтириш ишлари олиб борилди.

Ҳамкор гуруҳ Дўрмандаги “Қалдирғоч” болалар ёзги дам олиш масканида ҳам бўлишиб, бу ерда иккинчи босқичда 100 нафар болалар кўнгилли дам олаётганини, улар табиат қўйнида сайр қилиб, китоб ўқиб, спорт билан, шунингдек, бадиий тўгаракларда адабиёт, санъат билан шуғулланаётганининг гувоҳи бўлдилар. Уларга юртимизнинг ана шундай ғамхўрликларига жавобан ақлли, мард ва олийжаноб инсонлар бўлиб етишишлари лозимлиги тушунтирилди.

Эзгулик йўлидаги қилинган иш ҳеч қачон беиз кетмайди. Туман Ички ишлар бўлими ва Амударё телеканали ходимларининг ҳамкорликдаги назорат тадбирлари ҳам ўзининг ижобий самараларини беради, албатта.

Ойгул РАЖАБОВА.