ЭЛ БИРЛАШИБ, ХАЙРЛИ ИШНИНГ УДДАСИДАН ЧИҚДИ

Муқаддас ислом динимиз таълимотига кўра, инсон вафот этгач, барча амаллари тўхтайди. Фақат жорий садақадан, элга манфаат келтирадиган илмдан ва унинг ҳаққига солиҳ фарзандлар қиладиган дуодан доимо манфаат етиб тураверади. Бу ерда жорий садақа дейилганда мусулмонларга доимий равишда фойда бериб турадиган хайрли ишлар кўзда тутилган. Кўпчилик фойдаланиши учун кўприк қуриш, қудуқ, ариқ қазиб сув келтириш шулар жумласига киради.

Аждодларимиз асрлар давомида бажариб келган бунингдек солиҳ амалларнинг мазмун-моҳияти, қадри бизнинг давримизда ҳам юксак тутилмоқда. Юртдошларимиз ташвишларига елка тутиб, ҳаёти фаровонлашувига хизмат қилаётган танти ҳамюртларимиз кўп.

Жорий йилнинг 13 июлида Манғит шаҳрининг Чордара маҳалласида бир гуруҳ тадбиркорлар, нуронийлар бамаслаҳат бир хайрли ишга қўл урдилар.

Маълумки ушбу маҳалла ҳудудида оқар сув неча ўн йиллардан бери муаммо бўлиб келаётган эди. Ҳудудда яшовчи аҳолига ичимлик суви ҳам вақти-вақти билангина етиб борарди. Шу боис кўчалар бўйларида яшил дарахтлар кам, борлари ҳам сувсизликдан ривожланмай қолган. Ўз томорқасини суғориш учун баъзилар ер қудуқдан фойдаланса, баъзилар оқар сувни кутиб яшайди.

Бунингдек, аҳвол маҳаллада истиқомат қилувчи ички ишлар фахрийси, айни кунда тадбиркорлик билан шуғулланаётган Каромаддин Ибодуллаевни ҳам ўйлантириб келаётган эди. У ҳудуддаги тадбиркорлар Озод Қурбонбоев, Жамбул Боймуродовлар билан бирга маҳалла фуқаролар йиғини идорасига бориб, муаммоларнинг ечими бўйича ўз фикрларини билдирди.

Йиғин раиси Турсунбой Серикбоев ҳам уларни қўллаб-қувватлаб, керакли идораларга мурожаат қилди. Қисқа фурсатда маҳаллага оқар сув олиб келиш йўли харитаси, лойиҳа-смета ҳужжатлари тегишли идоралар томонидан тайёрлаб берилди.

Шу тариқа Манғитнинг Дурунки маҳалласи бўйлаб “Юсуфхўжа” фермер хўжалиги экин майдонларига сув етказиб бериб турган ариқни 1,5 чақиримча узунликда қазиб, туманимизнинг аввал “Тельман йўл” деб номланиб келган улкан асфальт йўлини кесиб ўтиб, Чордара маҳалласига оқар сув олиб келиш ишлари бошлаб юборилди.

Шу йил 13 июль куни ушбу ҳайрли ишнинг бошланиши улкан тадбир тусини олди. Туман Ободонлаштириш бошқармасининг экскаватори ишни бошлаш жараёнида туман ҳокимлиги масъуллари, маҳалла фуқаролар йиғини раиси, тадбиркорлардан ташқари маҳалланинг нуроний кексалари Жумамурот Эримбетов, Қодир Давбоев, Турсунбой Худойберганов, Эркин Ҳайитбоев, Давлатбой Қиличевлар, шунингдек Саъдулла Маткаримов, Бахтиёр Эркабоевлар иштирок этдилар.

Нуронийлар бошланган ишнинг хайрли бўлишини тилаб, дуога қўл очдилар. Шу тариқа Чордара маҳалласининг Нодирабегим, Зебунисо, Завқий ва бошқа кўчаларига оқар сув келтириш учун ариқ қазиш ишлари бошланиб кетди. Ариқнинг улкан асфальт йўлни кесиб ўтувчи қисмига чидамли труба ташланди.

Энди Чордара маҳалласида истиқомат қилувчи аҳолининг неча йиллик оқар сув орзуси ушаладиган бўлди.

Яқин кунларда ариққа сув юборилади. Эл бирлашиб, ушбу хайрли ишнинг уддасидан чиқдилар. Маҳалла аҳолиси бунинг учун беғараз ёрдамини аямаган 4-сектор, туман Ободонлаштириш бошқармаси, маҳалла фуқаролар йиғини масъулларидан, тадбиркорлардан жуда миннатдор бўлишди.

Ойгул РАЖАБОВА.