Халқ депутатлари Амударё туман Кенгашининг 62-сессияси тўғрисида ахборот

2023 йил 21 июль куни Халқ депутатлари Амударё туман Кенгашининг 62-сессияси бўлиб ўтди.

Сессия ишида туман Кенгаши депутатлари, секторлар раҳбарлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар, жамоат ташкилотлари раҳбарлари ҳамда оммавий ахборот воситалари вакиллари иштирок этишди.

Сессияни Халқ депутатлари туман Кенгаши раисининг ўринбосари Ғуломжон Ешниёзов очди ва олиб борди. Сессия котиблигига 23-Бобур сайлов округидан депутат Шавкат Янгибаев сайланди.

Сессияда дастлаб маҳаллаларда эҳтиёжманд оилалар бўйича ижтимоий дафтарлар асосида амалга оширилаётган ишлар юзасидан секторлар масъулларининг ҳисоботлари тингланди.

1-сектор ҳудудида бу борада амалга оширилаётган ишлар ҳақида Амударё тумани ҳокими вазифасини вақтинчалик бажарувчи Рашид Салаев ҳисобот берди. Ҳисоботда келтирилиб ўтилганидек, биринчи сектор ҳудудида яшовчи 597 та оила “Темир дафтар”га киритилган бўлиб, уларга 1,3 млрд. сўмлик молиявий кўмак берилган ва ушбу оилаларнинг 587 таси доимий даромад манбаига эга бўлиб, дафтардан чиқарилган.

Ундан ташқари, 1-сектор ҳудудида “Аёллар дафтари”га 1 182 нафар хотин-қизлар киритилган бўлиб, шундан 935 нафарига амалий ёрдамлар кўрсатилган. “Ёшлар дафтари”да турувчи 117 нафар ёшларга турли ёрдамлар кўрсатилиб, 99 нафари дафтардан чиқарилган.

Мазкур масала юзасидан туман прокурорининг катта ёрдамчиси Шарьяр Жолдасов ҳисоботи берди. Ҳисоботда таъкидланганидек, 2-сектор ҳудудида “Бандлик” дастурига мувофиқ жорий йилнинг 5 ойи давомида Аҳоли бандлигига кўмаклашиш маркази томонидан 171 нафар фуқаролар ишга жойлаштирилган. Шулардан 118 нафари ёшлар, 53 нафари хотин-қизлардир. Жорий йилнинг ўтган даври мобайнида 2-сектор худудида 5 марта бўш иш ўринлари ярмаркаси ташкил қилиниб, ярмаркага 35 та корхона ва ташкилотлардан 133 бўш иш ўринлари таклиф қилинган. Ушбу иш ўринларига 120 нафар фуқаро ишга жойлаштирилиб, 41 нафар шахсга ишга йўлланма берилди. 2-сектор ҳудудида ишсизлик даражаси ва норасмий бандлар сонини камайтириш мақсадида, 158 нафар фуқаро жамоат ишларига жалб қилинди.

Шундан сўнг, 3-сектор раҳбари, туман Ички ишлар бўлими бошлиғи Жамоладдин Юсуповнинг кун тартибидаги мазкур масала юзасидан ҳисоботи тингланди. Ҳисоботда таъкидланишича, “Темир дафтар”да рўйҳатда турувчи 814 нафар эхтиёжманд оилаларнинг 790 нафарига турли ёрдамлар кўрсатилиб, дафтардан чиқарилган. Шунингдек, 3-сектор ҳудудида оила аъзолари даромад топишга, касб ўрганишга харакат қилаётган 466 та хонадонлар аниқланиб, оилавий тадбиркорликни ривожлантириш мақсадида ҳоким ёрдамчилари томонидан 357 нафар фуқарога 2,5 млрд. сўмлик кредит маблағлари ажратилган.

Сессия ишида кун тартибидаги масала юзасидан 4-сектор раҳбари, туман Давлат солиқ инспекцияси бошлиғи Айдос Сейитовнинг ҳам ҳисоботи тингланди. Қайд этилганидек, 2023 йилнинг 6 ойи давомида сектор раҳбари томонидан 29 та сайёр қабуллар ўтказилган. Ушбу сайёр қабулларда жами 277 та мурожаат келиб тушган бўлиб, ушбу мурожаатларнинг 197 таси қаноатлантирилган бўлса, 35 та мурожаат ўрганиш жараёнида.

Сессия кун тартибида туманда соғлиқни сақлаш, хусусан, тез тиббий ёрдам, кафолатланган бепул тиббий ёрдамнинг кўрсатилиши бўйича туман Тиббиёт бирлашмаси бошлиғининг ўринбосари Ҳакимжон Собировнинг ҳисоботи тингланди.

Қайд этиб ўтилганидек, туман тез тиббий ёрдам бўлими йил бошидан бошлаб Республика тез тиббий ёрдам марказининг Қорақалпоғистон филиали таркибига киритилди. Бўлимнинг таркибида 1 та марказий подстанция ва 11 та шахобча мавжуд бўлиб, жами 16 бригада ишламоқда. 2023 йилнинг 6 ойи давомида тез тиббий ёрдам бўлимига келиб тушган барча мурожаатлар сони 25 952 тани ташкил қилган бўлса, 25 776 нафар беморга тез тиббий ёрдамлар кўрсатилган.

Сессия ишида Амударё тумани ҳокимлиги Болаларни ҳимоя қилиш шўъбаси томонидан ҳам жорий йилнинг 6 ойи мобайнида амалга оширилган ишлар юзасидан ҳам ҳисобот тингланди. Шўъба раҳбари Жаҳонгир Холмуродовнинг ҳисоботида таъкидланганидек, 2023 йил 1-ярим йиллиги давомида етим болалар ва ота-она қарамоғидан маҳрум болаларга 10 та васийлик ва 12 та ҳомийлик тайинланди, фарзандликка берилганлар эса 18 тани ташкил қилди. Бугунги кунда туман Болаларни ҳимоя қилиш шўъбасининг назоратида бўлган жами 102 нафар боланинг 39 нафари чин ва ижтимоий етим болалардир.

Сессия ишида Амударё туман Халқ қабулхонаси, секторлар ва ҳудуддаги ташкилотлар раҳбарларининг аҳоли мурожаатлари ва муаммолари билан ишлаш ҳолати юзасидан туман Халқ қабулхонаси бўлими мудири Эркин Ражабовнинг ахбороти тингланди.

Ахборотда келтирилиб ўтилганидек, Ўзбекистон Республикаси Президентининг Виртуал қабулхонасига 2023 йил 30 июнь санасига қадар туман аҳолиси томонидан 2042 та масалалар бўйича мурожаатлар келиб тушган бўлиб, ушбу мурожаатларнинг 2007 таси кўриб чиқилган. Ушбу мурожаатлардан 1638 таси қаноатлантирилган ҳамда 990 таси ижобий ҳал қилинган. 633 тасига эса ҳуқуқий тушунтиришлар берилган.

Туман Халқ қабулхонаси бўлими мудири Эркин Ражабовнинг маҳаллаларда тадбиркорликни ривожлантириш, аҳоли бандлигини таъминлаш ва камбағалликни қисқартириш бўйича келиб тушаётган мурожаатларни таҳлил қилган ҳолда ҳоким ёрдамчилари фаолиятининг натижадорлигини ўрганиш юзасидан ҳам ахбороти тингланди.

Қайд этилганидек, тумандаги ҳоким ёрдамчиларининг амалий кўмаги натижасида шу кунгача жами 279 та тадбиркорлик субъектлари янгидан ташкил этилган. Шулардан 127 таси якка тартибдаги тадбиркорлар бўлса, 152 таси юридик мақомдаги тадбиркорлардир.

Сессия ишида Кенгаш ваколатига кирувчи бошқа масалалар ҳам кўриб чиқилиб, барча масалалар юзасидан халқ депутатлари Амударё туман Кенгашининг тегишли қарорлари қабул қилинди.

Шунинг билан сессия ўз ишини якунлади.

Туман ҳокимлигининг Ахборот хизмати.