Обод оила − обод юрт

Қайси бир юртда маҳаллалар обод, оилалар бахтли, аҳоли турмуши фаровон бўлса, ўша юрт энг қудратли ҳисобланади. Жаннатмакон диёримизда тинчлик, миллатлараро тотувлик ҳукм сурмоқда. Ҳар бир гўша обод, маҳаллаларда болаларнинг шўх-беғубор кулгулари эшитилади. Ўз оиласидан, яқинларидан, танлаган касб-коридан кўнгли тўқ инсон борки, эрталаб ишга, кечқурун уйига шошади.  

Манғит шаҳрининг Олмазор маҳалласида яшовчи Отабек Бобожанов ҳам шундай инсонлардан. Олий Мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” номли грант лойиҳаси доирасида  ўзининг юксак салоҳияти, иқтидори билан ажралиб турувчи ёшларни тенгдошларига ҳар томонлама ўрнак қилиб кўрсатиш мақсадида Амударё телевидениеси таҳририяти томонидан кўрсатувлар тайёрланиб, эфирга узатилиб келинмоқда. Телеканал ижодий гуруҳи грант лойиҳаси доирасида бу гал Отабек Бобожановнинг хонадонида бўлди.

Ушбу оиланинг таянчи ва суянчи бўлган Саъдулла ота Бобожанов фарзанди билан жуда ҳам фахрланади. Сабаби, Отабек имконияти чекланган бўлишига қарамасдан, ҳамма соғлом инсонлар ҳам бажара олмайдиган касб-корни пухта эгаллаган.

Болалигидан бошлаб олдин этикдўзликни, ундан кейин қандолат маҳсулотлари тайёрлашни ўрганган Отабек бугунги кунда маиший техника ва уяли алоқа ускуналарини тузатиш устаси.

Шаҳар марказида ўзининг устахонасини очиб, 20 дан зиёд шогирдлар тарбиялади. Отабек устоз-шогирд анъанасини давом эттирган ҳолда яна кўплаб шогирдлар етиштириб чиқаришни ният қилган. Олдинлари фақатгина ҳаётда ўз ўрнини топиш учун ҳаракат қилган Отабек бугунги кунда ўзи орқали бошқа ёшлар ишли ва касб-корли бўлаётганидан ниҳоятда мамнун. Шогирдларидан айримлари уста даражасига етиб мустақил иш ҳам бошлашган. Унинг меҳнатлари Президентимиз томонидан эътироф этилиб, “Ўзбекистон Республикаси мустақиллигининг ўттиз бир йиллиги” кўкрак нишони ҳамда “Жасорат” медали билан тақдирланди. Давлатимизнинг бу каби рағбат ва эътибори Отабекнинг ўз касбига бўлган меҳр-муҳаббатини янада ошириб, янги мақсадларни амалга ошириш сари ундамоқда.

Унинг келажакдаги мақсади – информацион технологиялар соҳасида иш юритиб, сервис ва маиший хизмат кўрсатиш марказини ташкил қилиш ва ишсиз юрган, ногиронлиги бор фуқароларни касбга ўргатиш, уларни иш билан таъминлашдир.

Қалбларимизнинг мусаффолиги, дилларимизнинг беғуборлиги, ҳақиқий меҳр-шафқатимизнинг, меҳрибонлигимизнинг намоён бўлиши турмушимиз фаровонлигига боғлиқдир.

Олмазор маҳалласи яшовчи ушбу оиланинг турмуши обод, оиласи фаровон. Шу сабабдан ҳам улар ҳар бир ўтаётган кунидан рози бўлиб ҳамжиҳатлик ва аҳилликда умр кечиришмоқда.

Фотима Эшимбетова.