Жорий йилнинг 7 ойи давомида туман ФҲДЁ бўлими томонидан 2666 та туғилганлик ҳолати қайд этилди

Маълумки, Ўзбекистон Республикаси Президентининг 2020 йил 18 февраль кунги “Жамиятда ижтимоий-маънавий муҳитни соғломлаштириш, маҳалла институтини янада қўллаб-қувватлаш ҳамда оила ва хотин-қизлар билан ишлаш тизимини янги даражага олиб чиқиш чора-тадбирлари тўғрисида”ги Фармони билан 2020 йил 1 апрелдан бошлаб фуқаролик ҳолати далолатномаларини ёзиш органлари Адлия вазирлиги тасарруфига ўтказилган эди.

Ўтган қисқа вақт мобайнида Амударё тумани Фуқаролик ҳолати далолатномаларини ёзиш бўлимида барча қоғоз ҳужжатлар рақамлаштирилиб, туғилиш, никоҳ, ажрим, ўлим ҳолатларини қайд қилиш ва бошқа қоғоз ҳужжатлар электрон базага киритилди.

Айни пайтда бўлимда фуқароларга самарали хизмат кўрсатилмоқда. Бўлим ходимлари овул ва маҳаллаларга чиққан ҳолда, сайёр равишда ҳам фуқароларнинг мурожаатларини ўрганиб, ҳуқуқий маслаҳатлар бериш, амалий ёрдамлар кўрсатиш мақсадида мунтазам равишда учрашувлар ташкил этиб келмоқда. Ушбу учрашувлар, кўрсатилаётган ҳуқуқий хизматлар аҳолига жуда катта қулайлик яратмоқда ва ҳуқуқий билимларини оширишда муҳим аҳамият касб этмоқда.

Жорий йилнинг 7 ойи давомида бўлим томонидан 2666 та туғилганлик ҳолати қайд этилган бўлса, шундан ўғил болалар 1388 нафар, қиз болалар 1278 нафарни ташкил қилди. Ушбу давр мобайнида 849та никоҳ қайд этилган бўлиб, шундан 108таси тантанали тарзда қайд этилган. Никоҳдан ажралиш ҳолати эса 97та бўлиб, шундан 14таси ўз аризаси асосида Фуқаролик ҳолати далолатномаларини ёзиш бўлимида, 83таси суд қарорига кўра амалга оширилган. 7 ой давомида 678 та ўлим ҳолати қайд этилган.

Ҳозирги пайтда мамлакатимиз бўйлаб Фуқаролик ҳолати далолатномаларини ёзиш бўлимларида Вазирлар Маҳкамасининг 2022 йил 28 сентябрь кунги “Фуқаролик ҳолати далолатномаларини ёзиш тартибларини янада такомиллаштириш чора-тадбирлари тўғрисида”ги Қарорида кўрсатилган тартибда хизмат кўрсатиш йўлга қўйилмоқда. Қарорга мувофиқ, туғилганликни тиббиёт муассасалари орқали фуқаролик ҳолати далолатномаларини ёзиш бўлимларида қайд этиш тартиби 2023 йил 1 январдан Тошкент шаҳрида бошланган бўлса, шу йил 1 июндан бутун республика ҳудудида жорий этила бошланди.

Эндиликда туғилганлик ҳолати Фуқаролик ҳолати далолатномаларини ёзиш бўлимларида қайд қилинганлиги ҳақида тиббиёт муассасалари томонидан QR-код тасвири туширилган маълумотнома берилади. Ушбу маълумотнома туғилганлик ҳақидаги гербли гувоҳномага тенглаштирилади. Мазкур маълумотномани давлат органлари ва ташкилотлари томонидан қабул қилишни рад этиш тақиқланади.

Шунингдек, қарорда никоҳ тузиш ва никоҳдан ажратишни қайд этиш учун аризаларни Сирдарё вилоятида Давлат хизматлари марказлари орқали қабул қилиш бўйича ҳуқуқий эксперимент ўтказилиши, ҳуқуқий эксперимент 2022 йил 1 ноябрдан 2023 йил 1 июлгача амалга оширилиши кўрсатилган эди. Шунга кўра, қарор билан никоҳ тузиш ва никоҳдан ажратишни қайд этиш учун давлат хизматлари марказлари орқали аризалар қабул қилиш тартиби тўғрисидаги вақтинчалик маъмурий регламент тасдиқланди. Никоҳга кириш ҳақида ариза берилганда никоҳланувчи шахсларнинг яшаш жойидаги маҳалла фуқаролар йиғинини хабардор қилиш тартиби бекор қилинди.

Ундан ташқари, эндиликда никоҳдан ажратиш ҳақида ариза берилганда эр-хотинни яраштириш бўйича тегишли чоралар кўриш учун эр-хотин яшаш жойидаги туман оила ва хотин-қизлар бўлимларига электрон ахборот тизими орқали хабар бериш тартиби йўлга қўйилади. Фуқаролар фамилия, исм ва ота исмини ўзгартиришда текширув ўтказиш учун фуқаролик ҳолати далолатномаларини ёзиш бўлимлари томонидан “Фуқаролик ҳолати далолатномаларини ёзиш ягона электрон архиви” ахборот тизими орқали ички ишлар органларига сўровнома юбориш ва хулоса олиш тартиби ҳам жорий қилинади.

Тизим орқали амалга оширилаётган, фуқароларга яратилаётган қулайликлардан яна бири бу – туғилганлик ҳақидаги гувоҳнома шакллантирилаётганда шу вақтнинг ўзида болани доимий яшайдиган манзилига рўйхатга ва Мактабгача таълим ташкилотига навбатга қўйишдир. Бундан ташқари, бир марталик бериладиган нафақа пулига рўйхатга қўйиш ҳам шу вақтнинг ўзида амалга оширилмоқда.

Фуқаролик ҳолати далолатномаларини ёзиш органлари фаолиятида экстерриториал тамойилнинг йўлга қўйилгани фуқароларга янада қулай бўлмоқда. Фуқаролар доимий ёки вақтинча рўйхатдан ўтган жойидан ва юридик шахсларнинг почта манзили, яъни жойлашган еридан қатъий назар, исталган ҳудудда Фуқаролик ҳолати далолатномаларини ёзиш идораларига мурожаат қилиш имкониятидан фойдаланишмоқда. Бу эса аҳоли ва тадбиркорларни ортиқча вақт ҳамда маблағ сарфлашдан халос қилаётгани билан ниҳоятда аҳамиятлидир.

О.Худойберганова.