АҲОЛИ ФАРОВОНЛИГИНИ ТАЪМИНЛАШ БОРАСИДА АНИҚ ВАЗИФАЛАР БЕЛГИЛАБ БЕРИЛГАН

Барчамизга маълумки, Президентимизнинг “Ўзбекистон – 2030” стратегияси тўғрисида”ги Фармони ва “Ўзбекистон – 2030” стратегиясини 2023 йилда сифатли ва ўз вақтида амалга ошириш чора-тадбирлари тўғрисида”ги Қарори лойиҳалари жамоатчилик муҳокамасига қўйилди. Ушбу “Ўзбекистон – 2030” стратегиясида 5 та йўналиш бўйича 100 та мақсад назарда тутилган. “Ўзбекистон – 2030” стратегиясини 2023 йилда амалга ошириш чора-тадбирлари лойиҳасида муддатлар ва ижрочилар кесимидаги амалий вазифалар, эришиладиган аниқ мақсадли кўрсаткичлар ва стратегияни амалга ошириш доирасида ишлаб чиқиладиган норматив-ҳуқуқий ҳужжатлар рўйхати тасдиқланмоқда.

«Ўзбекистон — 2030» стратегияси 5 та устувор йўналишларда амалга оширилиши белгиланган бўлиб, унинг 2-йўналиши “Барқарор иқтисодий ўсиш орқали аҳоли фаровонлигини таъминлаш” деб номланган.

Маълумки, иқтисодий ўсишни таъминлаш, барқарорлаштириш ва ривожлантиришдан асосий мақсад мамлакат иқтисодий ривожланиши ва аҳолининг турмуш даражасини оширишдир. Шу сабабли ушбу бўлимда 2030 йилга қадар иқтисодиёт ҳажмини 2 баробар ошириш ва “даромади ўртачадан юқори бўлган давлатлар” қаторига кириш борасидаги аниқ вазифалар кўрсатиб ўтилган. Ундан ташқари, маҳаллий хомашё базасидан самарали фойдаланиш ва илғор технологияларга асосланган саноатни ривожлантириш, саноатнинг “драйвер” соҳаларини ривожлантириш ва ҳудудларнинг саноат салоҳиятини тўлиқ ишга солиш, мамлакатимизнинг инвестициявий жозибадорлигини янада ошириш ва қимматли қоғозлар бозорини жадал ривожлантириш, банк тизимида ислоҳотларни жадаллаштириш, банк хизматлари бозори ҳажмини ошириш ва соҳада рақобатни ривожлантириш  борасида амалга оширилиши лозим бўлган чора-тадбирлар белгилаб қўйилган.

 Стратегиянинг ушбу йўналишида келгусида “Яшил иқтисодиёт”га ўтиш, унинг асоси бўлган қайта тикланувчи энергиядан фойдаланиш кўрсаткичларини кескин ошириш, иқтисодиёт ва аҳолини зарурий энергия ресурслари билан узлуксиз таъминлаш, қишлоқ хўжалигида ҳосилдорлик ва рентабеллик даражасини кескин ошириш, миллий иқтисодиётнинг экспорт салоҳиятини кучайтириш ва унинг таркибида қўшилган қиймати юқори бўлган маҳсулотлар улушини кескин ошириш ҳам кўзда тутилган.

Ишончимиз комилки, Стратегияда кўрсатилган барча чора-тадбирлар мамлакат иқтисодиёти барқарор ривожланиши ва ўсишига, эл-юрт фаровонлигини таъминлашга хизмат қилади.  Ҳар биримиз ушбу вазифаларни масъулият билан бажарсак, тараққиёт сари ташланаётган қадамлар янада жадаллашиб, Янги Ўзбекистон келажаги буюк ва ҳар жиҳатдан қудратли давлатлар қаторидан жой олади.

Яхшимурод Аҳмедов,

Қорақалпоғистон Республикаси Жўқорғи Кенгеси депутати,

O’zLiDeP туман Кенгаши раиси ўринбосари, аппарат раҳбари.