САЙЁР СУДДА АЖРАШИШ АРАФАСИДА ТУРГАН ОИЛА ЯРАШТИРИЛДИ
Фуқаролик ишлари бўйича Амударё тумани суди томонидан очиқ сайёр суд мажлиси ўтказилди.
Янгиобод маҳалласи ҳудудида жойлашган Амударё муҳандислик техникуми биносида бўлиб ўтган ушбу сайёр суд мажлисида тумандаги маҳаллалардан бирида яшовчи оила томонидан берилган никоҳдан ажратиш ҳақидаги даъво аризаси кўриб чиқилди. Суд ишида суд масъуллари билан биргаликда томонларнинг ҳимоячилари, фуқаролар йиғинлари масъуллари, хотин-қизлар фаоллари, кўчабошчилар ва ёши улуғ кексалар иштирок этишди.
Суд мажлисида мазкур оила томонидан берилган никоҳдан ажратиш ҳақидаги даъво аризаси, ажрашиш сабаблари, оилавий муҳит, оила аъзолари ўртасидаги бир-бирларига бўлган муносабат кенг муҳокама этилди.
Сўзга чиққанлар оилалар мустаҳкам бўлса, жамиятда ҳам осойишталик ҳукм суришини, бахтли оилалар туфайли юртимиз янада файзга тўлишини, ўзаро меҳрли бўлган ота-оналарнинг фарзандлари ҳам бир-бирига меҳрибон бўлишини эътироф этишди. Аммо жамиятимизда арзимаган сабаблар, тушунмовчиликлар, учинчи шахснинг аралашуви натижасида айрим оилалар ажралиш ёқасига келиб қолаётгани, бундай оилаларнинг фарзандлари кўнгли ярим бўлиб улғайишини, ҳатто тарбиясига таъсир қилиб, носоз йўлларга юриб кетишини алоҳида таъкидлашди. Катталар ўртасида бир-бирини тушунмасликдан келиб чиқадиган жанжал ва можароларнинг ҳам бола тарбиясига салбий таъсир кўрсатишини, маънан соғлом, одоб-ахлоқли фарзанд тарбия қилиш учун эр ва хотин турмушда сабрли, турли синовларга бардошли бўлиши, оилавий муаммоларни биргаликда, ҳамжиҳатликда ҳал қилишга ҳаракат қилиши кераклигини айтиб ўтишди.
Мажлис давомида фуқаролар йиғинлари масъуллари, хотин-қизлар фаоллари ўз ҳудудларда нотинч оилаларни яраштириш, ажрашишларнинг олдини олиш борасида қилинаётган ишлар хусусида маълумот берди. Шунингдек, ажрашиш арафасида турган оилаларни яраштириш, юзага келган низоларни тинч йўл билан бартараф этиш борасида фуқаролик ишлари бўйича судлар ҳамда ҳар бир маҳалла фуқаролар йиғини қошида ташкил этилган яраштирув комиссиялари томонидан зарур чора-тадбирлар амалга оширилаётганини маълум қилишди.
Никоҳдан ажратиш бўйича судга мурожаат қилишнинг сабаблари таҳлил қилиниб, бунга асосан моддий жиҳатдан қийналганлик, фарзандсизлик, спиртли ичимликларни суиистеъмол қилиш ва бошқалар сабаб бўлиши, мазкур аризалар билан судга мурожаат қилганларнинг кўп қисми ёш оилалар, аксариятини 18 ёшдан 25 ёшгача бўлганлар ташкил қилиши таъкидлаб ўтилди.
Шундан сўнг, Фуқаролик ишлари бўйича туман судига ажрашиш учун даъво ариза билан мурожаат қилган мазкур оилада юзага келган можароларнинг сабаблари таҳлил қилинди. Масъуллар томонидан ажрашиш арафасида турган ушбу оила билан индувидуал суҳбатлар ўтказилиб, уларни яраштириш чоралари кўрилди. Ҳар бирига оила муқаддаслигини, уни асраб-авайлаш кераклигини, ҳаёт ташвишларини биргаликда енгишга ҳаракат қилиш, бир-бирига елкадош бўлиш кераклигини тушунтиришди.
Маҳалладаги ёши улуғ кексалар ҳам ўз ҳаётий тажрибаларидан келиб чиқиб, панд-насиҳатлар беришди. Никоҳнинг муқаддаслиги, ажримларнинг асл сабаблари ва моҳияти ҳақида ҳам сўз юритишди. Шунингдек, ёшларга узоқ йиллар бирга тинч-тотув яшаган, ҳаётнинг турли синовларидан матонат ва сабр билан яшаб келаётган пиру-бадавлат оилалар, нуронийлар ва кайвони оналар ёшларга ўрнак қилиб кўрсатилди.
Ўтказилган суҳбатлар бесамар кетмади. Очиқ суд мажлисида тарафлар яраштирилиб, ажрашиш арафасидаги бир оила сақлаб қолинди.
Қ.Атамурадов, Фуқаролик ишлари бўйича туман суди раиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
