Ёш авлод тарбияси ишончли қўлларда

Амударё туманида фаолият юритаётган мактабгача таълим ташкилотлари орасида 7-сонли мактабгача таълим ташкилотининг ўз ўрни бор. Боиси, бу масканнинг кўп йиллик шонли йўли ва ана шу йўлни босиб ўтиб, ҳаётда ўз ўрнини топган бир қатор “қалдирғоч”лари бор.

Барно Худойберганова раҳбарлик қилаётган ушбу мактабгача таълим ташкилоти туман ҳокимининг 2010 йил 19 январдаги 22-сонли қарори асосида ташкил қилинган.

Мазкур муассаса биноси 2018 йилда тубдан қайта реконструкция қилинди. Махсус лойиҳа асосида 70 ўринга мўлжаллаб қурилган ва 2019 йил февраль ойида қайта ишга туширилган муассаса биноси 2 қаватдан иборат.

Ташкилот тарбияланувчиларининг – ўсиб келаётган болажонларнинг тоза ҳаводан нафас олишлари ҳамда бу ерга ташриф буюрувчиларга эстетик завқ улашиш мақсадида бинонинг теварак-атрофида турли хил манзарали дарахтлар экилган. Мунтазам равишда ободонлаштириш, кўкаламзорлаштириш ишлари олиб борилади. Бундан ташқари, кичкинтойларнинг қиш фаслида иссиқ ва шинам хоналарда тарбия олишлари, машғулотларни ўташлари учун иситиш тизими сифатли қилиб ўрнатилган.

Айтиш жоизки, олдинги мактабгача таълим тизими билан бугунги тизимни солиштирадиган бўлсак, бир-биридан тубдан фарқ қилади. Эндиликда ота-оналар фарзандини боғчага беришлари учун ойлаб навбат кутмайди. Идорама-идора юриб сарсон бўлмайди. Бу эса юртимизда ёш авлоднинг таълим-тарбиясига ва келажагига бўлган эътиборнинг ёрқин намунаси экани шубҳасиз.

Болажонларнинг иккинчи уйига айланган ушбу масканнинг бағри кенг, ҳозирги кунда ташкилотда рўйхат бўйича 240 нафар бола, 3 та асосий гуруҳнинг ҳар бирида 30 нафардан жами 90 нафар, шунингдек, 4 та қисқа муддатли гуруҳда 80 нафар бола, 2 та мажбурий гуруҳда эса 50 нафар келажагимиз эгалари тарбияланмоқда.

Сувни қандай шаклдаги идишга солсангиз сув ўша идишнинг шаклини олади. Ниҳолнинг келажаги эса, шубҳасиз, уни тарбиялаётган боғбонга боғлиқ. Бугун Амударё туманидаги 7-сонли МТТда фарзанди тарбияланаётган ота-оналарнинг фарзанди тарбиясидан кўнгли тўқ, сабаби улар ишончли қўлларда.

Ташкилотда ҳозирда жами 25 нафар ходим фаолият юритади. Шулардан 13 нафари тарбиячи ва 9 нафари ёрдамчи тарбиячилардир.

Мактабгача таълим ташкилоти тумандаги энг намунали ташкилотлардан бири ҳисобланади. Замонавий услубда қурилган бино лойиҳа бўйича 3та гуруҳга мўлжалланган. Ундан ташқари, ошхона, тиббий хизмат бўлими, омборхона, мусиқа ва спорт хоналари, болалар майдончалари ва айвончалар мавжуд.

Боғча инсон камолоти йўлида бунёд бўлажак қўрғоннинг катта ҳаётга қўйиладиган мустаҳкам пойдевордир. Шу сабаб у ердаги таълим-тарбиядан ташқари, яратилган шарт-шароитлар ҳам боланинг келажагини белгилаб беради.

Ташкилот Мактабгача ва мактаб таълими вазирлигининг махсус қарори асосида замонавий мебель жиҳозлари, телевизор билан жиҳозланган. Гуруҳларда 5та ривожлантирувчи марказлар ҳамда “Маънавият” ва “Спорт” бурчаклари ташкил қилинган. Шунингдек, 2022-2023 ўқув йили давомида асосий йил вазифаларини бажариш мақсадида мактабгача ёшдаги болаларга таълим ва тарбия бериш, соғломлаштириш, педагогларнинг бола тарбиясидаги билимларини кенгайтириш ва салоҳиятларини ошириш мақсадида кўпгина ижобий ишлар олиб борилмоқда.

Масъулият бор жойда ишнинг унуми бўлади. Тажриба бор жойда эса ишнинг сифати яхшиланади. Агарда унга болафеъллик, хушмуомалалик каби гўзал фазилатлар эргашса нур устига аъло нур. Кичкинтойларга ана шундай сифатларга эга ходимлар тарбия бераётган ушбу даргоҳдан келажакда комил инсонлар етишиб чиқишига умид боғлагимиз келади.

Азиза Мадраҳимова