ЭЛ ХИЗМАТИДАГИ НУРОНИЙ ОТАХОН

Юртимизда хонадонлар файзи, фариштаси бўлган нуроний отахон ва онахонларга алоҳида ҳурмат кўрсатиш, эъзозлаш ҳам миллатимизга хос бўлган қадриятлардан бири саналади. Дарҳақиқат, ёши улуғ инсонлар бор бўлган уйнинг файз-у баракаси ҳам бошқача бўлади. Улар фарзандлар ва набираларнинг нафақат дуогўйи, балки энг яқин маслаҳатчиси, ўз ҳаётий тажрибалари асосида тўғри йўл кўрсатувчилардир.

Шу боис кекса авлод вакилларини улуғлаш, уларнинг тажрибасига таяниш оилаларимиздаги каби жамиятда ҳам ўз ифодасини топмоқда. Президентимиз раҳнамолигида амалга оширилаётган, инсон манфаатлари устувор давлатимиз сиёсатида ёши улуғ инсонларни ижтимоий муҳофаза қилиш, уларни моддий ва маънавий қўллаб-қувватлаш, турмуш даражасини ошириш энг муҳим устувор йўналишлардан бири сифатида белгиланган.

Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ҳам “Кексалар – хонадонларимиз файзи ва фариштаси” шиори остида кексаларни эъзозлаш, уларнинг панд-насиҳатларини ёшларга етказиш орқали жамиятда ўзаро ҳурмат ва меҳр-муҳаббат, юксак ахлоқий ва маънавий қадриятлар муҳитини шакллантириш борасида тадбирлар ташкил этилмоқда. Ушбу тадбирлар мунтазам равишда тумандаги оммавий ахборот воситаларида ёритиб борилмоқда.

Айни пайтда Амударё тумани “Нуронийлар” жамоатчилик Кенгаши раиси бўлиб фаолият кўрсатиб келаётган Бекман ота Аллаберганов ҳам бу борада ибратга лойиқ, арзигулик ишлар амалга оширмоқда. Отахон узоқ йиллар таълим тизимида ва бошқа соҳаларда фидойилик билан меҳнат қилиб, нафақага чиққан бўлишига қарамасдан ўзини эзгу ва хайрли ишларга бахшида этиб келмоқда.

 Бекман отани нафақат туманимизда, балки бутун қорақалпоқ элида фаол нуроний сифатида жуда яхши танишади. Ота доим халқ орасида, панд-насиҳатлари, ўгит ва маслаҳатлари билан ҳаммани эзгу ишларга даъват қилиб келмоқда. Айниқса, ёшлар тарбиясига жуда эътиборли, уларнинг юрт келажагига муносиб, комил инсонлар бўлиб вояга етишлари учун астойдил жон куйдиради. Ҳали-ҳамон халқ хизматида юрган Бекман Аллабергановнинг Амударё телевидениесидаги “Одоблар хазинаси” муаллифлик кўрсатуви ва халқимизга хос бўлган миллий-маънавий қадриятларни авайлаб-асрашга қаратилган давра суҳбатлари, тадбирларини ҳар доим халқимиз севиб қарши олади. Бугунги кунда унинг иштирокидаги тарбиявий кўрсатувларнинг мухлислари жуда кўп.

Ҳозирги кунда Тошёп овулида яшаётган Бекман Аллаберганов 1947 йилда туғилган. У 1963-1968 йилларда Тошкент Давлат педагогика институтининг физика-математика факультетини тамомлаб, узоқ йиллар 16-сонли ва 5-сонли умумтаълим мактабларида ўқувчи-ёшларга физика-математика фанларидан сабоқ берди. Ташаббускор, халқ ҳаётига доир муаммолар ечимини топишдаги ўзига хос фикрга эга бўлган Бекман Аллаберганов туман раҳбариятининг назарига тушиб, 1987-1995 йилларда Халқ депутатлари Амир Темур номли овул Кенгаши ижроия қўмитаси раисининг ўринбосари вазифасига қўйилди. Кейинчалик бир неча йил тадбиркор сифатида фаолият юритган Бекман Аллаберганов 1999-2003 йиллар оралиғида Амир Темур номли овул маҳалла посбони сардори, 2003-2008 йилларда эса мазкур фуқаролар йиғини раиси вазифаларида сидқидилдан меҳнат қилди.

Халққа фидокорона хизмат қилган отахон нафақага чиққанидан кейин 2014-2017 йилларда “Нуроний” жамғармаси туман бўлими раиси, 2017-2020 йилларда эса Ўзбекистон фахрийларининг ижтимоий фаолиятини қўллаб-қувватлаш жамоат бирлашмаси шаклидаги “Нуроний” жамғармаси туман бўлими раиси вазифаларида ишлади. Шу даврлар ичида қанчадан-қанча эзгу ишларга камарбаста бўлди, оилавий низолар, ажрашишларнинг олди олинишига, ёшларнинг одоб-ахлоқли, етук инсонлар бўлиб камолга етишларига ҳисса қўшди, ҳаётда ўз ўринларини топишларига кўмаклашди.

Эл-юрт фидойиси Бекман ота ҳалига қадар тиниб-тинчимайди. Гоҳ у маҳаллада, гоҳ бу овулда фуқаролар йиғини масъуллари, фаоллари билан учрашади. Уларга бой ҳаётий тажрибаларидан келиб чиқиб, маслаҳатлар беради, йўл-йўриқлар кўрсатади. Хонадонларга кириб бориб, ўзи каби нуронийларнинг суҳбатидан баҳраманд бўлади, янги оила қурган ёшларга эса панд-насиҳатлар бериб, иноқликда умр кечиришга, мустаҳкам оила қўрғонини бунёд этишга чақиради.

Бугун фақатгина оилавий ҳаётда эмас, балки турли соҳаларда эришаётган ютуқларимизда ҳам мўътабар кексаларимизнинг улкан хизматлари бор. Бекман ота Аллаберганов каби табаррук инсонлар, дуогўйларимизнинг эрта-ю кеч тилларидан тушмайдиган дуо-ю тилаклари боис, юртимизда тинчлик барқарор, хонадонларда чиройли тўйлар бўлмоқда.

Кексалари эъзоз топган юртнинг келажаги ҳам обод бўлади дейишади. Элимиз файзи, фариштаси бўлган ана шундай нуронийларимиз эъзоз ва ҳурматда бўлиб, узоқ ҳаёт кечирсин.

О.Худойберганова.