ОФЙ раиси: "Мақсадимиз– инфратузилмани ривожлантириш". 3 505 нафар аҳоли истиқомат қилувчи Тош ёп овули ҳақида нималарни биласиз?

Ўзбек маҳаллаларидаги жамоавийлик, қўни қўшнилар яхши ёмон кунларида бир-бирларига елкадош бўлиб, бир-бирларини қўллаб-қувватлаши қандай бебаҳо қадрият... тўғрими? Ахир дунёда ёнгинасидаги қўшнисининг ким эканлигини билмайдиган, эшигини қоқсангиз шахсий маълумотларингизни тўлиқ аниқламагунча эшигини очмайдиган одамлар қанча. Олийжаноб халқимиз хонадонларининг эшиклари эса, меҳмон бўлиб келажак ҳар бир инсон учун ҳамиша очиқ. Сўнги йилларда муҳтарам Президентимиз ташаббуси билан маҳалла тизимига бўлган эътибор кучайди. Қатор ислоҳотлар натижасида овул ва маҳаллалар қиёфаси кундан кун чирой очиб, обод манзилларимиз сафи кенгаймоқда. Шулардан бири- Тош ёп овул фуқаролар йиғинидир. Мазкур ОФЙ 2013 йили ташкил топган бўлиб, 3 505 нафар аҳоли истиқомат қилувчи мазкур ҳудудга Гулшод Собирова раислик қилиб келмоқда. Ҳудудда 701 та оила, 596 хонадон мавжуд. Шунингдек, 2 та (76 ва 5 сонли) мактаб, 4 та хусусий мактабгача таълим муассасаси ҳамда битта Давлат томонидан қурилган (51 сонли) мактабгача таълим ташкилоти бор. Шу билан бир қаторда 7 та Озиқ овқат дўкони ҳамда битта «МАНАС» чойхонаси, 11 та иссиқхона мавжуд.

Меҳр-оқибат, саховатпешалик халқимизга хос азалий одат. Жорий йилда овулдаги эҳтиёжманд, боқувчисини йўқотган, таркибида ногиронлиги бўлган фарзандлари бор оилалар ва ёлғиз яшовчи фуқароларнинг хонадонларига бориб, уларнинг ҳолидан хабар олиниб озиқ-овқат маҳсулотлари, кўмир маҳсулотлари тарқатилди. Мамлакатимизда президентимиз раҳнамолигида кекса авлод вакилларини қўллаб-қувватлаш, уларнинг жамият ва оилалар мустаҳкамлигини сақлашдаги ролини кучайтириш, шунингдек, ёш авлодни халқимизнинг кўп асрлик анъаналарини ҳурмат қилиш руҳида тарбиялаш каби масалаларга алоҳида эътибор қаратилмоқда. Жумладан, Ўзбекистон Республикаси Вазирлар Маҳкамасининг тегишли қарори ижросини таъминлаш мақсадида, 2019-йилдан бери юртимизда хар йили анъанавий тарзда ўтказилиб келинаётган “Кексалар ҳафталиги” доирасида маҳалладаги касал ётган нуроний Отахон ва онахонлар хонадонларига бориб, ҳолидан хабар олинди. Шунингдек, 82 нафар нуроний отахон ва онахонлар иштирокида Хива, Нукус шаҳарларидаги музей ва тарихий масканларга, туманимиздаги зиёратгоҳларга саёҳатлар уюштирилди.

“Яхшидан боғ қолар” дейди доно халқимиз. Боғ яратиш, деҳқончилик қилиш тош ёпликларнинг қон қонига сингган ҳунарларнинг бири. Жорий йил овулда ”Яшил макон” умуммиллий лойиҳаси доирасида ҳам бир қатор хайрли ишлар олиб борилди. Ҳудуддаги кам таъминланган оилаларга фермерлар ҳамда Тош ёп ОФЙ томонидан 200 тупга яқин мевали ва манзарали дарахтлар кўчатлари экиш учун тақдим этилгани сўзимизнинг исботидир. Шу билан бирга, ушбу лойиҳа доирасида маҳалла идораси атрофидаги ерга яқиндагина ўтқазилган ниҳоллар кун келиб яшил маконга айланишига ишонгимиз келади.

Тадбиркорлик фаолияти, қизиқишинг кучли бўлган машғулот ким учундир бўш вақтини мазмунли ўтказишига қаратилган “hobby” бўлса, ким учундир ҳаётининг ажралмас қисми, яна кимгадир даромад манбаидир. Овул аҳли учун эса бу ҳам даромад манбаи, ҳамда тош ёплик тадбиркорларнинг қайсидир маънода ҳаётининг ажралмас қисми ҳамдир. Масканда «Хар бир оила Тадбиркор» тамойили асосида кредит олиб, Қурбонбоева Малоҳат ва унинг турмуш ўртоғи Холмонов Дониёр каби ўз қўл меҳнатлари билан иссиқхона ташкил қилиб, унда бир-биридан гўзал, анвойи гуллар етиштириб оиласига даромад келтираётган тадбиркорлар сафи кенгаймоқда. Шербоев Бахтиёр,Уразбоева Дилдора, Бегимов Тозабой, Ганибоев Тўлибой, Ганибоев Пўлат каби серғайрат тадбиркорлар қишлоқда кўплаб топилади.

Бугун юртимизда аҳолини, турмуш шароити оғир оилаларни ижтимоий қўллаб-қувватлаш, камбағалликни қисқартириш, муаммоларни аниқлаш ва бартараф этишда «Темир дафтар», “Аёллар дафтари”, “Ёшлар дафтари» муҳим аҳамият касб этмоқда. Маҳаллада бу бўйича рўйхат шакллантирилиб борилмоқда. Маҳалланинг қўли гул чеварларидан бири бўлган Шаҳодат Юсуповага кредит асосида тикув машиналари берилиб ҳозирги кунда ўз тадбиркорлик фаолиятини бошлади. Тадбиркор аёл ҳозирда маҳалланинг 2 нафар қизларини ёнига олиб, тикувчилик сирларини ўргатиб келмоқда.

Шунингдек, «Ёшлар дафтари»дан Сапарбоева Адолат, Гулмонова Мавлуда каби пазанда қизларга пишириқлар пишириш учун электр печ берилди. Тикувчилик билан шуғулланиш истагини билдирган Тўлибоева Асалойга эса субсидия асосида тикувчилик машинаси берилди.

Ҳа, овул одамларининг ҳам, ОФЙ масъулларининг ҳам келгусидаги режалари катта. ­

– Келгусидаги режаларимиз аҳолини қийнаб келаётган долзарб масалаларга ечим топишдир. Шулардан бири – инфратузилмани ривожлантириш. Юртдошларимизнинг оғирини енгил қилиш мақсадида маҳалламиздаги ички ва ташқи йўлларни таъмирлаш, шағал ётқизиш ишларини амалга оширишдир, – дейди ОФЙ раиси.

Биз эса ижодий гуруҳимиз билан уларнинг келгусидаги ишларига куч-қувват тилаб, хайрлашдик.

Азиза МАДРАҲИМОВА