31-сонли мактабда қорақалпоқ тили куни муносабати билан тадбир ўтказилди
Тил – давлат тимсоли, мулки, руҳи, миллатнинг маданий ва маънавий бойлиги, халқнинг маданияти, урф-одати, унинг турмуш тарзи, тарихидир.
1989 йилнинг 1 декабрь куни қорақалпоқ тилининг ҳуқуқий асосларини белгилаш бўйича “Давлат тили тўғрисида”ги Қонун қабул қилиниб, унга кўра қорақалпоқ тилига – Давлат тили мақоми берилди. Қорақалпоқ тили ўзининг қонуний мақоми ва ҳимоясига эга бўлди.
Республикамизда ҳар йили ушбу байрам кенг нишонланиб, турли учрашувлар, бадиий кечалар ўтказилиб келинмоқда.
Сана муносабати билан 2 декабрь куни Амударё тумани Мактабгача ва мактаб таълими бўлимига қарашли 31-сонли мактабда “Мәртебең бәлент болсын, ана тилим” деб номланган тадбир бўлиб ўтди.
Тадбирда мактаб директори Нилуфар Давлетова, унинг маънавий-маърифий ишлар бўйича ўринбосари Дилбар Ўрозалиева, мактабнинг қорақалпоқ тили ва адабиёти фани ўқитувчилари ҳамда ўқувчилар иштирок этдилар.
Тадбирни мактаб директори Нилуфар Давлетова очиб берди ҳамда йиғилган ўқувчи-ёшларни қорақалпоқ тилига давлат тили мақоми берилган кун билан табриклади.
Миллий тил давлатнинг ривожи, қолаверса, унинг миллат сифатида дунё тамаддунида ўз муносиб ўрнини эгаллаши учун муҳим аҳамият касб этади. Буюк тарихимиз ва аждодларимизнинг мероси ҳам айнан тил орқали бизгача етиб келади.
Тадбир давомида мактабнинг қорақалпоқ тили ва адабиёти ўқитувчиси Гўзал Камолова қорақалпоқ тилининг тарихи, аҳамияти ва уни янада ривожлантириш борасида қилинаётган ишлар ҳамда тилнинг жамиятимиз ҳаётида тутган ўрни ҳақида тушунчалар бериб ўтди.
Тил ҳар бир халқнинг миллий ўзлигининг тимсоли, маънавиятининг асоси ҳисобланади. Сўнгги йилларда қорақалпоқ тилига давлат тили мақоми берилган кун юртимизда янгича мазмун ва руҳда байрам қилинаётгани тилининг мавқеи ҳамда куч-қудрати юксалаётганини кўрсатмоқда.
Тадбир давомида сўзга чиққанлар ўқувчиларга қорақалпоқ тилини бойитиш мақсадида амалга оширилаётган чора-тадбирлар, қабул қилинаётган норматив-ҳуқуқий ҳужжатларнинг мазмун-моҳияти ҳақида батафсил маълумот берди. Шунингдек, ўқувчиларга қорақалпоқ тилининг софлигини сақлаш зарурлиги, уни янада бойитиш учун ҳар бир шахс ҳисса қўшиши лозимлигини айтиб ўтди.
Дарҳақиқат, бугунги кунда қорақалпоқ тилининг ўрни ва обрўсини орттириш бўйича кўплаб амалий ишлар қилинмоқда. Бир қатор илмий ва бадиий китоблар қорақалпоқ тилида чоп этилиб, ўқувчилар қўлига етиб бормоқда.
Айтиш керакки, амалга оширилаётган бу каби чора-тадбирлар қорақалпоқ тилига бўлган юксак эътиборнинг ёрқин намунасидир.
Тадбир давомида намойиш этилган саҳна кўринишлари ҳамда янграган куй-қўшиқлар йиғилганларга янада кўтаринки кайфият улашди.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
