ЙЎЛ ҲАРАКАТИ ХАВФСИЗЛИГИНИ ТАЪМИНЛАШ БЎЙИЧА НАЗОРАТ ТАДБИРЛАРИ ЎТКАЗИЛДИ

Мамлакатимизда йўл ҳаракати хавфсизлигини таъминлаш борасида тизимли ишлар амалга оширилмоқда. Жумладан, шаҳар ва қишлоқларда янги йўллар ва кўприклар қурилди, таъмирталаб бўлган кўплаб йўллар реконструкция қилинди. 2023 йилнинг 9 ойи ичида тартибга солинмаган пиёдалар ўтиш жойларида қарийб 9,2 минг ётиқ чизиқлар чизилган, 417 светофор объектлари ҳамда пиёдалар учун 210 та светофор қурилган.

Шунга қарамасдан, йўл ҳаракати қоидаларини бузиш ҳолатлари ортиб бормоқда. Масалан, 2023 йилнинг 9 ойи ичида мамлакатимизда йўл-транспорт ҳодисалари сони ўтган йилга нисбатан 2,4 фоизга ошган. Кўп ҳолларда бахтсиз ҳодиса натижасида фуқаролар тан жароҳати олиб, ўлим ҳолатлари ҳам кузатиляпти.

Шу муносабат билан давлат йўлларда кўнгилсиз ҳодисалар сонини камайтиришга қаратилган бир қатор чора-тадбирларни амалга оширяпти. Жумладан, йўл ҳаракати қоидаларини бузганларга нисбатан жарима тизимини қўллашдир. Бутун дунёда бундан кўзланган асосий мақсад – ҳайдовчи ва пиёдаларни йўл ҳаракати хавфсизлиги қоидаларини бажаришга ундаш ва уларни ноқонуний хатти-ҳаракатлар амалга оширишдан тийишдир.

Жорий йилнинг 19-20 ноябрь кунлари ва декабрь ойининг бошида Амударё туманида ҳам тан жароҳати билан боғлиқ ва оғир оқибатли йўл транспорт ҳодисаларининг олдини олиш, маст ҳолатда автотранспорт воситаларини бошқариш билан боғлиқ вазиятларга чек қўйиш, шунингдек, муддати ўтган қарздорликларни ундириш мақсадида назорат тадбирлари ўтказилди.

Назорат тадбирлари давомида ҳайдовчилик гувоҳномасига эга бўлмай туриб автомобиль бошқариш, бошқа одамга тегишли автомобилни бошқариш, тезликни ошириш мумкин бўлмаган ҳудудларда катта тезлик билан автомотранспорт воситаларини бошқариш, ички ишлар органи ходимининг қонуний талабига бўйсунмаслик, тегишли ҳужжатларсиз автомобилига арава улаш каби қўпол турдаги маъмурий ҳуқуқбузарликлар аниқланди. Мазкур ҳуқуқбузарликларни содир этган ҳайдовчиларга нисбатан тегишли тартибда маъмурий жазо чоралари кўрилди.

Шунингдек, тадбир давомида тўй кортежлари билан боғлиқ хунук ҳолатлар ҳам кузатилди. Хусусан, тезликни ошириш ман қилинган, аҳоли гавжум бўлган, шунингдек, таълим-тарбия муассасалари жойлашган ҳудудларда йўлни банд қилиб, тартибсиз равишда тўй сайри уюштириш, юриб кетаётган автомобилнинг ойнасидан ярим белигача ташқарига чиқиб, намойишкорона селфига тушиш каби ҳолатлар бўйича ҳам маъмурий баённомалар тузилиб, ҳуқуқбузар, ҳайдовчилар ва тўй кортежи иштирокчиларига нисбатан тегишли тартибда маъмурий жазо чоралари белгиланди.

Халқимиз фалокат оёқ остида, деб бекорга айтишмаган. Лекин ҳар қандай фалокат ёки бахтсиз ҳодисанинг олдини олиш эса инсоннинг ўзига боғлиқ. Қолаверса, ҳайдовчилик ҳам одамдан йўл ҳаракати қоидалари билан боғлиқ маданиятни, огоҳликни талаб этади. Чунки йўл – фақат ҳайдовчиники эмас, умумманфаати учун хизмат қилувчи ижтимоий, маданий ва иқтисодий мулк ҳисобланади. Шу боис, ҳайдовчилар ана шу мулкдан фойдаланувчилар дахлсизлигини таъминлашга бурчлидирлар. Шу билан бирга, инсонлар ҳаётини хавф-хатарга қўймаслик учун ҳамиша йўлларда маданиятли тарзда ҳаракат қилмоқлари шарт.

Робия ЙЎЛДОШЕВА.