Халқ депутатлари Амударё туман Кенгашининг навбатдан ташқари 67-сессияси тўғрисида ахборот

2023 йил 11 декабрь куни Амударё тумани ҳокимлигининг мажлислар залида Халқ депутатлари туман Кенгашининг навбатдан ташқари – 67-сессияси бўлиб ўтди.
Сессияни Халқ депутатлари туман Кенгаши раисининг ўринбосари Ғуломжон Эшниёзов очди ва олиб борди. Сессия котиблигига 4-Дўстлик сайлов округидан депутат Муқаддас Бекназарова сайланди.
Сессияда туман ҳокими, секторлар раҳбарлари, депутатлар, туман ҳокими ўринбосарлари, ҳокимлик масъул ходимлари, бўлимлар, ташкилотлар раҳбарлари, овул ва маҳалла фуқаролар йиғинлари масъуллари ҳамда оммавий ахборот воситалари вакиллари иштирок этди.
Сессияда дастлаб 2023-2024 йилларнинг қиш мавсумига тайёргарлик кўриш ва зарарсиз ўтказиш  чоралари тўғрисидаги масала юзасидан туман ҳокими Собир Хўжаметов ҳисобот берди.
Ҳисоботда 2023 йил - “Инсонга эътибор ва сифатли таълим” йилида ҳам туманимиз аҳолисининг фидокорона меҳнатлари натижасида барча соҳаларда салмоқли натижаларга эришилаётганлиги айтиб ўтилди.
Айтиш керакки, аҳолининг ёрдамга муҳтож қатламини ҳар томонлама қўллаб-қувватлаш, қийин кунларида уларга кўмакчи бўлиш мақсадида “Меҳр ҳаракати” карвони давом этмоқда.
Халқимизга хос бағрикенгликнинг ифодаси бўлган ушбу ҳаракат негизида ижтимоий ёрдамга муҳтож, боқувчисидан айрилган ёки ёрдамга эҳтиёжи бор оилалардан хабар олиниб, совуқ кунларни талофатсиз ўтказиб олишига кўмаклашилмоқда. Жумладан, ёлғиз қариялар, кўп фарзандли эҳтиёжманд оилаларга иссиқ кийим, озиқ-овқат тарқатиш пунктларини ташкил этиш чоралари кўрилмоқда. “Меҳр ҳаракати” тамойили асосида “Саховат ва кўмак” жамғармаси ва ҳомийлар ҳисобидан 57 нафар оилага 122,5 млн. сўмлик ёрдамлар кўрсатилган. 105 нафар оилага 42 тонна кўмир, 78 нафар оилага озиқ-овқат маҳсулотлари, 4 нафар оилага суюлтирилган газ баллони, ҳомийлар ҳисобидан 2та оилага газ плитаси, 90 нафар оилага иситиш печкаси, 25 нафар оилага 105 дона иссиқ кийим-кечаклар тарқатилган.
Сессияда жойларда хотин-қизларни қийнаётган муаммоларни ҳал қилиш ҳамда жамиятда аёлларнинг нуфузини янада ошириш бўйича кўрилаётган чоралар самарадорлиги тўғрисида туман ҳоким ўринбосари, Оила ва хотин-қизлар бўлими бошлиғи Гўзал Собурова ҳисобот берди.
Ҳисоботда таъкидлангандек, шу кунгача 4-босқич “Аёллар дафтари”га киритилган 5 минг 398 нафар хотин-қизларнинг 5 минг 330 нафарига ёрдамлар кўрсатилган.
Шундан, биринчи тоифа - ижтимоий ҳимояга муҳтож ишсиз 1 минг  943 нафар эҳтиёжманд хотин-қизларнинг  бандлиги таъминланган.
“Аёллар дафтари”га киритилган 200 нафар хотин-қизлар Хива шаҳрига саёҳатга олиб борилган ҳамда 14 нафар реаблитация мосламаларига муҳтож хотин-қизларга 3та ҳасса таёқ, 4 та эшитиш мосламаси, 7та ногиронлик аравачалари берилган.
Сессия ишида “Меҳр ҳаракати” бўйича ёрдамга муҳтож ёшларга ёрдам бериш масаласи юзасидан Ёшлар ишлари агентлиги туман бўлими бошлиғи Сардор Исмоилов ҳисобот берди.
Ҳисоботда таъкидлангандек, тумандаги жами 14-30 ёш тоифадаги 54 минг 503 нафар ёшларнинг баланси шакллантирилган. Хусусан, 23 минг 551 нафар "яшил" тоифа, 30 минг  952 нафар "сариқ" тоифа, 1 минг 316 нафар "қизил" тоифаларга ажратилган.
Жорий йил бошидан шу кунгача “Ёшлар дафтари”га 3 минг 769 нафар ёшлар киритилган бўлиб, шундан 2 минг 906 нафарига амалий ёрдамлар кўрсатилган.
Сессия якунида туман ҳокими Собир Хўжаметов депутатларни, овул ва маҳалла фуқаролар йиғинлари масъуллари ҳамда корхона-ташкилотлар раҳбарлари билан биргаликда фаол иш олиб борган ҳолда "Меҳр ҳаракати" доирасида амалга оширилаётган ишларга ҳисса қўшишга, аҳолининг эҳтиёжманд қатламини ижтимоий ҳимоя қилиш, қиш мавсумини беталофат ўтказишларига кўмаклашиш борасида амалга ошираётган тадбирларга ҳисса қўшишга чақирди.
Сессияда Кенгаш ваколатига кирувчи бошқа масалалар ҳам муҳокама қилинди. Кун тартибидаги барча масалалар атрофлича кўриб чиқилиб, туман Кенгашининг тегишли қарорлари қабул қилинди.
Шунинг билан сессия ўз ишини якунлади.

Туман ҳокимлиги Ахборот хизмати